Cimə 94 - Ghena ta Shala

Kawa wəsə kwa ndiremi Shala

¹ Shala nya kewa ghena, Mahwətə yawe, Shala nya kewa ghena, ncɛte ghəa ŋa gɛ!

² Sate te ŋkwa, gha nya kande meha ghwə te hɛɗi, zhɛneyi wəsə kwa ndiremia nci kənəa ka kele ghə.

³ Mahwətə, pa te nyama və tezlama ka 'yaghwa mehele wa? Kaganda ne, pa te nyama və wa?

⁴ Ghena yagegeze hɛ, ghena ŋkele ntsə yasla hɛ, fege yamene pɛtɛa ka mene wəshi nyi ndiremi ndiremia shɛhɛ.

⁵ Mahwətə yawe, yaka yasa nda hɛ ke mbelia ŋa, gəli yasa nda hɛ ke mbeli nyi kaŋa ŋa.

⁶ Kaghazle ka wedidi ba'a ka se se hɛ, kampə ka mezhɛtiti hɛ.

⁷ Tagha gɛ, ma ke hɛ sha geze: «Wəsə shɛ kanakɛ Mahwətə mbe we, wəsə shɛ kafave Shala ta Zhakob we.»

⁸ Gheyɛ ka gezhia kɛfi, ɗepete mə. Gheyɛ ka ɓaŋara kɛfi, hweŋkwa tezəzə ghena yɛ wa?

⁹ Kaɗema Shala nya keveyi sleme vare ghə kafa ghena na? Kaɗema Shala kepeyi ntsə kwa ghə kanewe ŋkwa na?

¹⁰ Kaɗema gheŋkɛ nya ke'yɛ hwelefefi kaɗate ŋkwa, gheŋkɛ nya keve nda ɗepe wəsə ke mbeli na?

¹¹ Nahe Mahwətə keɗepe yɛ zəzə ta mbeli, nahe hɛ kenza gəmə.

¹² Mahwətə, zlama ya va wəndə nya 'yɛ, nya teke nda ntsehwele na laka wəsə mahalegəa ŋa

¹³ kezha ve nda zhɛne mpi mbe hɛ nyi ndiremi ndiremi, te və nya la nda geva kwele ke ka 'yaghwa mehele.

¹⁴ Kwa nza ŋkɛ ne, kasərə mbelia ŋkɛ Mahwətə we, kawəfə mbeli nyi kaŋa ŋkɛ ŋkɛ we.

¹⁵ Katezhɛne mbeli kameha ghwə nya tiɗiɗi, katehawe pɛtɛa mbeli nyi nza kaganda kwa wənəa nci ve.

¹⁶ Wa nde teya ɗa va ka 'yaghwa mehele tse wa? Wa nde tekemane ɗa va ka mene wəshi nyi ndiremi ndiremi wa?

¹⁷ Ma ya kaɗema Mahwətə kekemanakɛ ɗa ne, nza ɓeshi ɓeshi 'ya kwa kwele we.

¹⁸ Ma te və nya geze 'ya: «'Ya kateɗe», a 'ya ne, katawe ɗa ganyɛa ŋa Mahwətə.

¹⁹ Ma te və nya nza zəzə viɗi mbe ghəa ɗa ne, kagweɗakwe ɗa na, kave ɗa zlama na.

²⁰ Wəsə nya kejikəte ŋayɛ ya shɛ le ka meha ghwə nyi kempə ŋkwa, nyi kesa nda yaka nyi ke mbeli laka ɓelama wəshi mahalegə na?

²¹ Geva yajikə hɛ yitea mbeli nyi tiɗiɗi, fete yave nda hɛ ke wəndə nya kebezemtema ghena.

²² Ama Mahwətə ya kande ya ɗa, Shala ta ɗa ya kagela kewəfərə ta ɗa.

²³ Katezhɛne nda wəsə kwa ndiremia nci ŋkɛ kwa ghə ke hɛ, kateza sebe ŋkɛ te hɛ laka 'yaghwa mehele ta nci. Kateza sebe Shala Mahwətə ta ɓəmə te hɛ.