Cimə 92 - Ghena ta Shala

Megela ŋkɛ kezha tsahe Mahwətə

¹ Cimə. Cimə kezha veci kezhɛne mpi.

² Megela ŋkɛ kezha tsahe ŋa Mahwətə ba'a kezha tsahe sləa ŋa, Shala tehwə ghweme,

³ kezha geze ɗe ta ŋa kiɗima ta ŋkwa, ba'a ganyɛa ŋa mbe yayata viɗi,

⁴ yitea getsepele ba'a gagera, yitea tsa ta ŋgwəleŋə.

⁵ Mahwətə yawe, zlama yave ɗa slene nya menete na, gaghwe yatsa 'ya yitea wəshi nyi menete dzeve ta ŋa.

⁶ Mahwətə yawe, kejama jamanji slene nyi menete na, cakeɗa cakeɗanji yɛ zəzə ta ŋa.

⁷ Wəsə shɛ keɗepe gezhi mbe we, wəsə shɛ kafave ɓaŋara mbe we.

⁸ Kapese ka 'yaghwa mehele kala gwəzə, kanza ka mene wəsə kwa ndiremi lɛŋe lɛŋe, ama kaghala ghala teza sebe te hɛ.

⁹ Ama gha nya pelɛ ghweme ne, gha ya kaMahwətə kaghala ghala.

¹⁰ Wa nyi ka jaga ta ŋa nyi gɛ Mahwətə! Wa nyi ka jaga ta ŋa nyi kateza, katetaze pɛtɛa ka mene wəsə kwa ndiremi.

¹¹ Kave ɗa berete na kala ŋa sla gamba, kasheke n'yi nya kizə kizə na kənəa 'ya.

¹² Kanenewe teɗe ta ka ghema ta ɗa 'ya, kafefa lewela ta ka 'yaghwa mehele nyi keɗa ɗa 'ya.

¹³ Kakele wəndə nya tiɗiɗi kala peha, kawəvələ ŋkɛ kala lekeleke nya mbe Liban.

¹⁴ Kemɓe mɓe ŋkɛ mbe ghɛa Mahwətə, kakele ŋkɛ te yɛ ŋwela ta ghɛa Shala ta ɓəmə.

¹⁵ Ya gheŋkɛ nza kehale hale ne, nda ya yaya ŋkɛ, viɗi nza ŋ'wa mbe ba'a gwəzləmə nza ŋkɛ,

¹⁶ kezha ncɛ Mahwətə ya tiɗiɗi ba'a yaɗema mbəɗəkwə mbe, gheŋkɛ nya kagela ta ɗa.