Cimə 7 - Ghena ta Shala

Ndeke ɗa nza tiɗiɗi Mahwətə

¹ Ŋgaɗe ta David. Ke Mahwətə ghate nda ŋkɛ te ghəa Kəwsh nya kwa yita ta Bɛnjamɛn.

² Shala Mahwətə yawe, gha ya kaŋkwa kewəfərə ta ɗa. Mbele ɗa ba'a ya ɗa va pɛtɛa ka ghweze mɛ hwa 'ya.

³ Ma keɗema ŋkɛ tsagha ne, katesleslekwe ɗa hɛ kala yɛ nivɛrə, katekesehwe ɗa hɛ kaɗema wəndə kembele ɗa shɛ.

⁴ Shala Mahwətə Yawe, ma kenza nde nahe 'ya kemenete wəsəa shɛ, kenza nde nahe dzeve ta ɗa kemenete fete nya dzawe,

⁵ kenza nde nahe 'ya kemenete nda wəsə kwa ndiremi ke wəndə nya kemenete ɗa ganyɛ, kenza nde nahe 'ya kefəhwe wəshia nde jaga ta ɗa gəmə ne,

⁶ hwɛ nde jaga ta ɗa kwa sebe ta ɗa ba'a kekave ɗa ŋkɛ, ŋkeɗeyi ɗa ŋkɛ teghweme te hɛɗi ba'a devələyi zləvəa ɗa ŋkɛ hwa keləwə! Zhɛne mpi

⁷ Mahwətə, sate te ŋkwa le wənə le wənə! Fɛake hwepe ta wənəa ka ghema ta ɗa. Nza le ntsə kənəa 'ya, gha nya kemene wəsə nya tiɗiɗi.

⁸ Tsenete geva hwelefefi yitea gha, ncɛte berete ta ŋa te hɛ sawa pelɛ ghweme.

⁹ Kameha ghwə Mahwətə te hwelefefi. Mahwətə, ndeke ɗa nza tiɗiɗi ba'a veyi ɗa kande menetema fete.

¹⁰ Fɛamte wəsə kwa ndiremi nya mene ka 'yaghwa mehele, ndeke nda berete ke wəndə nya tiɗiɗi, gha nya keɗepe mehele ba'a wənəa mbeli, gha nya kaShala nya tiɗiɗi.

¹¹ Shala ya kagelə nya keya ɗa, gheŋkɛ nya kembele mbeli nyi nza wənəa nci tiɗiɗi.

¹² Shala ya kande meha ghwə nya tiɗiɗi, Shala nya ghyana keveci keveci.

¹³ Ma keɗema wəndə kezhɛneke geva shɛ ne, kamɗɛ kafayɛa ŋkɛ ŋkɛ, kantsə rəgia ŋkɛ ŋkɛ ba'a kahi ŋkɛ.

¹⁴ Kahi wəshi kempa nyi kempə ŋkwa ŋkɛ, kandə ghwə ŋkɛ te yɛ have kezha ndə yɛ ŋkwa.

¹⁵ Kave zəzə ŋkɛ te wəsə kwa ndiremi, kanza zlɛ kwa hwəa ŋkɛ ba'a kaya tseŋwə ŋkɛ.

¹⁶ Kala ki nya lɛame ŋkɛ, kateɗe ŋkɛ kadzawa ki nya late ŋkɛ.

¹⁷ Kanza zlɛ nya se ŋkɛ kamene kwa ghəa ŋkɛ, kanza mene berete ta ŋkɛ kənəa ghəa ŋkɛ.

¹⁸ Katsa nda hana 'ya ke Mahwətə yitea tiɗiɗia ŋkɛ, katsahe sləa Mahwətə nya pelɛ ghweme 'ya.