Cimə 61 - Ghena ta Shala

Mbe ghɛa ŋa teɗe 'ya kanza keveci keveci

¹ Se va wəndə nya te ghəa cimə. Yitea wəshi ketsa nyi nza zewe te. Ciməa David.

² Shala yawe, fa lewela ta ɗa, ve sleme yitea səkwə ta ɗa.

³ Se te mendɛkwe ta hɛɗi ne, katsa ŋa lewela 'ya te vəa nya nza 'ya keyirə yirə. Keleghe ɗa kadzeme gela nya ɗema 'ya kadzeme ɗa.

⁴ Kwa nza ŋkɛ gha ya kaŋkwa kewəfərə ta ɗa, kaghɛ nya biya nya berete va nde jaga.

⁵ Mbe ghɛa ŋa teɗe 'ya kanza keveci keveci kezha wəfərə 'ya mbeyitere bidzəa ŋa. Zhɛne mpi.

⁶ Gha Shala nde fa wəshi nyi mawe 'ya, kave nda wəshi nyi ɗe hɛ na ke ka hawe va gha.

⁷ Ndeke temə teghweme ke meghe, nza yɛ va ta ŋkɛ keshi keshi.

⁸ Nza ŋkɛ kameghe kwa kema ta ŋa kaghala ghala. Ya ŋkɛ ɗe ta ŋa ba'a ganyɛa ŋa.

⁹ Tagha gɛ, kategha ŋa cimə 'ya kevə kevə, kateyipə meɗe mɛa ɗa 'ya keveci keveci.