Cimə 77 - Ghena ta Shala

Zəzə te nza ta Israyɛl nya vəashi

¹ Se va wəndə nya te ghəa cimə. Te Yedəwtəwn. Ciməa Asaf.

² Shala yaheka 'ya, katsa nda lewela 'ya, Shala yaheka 'ya, katefa ɗa ŋa ɗa ŋkɛ.

³ Vəa ŋkwa nya nza 'ya mbe ndiremi ne, kasepa Shala 'ya. Ma heviɗi ne, kakafe dzeve 'ya laka gheŋkɛ kaɗema kaleɓe, kaɗe 'ya kagweɗakwe ɗa mbeli we.

⁴ Ma vəa ŋkwa nya zəzəte Shala 'ya ne, kaŋgaɗe ghə 'ya. Ma vəa ŋkwa nya zəzə ghena 'ya ne, kabeze mehele ta ɗa. Zhɛne mpi.

⁵ Kafɛa ɗa na kedərəzlə ntsə, ketaze taze mehele ta ɗa, kezhɛne 'ya kaɗepe ghena kegeze we.

⁶ Kakele zəzə 'ya te veci nyi hecanji, te va nyi vəashinji.

⁷ Ma heviɗi ne, kazəzə cimə nya se 'ya kagha 'ya, kaɓela ghena 'ya kwa wənəa ɗa ba'a ka'yɛwe ghena 'ya mbe mehele ta ɗa.

⁸ Nahe Shala kebetakɛ ɓəmə kaghala ghala na? Kateɗema ŋkɛ kazhɛne kamene ɓəmə ganyɛ na?

⁹ Nahe ganyɛa ŋkɛ keza fəyitekeghə na? Kaghala ghala teɗema ghena ve kageze ɓəmə na?

¹⁰ Nahe Shala kezaghəyite zhɛ heli yitea gheɓəmə na? Va wənəa ŋkɛ nzanyɛ ŋkɛ kezhɛ heli yitea gheɓəmə na? Zhɛne mpi.

¹¹ Ma 'ya sha geze mbe ghəa ɗa: «Ma wəsə nya kezhɛ ɗa ne, nya ɗema Shala tehwə ghweme kazhɛne kamene kala nya vəashi.»

¹² Kazəzə wəshi nyi jama jama nyi menete na 'ya Mahwətə. Kaganda ne, kazəzə wəshi meŋelea ŋa nyi vəashi 'ya.

¹³ Kazəzə 'ya te pɛtɛa wəshi nyi menete na, kave mehele 'ya te slene ta ŋa nyi jama jama.

¹⁴ Shala yawe, nahe slene ta ŋa kenza tekeleke. Wa shala nya kenza wəbake kala Shala wa?

¹⁵ Gha Shala nya kemene wəsə meŋele ne, nahe na kencɛte nda berete ta ŋa ke pɛtɛa hwelefefi.

¹⁶ Laka berete ta ŋa ne, nahe na kembeɗeke mbelia ŋa, hwelefefia Zhakob ba'a ŋa Zhozɛf. Zhɛne mpi.

¹⁷ Shala yawe, nahe yɛmə kenakɛ ŋa, ma kwa nakɛ ŋa yɛmə ne, pa ghazlənə zhɛte nda, pa le ŋkwa nya kwa zeweve ta ndərə kagaŋkeɓe.

¹⁸ Nahe yɛ ləmbə kemakawa va, nahe va keberazlɛte berazlɛ ba'a kesleslate sla te yayata ŋkwa.

¹⁹ Mbe dzeghwa ta berazlɛ ta va ta ŋa ne, nahe yɛ slesla ta va kewaŋete ŋkwa nya te hɛɗi lema, nahe hɛɗi kegaŋkəɗəte geva ba'a kegərə gərəte geva.

²⁰ Nahe na keperawete hweŋkwa ta ŋa kwa ndərə, ŋkwa kedzeghwa ta ŋa kwa ŋkwəɗə, wəndə shɛ kenakɛ yɛ ŋkwa seɗa ta ŋa we.

²¹ Nahe na kencɛte nda hweŋkwa ke mbelia ŋa kala wəshi keseɗa laka dzeve ta Moyize ba'a ŋa Aron.