Cimə 73 - Ghena ta Shala

KWA MAHEKE TA PALEPA CIM 73–89 Meha ghwə kwa keɗaŋe

1 Cimə. Se va Asaf.

¹ Cimə. Se va Asaf. Kaganda ne, ganyɛke Shala kaŋa Israyɛl, kaŋa mbeli nyi nza wənəa nci wɛŋe.

² Ndagwara, mbasa 'ya keseraɗete geva, gəmə ne, takwa 'ya kateɗe.

³ Kwa nza ŋkɛ nahe zlɛ kese kazhɛ ɗa va ka ɗema Shala, kwa nakɛ jive mbe kema ta ka 'yaghwa mehele 'ya.

⁴ Kasa yaka hɛ pa te mte we, kedeke dekenji ba'a lɛŋe lɛŋe nza hɛ.

⁵ Kasa gəli hɛ kala kweci mbeli we, kenza ɗa te hɛ kala kweci mbeli we.

⁶ Kaseɗe ŋkele ntsə hɛ kala wəsə kepesa geva, kala lekwesa nya zlɛacɛ kənəa hɛ mene berete sha hɛ.

⁷ Kawələ wələ hɛ va merege, kanewe newe pɛtɛa wəshi nyi zəzə hɛ mbeli.

⁸ Kaŋ'wəshi ŋkwa hɛ, kageze ghena hɛ le zlɛ, kageze ghena ta sa nda yaka ke mbeli hɛ le berete.

⁹ Pa le ghweme ŋele mɛa nci, kageze ghena hɛ te pɛtɛa wəshi nyi te hɛɗi.

¹⁰ Vatse zhɛrave nda geva mbelia Shala ke hɛ, kala yɛmə kesa zhɛrete ghena ta nci hɛ.

¹¹ Ma ke hɛ sha geze: «Tsema nza Shala kaɗepete wa? Ɗepe wəsə ya shɛ va Shala tehwə ghweme na?»

¹² Tsetse nza ta ka 'yaghwa mehelea shɛhɛ: gwezlayɛ hɛ keveci keveci kezha tsene mcɛləa nci.

¹³ Kaganda ne, gəmə nza ɗa 'ya tiɗiɗi ba'a pɛmte dzeve ta ɗa 'ya kawəsə kencɛ menema fete.

¹⁴ Keveci keveci ɗa ɗa mbeli, kala kiɗi ta ŋkwa 'yɛ ɗa mbeli.

¹⁵ Ma ya nahe 'ya kegezete: «Katekele zəzə 'ya kala hɛ», a 'ya ne, nza nahe 'ya kepamte hwelefe ta ŋa.

¹⁶ Nahe 'ya kese kakele zəzə kezha fave wəsə nya se newe ta ŋkɛ dzawe sha 'ya.

¹⁷ Ma kwa dzembe ghɛa Shala 'ya ne, pa 'ya fave wəsə nya ketemene nda geva ke hɛ.

¹⁸ Kaganda ne, kateve hɛ na te ŋkwa keseraɗe ŋkwa kezha lə hɛ kahe kahe kadzete ŋkwa keza ŋkwa.

¹⁹ Kala metɛ ta ntsə ne, terayɛ nza hɛ, rayɛ sebe te hɛ, rɛɗɛ hɛ va ghazlənə.

²⁰ Shala, kateŋka pa ta nci na shave mbe meleme, kala wəsə nya te shiwə kefeɗeghe wəndə.

²¹ Vəa ŋkwa nya se wənəa ɗa kebeze beze, vəa ŋkwa nya zhɛte ɗa ghena ne,

²² kagezhi se 'ya, wəsə shɛ kefave 'ya mbe we, kala wəsə keseɗa se 'ya mbe kema ta ŋa.

²³ Kwa nza ŋkɛ le gha 'ya keveci keveci. Nahe na kehave ɗa dzeve kwa zeme,

²⁴ katebeghe ɗa na kala nya ɗe na, katekemaneve ɗa na le zləvə.

²⁵ Te hɛɗi ne, deke gha yamawe 'ya, pelɛ ghweme ne, wa wəndəa ɗa nya ketenza shɛ wa?

²⁶ Wərə geva ta ɗa ba'a wənəa ɗa kabezenyɛ, ama gha Shala ya kagela ta ɗa ba'a kawəsəa ɗa nya nza zləvə te kaghala ghala.

²⁷ Mpia nci yaza mbeli nyi kehendemte geva vare gha, kaza sebe na te mbeli nyi kewəfə ŋa.

²⁸ Ma ŋa ɗa zeɗe nza ne, nza vare Shala, nahe 'ya kewəfərə ɗa mbe Shala Mahwətə, kategeze pɛtɛa wəshi nyi menete na 'ya.