Cimə 86 - Ghena ta Shala

Səkwə ghə nya te vəa yaka

1 Səkwə ghə ta David.

¹ Səkwə ghə ta David. Mahwətə, ghwenemte sleme, zhɛnete ɗa, kwa nza ŋkɛ nde dewə berete ba'a nde titikwə 'ya.

² Ya ɗa, kwa nza ŋkɛ dɛŋe dɛŋe 'ya te gha. Gha nya kaShala ta ɗa, mbele ɗa, 'ya nya kande mene slene ta ŋa, 'ya nya kande ve ghə te gha.

³ Shala yawe, zhɛ heli yitea 'ya, gha nya səkwə 'ya kevə kevə.

⁴ Veyi zlama kwa wənəa nde mene slene ta ŋa, kwa nza ŋkɛ ke gha zhɛre ŋa geva 'ya Shala.

⁵ Ma gha Shala ne, ganyɛke na ba'a kakele ghena na te wənə, wəbake ɗe ta ŋa kaŋa mbeli nyi kesəkwə ŋa.

⁶ Mahwətə yawe, ve sleme yitea səkwə ta ɗa, fate lewela ta ɗa.

⁷ Ma te vəa yaka ne, gha yasəkwə 'ya, kwa nza ŋkɛ kazhɛne ɗa na.

⁸ Shala yawe, kwete shala shɛ kala gha we, kwete shɛ kamenete wəsə nya mene na we.

⁹ Katese pɛtɛa hwelefefi nyi pate na, kategwəɗəŋə hɛ kwa kema ta ŋa, kateve zləvə hɛ te sləa ŋa Shala yawe.

¹⁰ Kwa nza ŋkɛ ne, wəbake na ba'a kamene wəshi meŋele na. Deke gha ya kaShala.

¹¹ Mahwətə yawe, ncɛte ɗa hweŋkwa ta ŋa, tagha gɛ, katezele kaganda ta ŋa 'ya. Ndeke nda hawe va gha ke wənəa ɗa.

¹² Katetsahe ŋa 'ya le wənə kwetɛŋe Shala, Shala ta ɗa, kateve zləvə 'ya te sləa ŋa kaghala ghala.

¹³ Nahe ganyɛa ŋa kenza wəbake kaŋa ɗa, nahe na kezləgwəke ɗa same kwa ghɛa mbelia kwahɛɗi.

¹⁴ Shala yawe, nahe ka kele ghə kesate te ŋkwa yitea 'ya, mte ta ɗa yaɗe wəvəsəa ka ghwərə ghwərəa ntsə, kave zəzə hɛ te gha we.

¹⁵ Ama gha gɛ Shala yawe, gha ya kaShala nya kezhɛ heli, nya ganyɛa mehele, nya kesəwə ghena, nya keɗe ŋkwa ba'a nya nza kaganda ve.

¹⁶ Zhɛrete geva laka 'ya ba'a zhɛ heli yitea 'ya, ndeke nda berete ta ŋa ke nde mene slene ta ŋa ba'a mbelete wəzege ta kwatera ta ŋa.

¹⁷ Ndeke ɗa wəsə kencɛ zlaɓa ta ŋa gɛ! Tagha gɛ ne, kateme hawe te ka ghema ta ɗa. Katenewe hɛ tsema tsema kemane ɗa ba'a gweɗakwe ɗa na, gha Mahwətə.