Cimə 81 - Ghena ta Shala

Kese mbelia ɗa kafa ɗa ghena we

¹ Se va wəndə nya te ghəa cimə. Yitea getsepelea ka Gat. Ciməa Asaf.

² Tsa nda mə gaghwe ke Shala nya kaberete ta ɓəmə, gha nda mə cimə ke Shala ta Zhakob.

³ Tsa mə wəshi ketsa, tsa mə dimə, tsa mə ŋgwəleŋə ganyɛ ba'a getsepele.

⁴ Vɛ mə tereme yitea dzemɛa ghweme ta tere ba'a te və nya nza tere taghele ghele yitea gəsəkəa ɓəmə.

⁵ Nahe ŋkɛ kenza kawəsə mahalegə sha ka Israyɛl, kazəzə nya kelete Shala ta Zhakob.

⁶ Nahe ŋkɛ kenza kawəsə keshi nya ndeke nda ŋkɛ ke Zhozɛf te və nya have nda mpa ŋkɛ ke hɛɗia Ɛzhipte. Nahe 'ya kefate ŋwələ nya ɗepema 'ya, ma ke:

⁷ «Nahe 'ya kekelemte wəsə nya ɗaŋeɗa kwa ghəa ŋayɛ, nahe yɛ dzeve ta ŋayɛ kepelakɛ kwaciga nya ɗaŋeɗa.

⁸ Ma te və nya tsa lewela yɛ mbe ndiremi ne, nahe 'ya kembelete ŋayɛ. Nahe 'ya kezhɛnete ŋayɛ shave mbe tepe ta va nya wəba. Nahe 'ya kedzeghakɛ ŋayɛ terasle yitea yɛməa Mɛriba. Zhɛne mpi.

⁹ Mbelia ɗa, fa ɗa mə ŋa ɗa, ghena ya va 'ya kageze ŋayɛ. Ka Israyɛl, ma kenza yɛ kafa ɗa ŋa ɗa ne,

¹⁰ katenza kwete shala va gheyɛ we, kategwəɗəŋə yɛ kwa kema ta kwete shala we.

¹¹ 'Ya ya kaMahwətə Shala ta ŋayɛ nya kefəakame ŋayɛ kwa Ɛzhipte. Ghwenete mə mɛa ŋayɛ beŋweke, tagha gɛ, kateviɗi hɛ 'ya.»

¹² «Ama kese mbelia ɗa kafa ŋwələa ɗa we, kese ka Israyɛl kaɗe ɗa we.

¹³ Tagha gɛ, pa 'ya pelakɛ hɛ yitea zəzə ta nci, pa hɛ zelete wəshi nyi ɗe mehele ta nci.

¹⁴ Aya, ma ya nahe mbelia ɗa kese kafa ɗa ŋa ɗa, ma ya nahe ka Israyɛl kese kadzeghwa kwa hweŋkwa ta ɗa ne,

¹⁵ nza kahe kahe tehərə ka jaga ta nci 'ya, teɗa mbeli nyi kesa nda yaka ke hɛ 'ya.

¹⁶ Tagha gɛ, kateshifə ghə ka ɗema Mahwətə kwa kema ta nci, ba'a ne, gwezlayɛ tenza ka Israyɛl kaghala ghala.

¹⁷ Ha nya ganyɛ yatezeme nda 'ya ke ka Israyɛl, yɛməa mze yatebehe hɛ 'ya le.»