Daniyɛl 10 - Ghena ta Shala

Kwa mahekene ta wəsə nya nakɛ Daniyɛl: wəndə nya mbe lekwesa pawa

¹ Ma mbe kwa mahekene ta va ta Sirəs, meghe nya mbe Pɛrse te meghe ne, pa ghena ta Shala ncɛte nda geva ke Daniyɛl nya heka mbeli kaBɛltasar. Nahe ghena shɛ kenza kakaganda ba'a kaghena nya dzawe. Pa Daniyɛl zəzəve ghena shɛ ba'a fave ghena nya mbe wəsə nya nakɛ ŋkɛ.

² Ma 'ya, 'ya Daniyɛl mbe vəa shɛ ne, pa 'ya nza ɗa kala wəndə nya mte wəndə ve kashikwə mahekene.

³ Kazehwe wəsə kezeme nya zeɗe 'ya we, kedzawa mɛa ɗa sli keɗema tɛ we, keslaɗete ghə 'ya, nda kiɗinji shikwə nyi mahekene nyi we.

⁴ Ma mbe kwa bakemsə wəfaɗeghəmbe ta hɛ te tere kwa ghate ne, nahe 'ya kese mɛa Tigre, hələ nya wəba.

⁵ Ma newe 'ya ne, pa 'ya nakɛ kwete wəndə mbe lekwesa pawa, zewe mze kwa tere tere nya ganyɛ ya hwa hwə ve.

⁶ Nahe geva ta ŋkɛ kenza kala pelɛ kwa sleke sleke, kema ta ŋkɛ kala slesla ta va, ntsə ta ŋkɛ kala ghwə te wəvəzə, yɛ dzeve ta ŋkɛ ba'a yɛ seɗa ta ŋkɛ kala ɓayɛ ɓayɛ ta mze kwa ghwə ghwə nya kenjɛhe njehe, gaka ta ŋwələa ŋkɛ kala gaka ta mbeli kwele kwele.

⁷ Deke 'ya, 'ya Daniyɛl nde nakɛ nca ta wəndəa shɛ. Wəsə shɛ kenakɛ mbeli nyi yitea 'ya we, ama pa hɛ ghazlənənji kwele kwele ba'a hwɛnji kalə kawəfərə.

⁸ Deke 'ya nde tene kanewe wəsə meŋelea shɛ. Pa berete ta ɗa denenyɛ, pa kema ta ɗa zhɛrete pa ba'a nzanyɛ tɛarawe rawe, pa 'ya zhɛre ɗa kande dewə berete.

⁹ Pa 'ya fate ŋwələa ŋkɛ. Ma va gaka ta ŋwələa ŋkɛ ne, pa mehele ta ɗa zanyɛ ba'a pa 'ya teɗe ɗa njifə kema mbe hɛɗi.

¹⁰ Tagha gɛ, pa dzeve kwaɗakɛ ɗa ba'a kafakate ɗa, te və nya bare bare 'ya te yɛ ghəa shene ta ɗa ba'a yɛ hwə dzeve ta ɗa.

¹¹ Ma ke wəndəa shɛ sha 'ya: «Daniyɛl, gha nya ɗe Shala, fave ghena nya mbe ghena nyi geze ŋa 'ya. Sate ŋa meslete, kwa nza ŋkɛ ke gha ghweneke ŋa geva 'ya tsetsenya.» Ma mba ŋkɛ kageze ɗa ghena ne, pelɛhetɛme 'ya sate te ŋkwa le bare bare.

¹² Ma ke mtsehete: «Ghazlənəma na ma Daniyɛl ma! Kwa nza ŋkɛ ma se te kwa ghate ta hɛ nya ɗehwe fa wəsə nya kemenete geva ba'a nya shifəmte ghəa ŋa na kwa kema ta Shala ne, nahe səkwə ta ŋa kefate geva. Kezha zhɛne səkwə ta ŋa se 'ya.

¹³ Nahe nde ya keya hɛɗia Pɛrse zhɛnete ɗa ghə kahɛ bakemsə kwetɛŋeghəmbe. Ama pa Mishɛl, kwete wəndəa mbelia jama ta ka ghwene ta Shala se kakemanakɛ ɗa. Tagha nza ɗa 'ya yitea ka meghea kɛfi nya mbe Pɛrse.

¹⁴ Ma tsetsenya ne, 'ya se kezha fave ŋa wəsə nya ketemene nda geva ke hwelefe ta ŋa te kwete hɛ, kwa nza ŋkɛ kwete wəsə nya ketemene geva te vəa shɛ ya shɛ.»

¹⁵ Ma vəa ŋkwa nya geze ɗa ghena shɛhɛ ŋkɛ ne, pa 'ya ŋate ghə ba'a nza ɗa divə.

¹⁶ Ama pa kwete wəsə kala wəndə ŋelɛ kwaɗakɛ bəzhia mɛa ɗa. Pa 'ya ghwenemte mɛ ba'a ntake 'ya kageze ghena. Ma 'ya sha wəndə nya meslete kwa kema ta ɗa: «Nde sleke ɗa yawe, ma tewəmbəreke wəsə nya nakɛ 'ya ne, nahe 'ya kenza keyirə yirə ba'a kedene dene.

¹⁷ Tsema nza 'ya, 'ya nde mene slene ta ŋa kagezete ŋa ghena, gha nde sleke ɗa wa? Tsetsenya ne, kedene dene 'ya ba'a mba sefə hwa 'ya we.»

¹⁸ Tagha gɛ, pa wəsə nya kala wəndə ŋelɛ zhɛne kakwaɗakɛ ɗa ba'a ndeke ɗa berete.

¹⁹ Kwa sebe ta ŋkɛ, ma ke sha 'ya: «Wəndə nya ɗe Shala, ghazlənəma na gɛ ma! Nza gwezlayɛ gɛ! Hwepete ghə ba'a nza bereteke deŋwa!» Ma vəa ŋkwa nya geze ɗa ghena ŋkɛ ne, pa 'ya kemave berete, ma 'ya gezete: «Nde sleke ɗa yawe, wərə na kageze ɗa ghena, kwa nza ŋkɛ nahe na kendeke ɗa berete.»

²⁰ Ma ke gezete ɗa: Nahe na keɗepe tewəmbəreke wa se 'ya sha gha na? 'Ya kampa tsetsenya le nde ya Pɛrse. Ma vəa ŋkwa nya teslə 'ya ne, nde ya Grɛse nde tese.

²¹ Ama 'ya kageze ŋa wəsə nya kerafete geva mbe palepa ta kaganda. Wəndə shɛ kakemane ɗa va ka ghema shɛhɛ, keɗema Mishɛl, nde ya Israyɛl we.