Cimə 66 - Ghena ta Shala

Tsahe ta Shala nya kembele ŋkwa

1 Se va wəndə nya te ghəa cimə. Cimə.

¹ Se va wəndə nya te ghəa cimə. Cimə. Tsa nda mə gaghwe ke Shala, gheyɛ mbeli nyi te hɛɗi lema.

² Tsahe mə zləvəa sləa ŋkɛ, ve mə zləvə te laka tsahe ŋkɛ.

³ Ma pe yɛ sha Shala: «Dzawe dzawe wəshi nyi mene na. Va wəba ta berete ta ŋa ne, katsahe ŋa ka jaga ta ŋa.

⁴ Pɛtɛa mbeli nyi te hɛɗi kagwəɗəŋə mbe kema ta ŋa, kagha ŋa cimə hɛ, katsahe sləa ŋa hɛ.» Zhɛne mpi.

⁵ Se mə kanewe slene nyi menete Shala gi! Ghazlənə yave nda wəshi meŋelea ŋkɛ ke mbeli.

⁶ Nahe ŋkɛ kezhɛrete ndərə kahɛɗi nya keghwele ghwele, nahe mbeli kejivenji te hələ le seɗa. Tagha gɛ, nahe n'yɛ kese kazlama te slene ta ŋkɛ.

⁷ Meghe nya kaghala ghala ŋkɛ laka berete ta ŋkɛ, kave ntsə ŋkɛ te hwelefefi. Ɗema ka fama ghena sate te ŋkwa gɛ! Zhɛne mpi.

⁸ Gheyɛ hwelefefi, tsahe mə Shala ta n'yɛ, tsahe mə ŋkɛ le berete.

⁹ Kave ɓəmə mpi ŋkɛ, kaya seɗa ta ɓəmə va tehene.

¹⁰ Shala yawe, nahe na kedzeghakɛ nza ta n'yɛ, nahe na kedzeghakɛ ŋkɛ kala nya dzeghe mze kwa tɛawetɛa mbeli kwa ghwə.

¹¹ Nahe na kekeleghe n'yɛ kalə kadzete keleŋa, nahe na kesahwe n'yɛ yaka.

¹² Nahe na kesərəakɛ ka zleɗe gədəwəa lɛmə kaŋkeɗe n'yɛ. Nahe n'yɛ kedzembe n'yɛ mbe ghwə ba'a mbe yɛmə, ama nahe na kefəakave n'yɛ kezha zhɛne mpi.

¹³ Katedzembe ghɛa ŋa 'ya le yɛ melɛ kwa tere tere. Kateyipə wəshi nyi meɗeyi ŋa 'ya 'ya kwa.

¹⁴ Nahe mɛa ɗa kemeɗeyi hɛ vəa ŋkwa nya nza 'ya mbe yaka.

¹⁵ Katedzeghe ŋa melɛ kwa tere tere 'ya le wəshi keseɗa nyi dɛɓedɛa dɛɓedɛa ba'a gamea lɛmə. Katedzeghe ŋa melɛ 'ya le mcɛmcɛli ba'a zhɛfa lɛmə. Katedzeme n'yia nci hwa'a pelɛagha sha gha. Zhɛne mpi.

¹⁶ Se mə, gheyɛ pɛtɛa mbeli nyi kehawe va Shala, katefa ɗa yɛ kaɓela wəsə nya menete ŋkɛ kaŋa ɗa.

¹⁷ Nahe 'ya kese katsa nda lewela ba'a nahe 'ya kese katsahe ŋkɛ.

¹⁸ Ma ya wəsə kwa ndiremi ya kwa wənəa ɗa ne, nza katefate səkwə ta ɗa Shala we.

¹⁹ Ama nahe Shala kefate ɗa ŋa ɗa, nahe ŋkɛ keveyite sleme yitea səkwə ta ɗa.

²⁰ Hana 'ya sha Shala deŋwa! Kese ŋkɛ kafama səkwə ta ɗa we, kese ŋkɛ kandaŋe ɗa te ɗe ta ŋkɛ we.