Cimə 83 - Ghena ta Shala

Shala yawe, nzama na divə ma

¹ Cimə. Ciməa Asaf.

² Shala yawe, nzama na divə ma, Shala yawe, nzama na gweŋe ba'a tikə tikə ma.

³ Wa nyi ka jaga ta ŋa nyi kasate te ŋkwa, kafe yakafe ghə mbeli nyi keɗema ŋa.

⁴ Ghena yatsa hɛ yitea mbelia ŋa, geva yatsene hɛ tewəfərə yitea mbeli nyi ya na.

⁵ Ma ke hɛ: «Kwiɗi mə, zamte ɓəmə sebe te hɛɗia nci, zhɛnema mbeli kahekɛme sləa Israyɛl ma.»

⁶ Ghena yatsa hɛ kanya kwetɛŋe, geva yajikə hɛ yitea gha:

⁷ ka Ɛdom ba'a ka Ismayɛl, ka Mowab, ŋwalea Agar ba'a ka Gɛbal,

⁸ ka Amon ba'a ka Amalɛk, ka Filisti ba'a mbeli nyi mbe Tir.

⁹ Pa le ka Asiri kejikəave geva vare hɛ kezha kemane hwelefe ta Lot. Zhɛne mpi.

¹⁰ Menete nda ke hɛ kala ka Madiyan, kala Sisra ba'a kala Yabin kwa hələa Kishon.

¹¹ Nahe mbeli kempəmte hɛ mbe Ɛn-Dor, nahe hɛ kezhɛrenji kadədə nya te hɛɗi.

¹² Menete nda ke mbelia jama ta nci kala yɛ Orɛb le Ozɛb ba'a ke mbeli nyi te ghəa nci kala yɛ Zɛba le Salməwna.

¹³ Ma ke mbelia shɛhɛ sha se kageze: «Kelehwe ɓəmə hɛɗia Shala.»

¹⁴ Shala ta ɗa, zhɛrete hɛ tɛwərə wərə kala shekwəli nya kele sefə.

¹⁵ Kala nya tere gamba ghwə ba'a kala tse ta ghwə dzeme hwa yɛ ghweme ne,

¹⁶ kekate hɛ le sefə nya wəba, dakete hɛ le va nya wəba.

¹⁷ Nza hawe kwa kema va hɛ, kezha zhɛre geva hɛ kase sha gha, gha Mahwətə.

¹⁸ Nza hawe te hɛ ba'a zhɛ nda ghazlənə ke hɛ kaghala ghala, ɗema zləvə nza te hɛ ba'a zanji sebe te hɛ.

¹⁹ Ɗepete hɛ deke gha yanza sləa ŋa kaMahwətə, kaShala tehwə ghweme nya te hɛɗi lema.