Cimə 97 - Ghena ta Shala

Nza hɛɗi lema fare fare

¹ Mahwətə ya kameghe. Nza hɛɗi lema fare fare, zlama pɛtɛa hɛɗi nyi dzeyi te yɛmə.

² Dzasle ŋkɛ kwa ləmbə ba'a kwa ŋkwesle, nza tiɗiɗi ba'a wəsə nya kehi yanza pasla ta ŋkɛ te.

³ Ghwə nde dzeghwa mbe kema ta ŋkɛ kezha tere ka ghema ta ŋkɛ te yayata bela.

⁴ Kawaŋe hɛɗi lema yɛ slesla ta ŋkɛ, ma kwa nakɛ hɛ hɛɗi ne, ntake ŋkɛ kabare bare.

⁵ Kaslɛwa yɛ ghweme kala ɗəkə kwa kema ta Mahwətə, kwa kema ta Shala nya te ghəa hɛɗi lema.

⁶ Kazlape nza tiɗiɗia ŋkɛ ghweme, tagha gɛ, kanewe zləvəa ŋkɛ pɛtɛ mbeli.

⁷ Hawe ya te ka hawe va wəshi nyi zhɛre mbeli kashala, te mbeli nyi kefege le wəshia kwadanjia shɛhɛ. Gwəɗəŋənji pɛtɛa kweci shala kwa kema ta Shala.

⁸ Katefa ghena shɛ ka Siyon ba'a katezlama hɛ. Katenza meleme nyi mbe Zhəwda fare fare tewəmbəreke meha ghwə ta ŋa, gha Mahwətə.

⁹ Kwa nza ŋkɛ ma gha Mahwətə ne, gha ya kaShala nya pelɛagha kənəa hɛɗi lema, gha ya te ghəa pɛtɛa kweci shala.

¹⁰ Gheyɛ mbeli nyi keɗe Mahwətə, ɗema mə wəsə kwa ndiremi. Kaya mpia mbelia ŋkɛ ŋkɛ, kambele hɛ ŋkɛ va ka 'yaghwa mehele.

¹¹ Nahe waŋe keɓelete geva kezha wəndə nya tiɗiɗi, zlama ya va mbeli nyi nza wənəa nci wɛŋe.

¹² Mbeli nyi tiɗiɗi, zlama mə mbe Mahwətə, tsahe mə ŋkɛ laka geze sləa ŋkɛ nya keveyi geva tekeleke.