Cimə nya zeɗe ma 4 - Ghena ta Shala

Mempɛhweta

¹ Ganyɛke na meghwate ɗa, ganyɛke na deŋwa! Shave mbe wəsə nya kənəa ghə va gha ne, kala yɛ ghwəɗəŋkwə ntsə ta ŋa. Kala wəvəsəa kwi dzawa vare ghweme ta Gala'ad, yɛ shintia ghəa ŋa.

² Nahe yɛ slene ta ŋa kenza kala wəvəsəa timɛti nyi tsehemte shinti mbeli te hɛ, nyi kesame kwa ŋkwa kepɛ hɛ. Nahe pɛtɛa nci kenza kanehweli kanehweli, kwete shɛ kwetɛŋenyɛ we.

³ Nahe yɛ bəzhia mɛa ŋa kenza kala zlave kwa ghɛmɛ nya slɛahe, nahe mɛa ŋa kenza kendeɗenyɛ. Shave mbe wəsə nya kənəa ghə ne, nahe yɛ ghweleme ta ŋa kenza gheme kala sla ta ya ta kwakweme.

⁴ Nahe welɛa ŋa kenza kala ŋkwa keya ŋkwa ta David, nya keŋate geva megela. Gelə slibə yaseɗeyi mbeli mbe, nahe hɛ kenza kageləa ka katsala kɛfi.

⁵ Nahe yɛ ŋ'wa ta ŋa kenza kala zhɛgwəa lɛməa kwi bake, kala nehwelɛməa kɛme nyi kezeme gwəzə hwa yɛ gatawəfa.

⁶ Ma nda tese lɛnɛa tɛhwɛɗi, vəa ŋkwa nya nza yɛ shenaŋkwe bebiyake ne, katelə 'ya kadzehwa ghweme ta 'wərdə ganyɛ ba'a kadzeme wəmbəa 'wərdə kwa hə hə.

⁷ Ganyɛke na meghwate ɗa, beze shɛ te gha we.

⁸ Sawa le 'ya pelɛ Liban, meghwate ɗa, sawa le 'ya pelɛ Liban. Sawa ŋa pelɛ ghweme ta Amana, ŋa Senir ba'a ŋa Hɛrmon. Slə ŋa te yɛ ghweɓea yɛ nivɛrə nyi, hwa yɛ ghweme ta yɛ deghwava nyi.

⁹ Nahe na kekesehwe mehele ta ɗa wəzha ta meyɛ ɗa, meghwate ɗa, nahe na kekesehwe mehele ta ɗa laka kwete newe ŋkwa ta ŋa, laka kwete zhɛre geva ta yɛ livəa ŋa.

¹⁰ Nahe yɛ saɗe ŋkwa ta ŋa kenza zlahe zlahe wəzha ta meyɛ ɗa, meghwate ɗa! Nahe hɛ kenza zeɗe ma ke tɛ, zeɗehwe ɗa ma 'wərdə ta ŋa ke pɛtɛa 'wərdə nyi ganji ganji.

¹¹ Meghwate ɗa, nahe bəzhia mɛa ŋa kenza kala yɛməa mze. Yɛməa mze ba'a ŋ'wa ya te ghɛnia ŋa. Nahe zəŋwəa yɛ lekwesa ta ŋa kenza kala zəŋwəa wəfe nyi mbe Liban.

¹² Kantsa nya kaŋa ɗa na, wəzha ta meyɛ ɗa, meghwate ɗa, kaɗasle nya kaŋa ɗa na, kabelageji nya keveyi ɗa geva.

¹³ Nahe lɛnɛa ta ŋa kenza kala kwakweme nyi kwa ntsa nyi nza ya ta nci ghɛnike nike. Kwa ne, kapese rəghwə ba'a sewahe,

¹⁴ sewahe ba'a pəwə pəwə, pɛtɛa wəfe nyi tseɗe 'wərdə mbeli yitea hɛ, wəfe ta 'wərdə ganyɛ ba'a neha ghwemezhi, zlaɓe le 'wərdə nyi ganji ganji ma.

¹⁵ Kabelageji nya kwa ntsa, kaɗasle ganyɛ nya kehwɛ sawa pelɛ Liban na.

Degheli

¹⁶ Sefə nya laka bela kwa gwela, feɗeghe, sefə nya laka bela kwa zeme, se kahe kahe. Vɛ mə kənəa ntsa ta ɗa nya kezəŋwə megela, Gha nya ɗe 'ya, dzawa ntsa ta ŋa ba'a zeme ya ta wəfe nyi zeɗe zeɗe.