Cimə 91 - Ghena ta Shala

Kwa ghwədərəa Shala tehwə ghweme

¹ Ma wəndə nya kenzanyɛ kwa ghwədərəa Shala tehwə ghweme ne, yitea shenaŋkwe ta Shala Nde berete ŋkɛ.

² Ma ke sha geze nda ke Mahwətə: «Gha ya kande wəfərə ɗa ba'a kande ya ɗa, gha ya kaShala ta ɗa nya ve ghə 'ya te!»

³ Gheŋkɛ nde mbele ŋa va dagalawea nde zlɛaŋezlɛa ba'a va ba nya kempə ŋkwa.

⁴ Katedəpə yɛ bidzəa ŋkɛ ŋkɛ kənəa gha, katewəfərə na mbeyitere hɛ. Ganyɛa ŋkɛ ya kagelə nya keya ŋa.

⁵ Kateghazlənə na va wəshi nyi kedake ŋkwa heviɗi, ya va have nya yitea ghweme heveci,

⁶ ya va ba nya kedzeghwa mbe ŋkwesle, ya va ndiremi nya keɗa ŋkwa heveci we.

⁷ Ya mbeli slibə bete vare gha ba'a slibə meŋe te kwa zeme ta ŋa ne, wəsə shɛ katekwaɗe ŋa we.

⁸ Katepele ntsə ta ŋa nahe ba'a katenewe zhɛme ta ka 'yaghwa mehele na.

⁹ Kaganda ne, gha Mahwətə ya kande wəfərə ɗa. Ma keveyi Shala tehwə ghweme na kande ya ŋa ne,

¹⁰ wəsə kwa ndiremi shɛ katekwaɗe ŋa we, ndiremi shɛ katehende nda geva ke ghɛa ŋa we.

¹¹ Kwa nza ŋkɛ kategeze nda ŋkɛ ke ka ghwene ta ŋkɛ kezha ya ŋa mbe pɛtɛa dzeghwa ta ŋa.

¹² Katekele ŋa hɛ yitea dzeve ta nci kezha ɗema seɗa ta ŋa kampə nda geva ke pelɛ.

¹³ Katedzeghwa na te nivɛrə ba'a mentsape, kateŋkeɗe deghwava ba'a shishi meŋele na.

¹⁴ Ma ke Shala gezete: «Ma va nya jikəte geva ŋkɛ le 'ya ne, katembele ŋkɛ 'ya, kateya ŋkɛ 'ya va nya ɗepe sləa ɗa ŋkɛ.

¹⁵ Ma kesəkwə ɗa ŋkɛ ne, katezhɛne nda 'ya, katenza 'ya dzeme vare gheŋkɛ te vəa yaka. Katembele ŋkɛ 'ya ba'a kateve nda zləvə 'ya.

¹⁶ Kateve nda temə 'ya kwele kwele teghweme ba'a katencɛ nda mbele ta ɗa 'ya.»