Cimə 59 - Ghena ta Shala

Shala ta ɗa, mbele ɗa va ka jaga ta ɗa

¹ Se va wəndə nya te ghəa cimə. Cimə nya gha mbeli kala «Zama sebe na ma.» Ciməa David. Vəa ŋkwa nya ghweneghe mbeli Sawəl kaya ghɛ kezha pesle ŋkɛ.

² Shala ta ɗa, mbele ɗa va ka jaga ta ɗa, ya ɗa va mbeli nyi kaha ɗa mpa.

³ Mbele ɗa va ka mene wəshi nyi ndiremi ndiremi, ya ɗa va ka mpə ŋkwa.

⁴ Newema vəkwə yaŋsle ɗa hɛ, geva yatsene mbeli nyi berete berete yitea 'ya. Ndagwara kemenete wəsə kwa ndiremi 'ya we, Mahwətə, fete shɛ kemenete 'ya we.

⁵ Kebezemte ghena 'ya we, ama hwɛ yahwɛ hɛ kase kahi geva yitea 'ya. Feɗeghe ŋa gɛ! Se sha 'ya shɛ na neweve gɛ.

⁶ Ma gha Shala Mahwətə nde berete, Shala ta Israyɛl gɛ ne, feɗeghe ŋa kezha ɗa pɛtɛa hwelefefia shɛhɛ. Zhɛma heli na yitea pɛtɛa ka pamte ŋkwa shɛhɛ ma. Zhɛne mpi.

⁷ Ma hetɛhwɛɗi ne, kazhɛne geva hɛ kase kala kelɛa keti nyi kembɛhwɛ, kadzasle meleme hɛ.

⁸ Mpɛafe ghena nyi ndiremi ndiremi kwa mɛ va hɛ, kala yɛ kafayɛ ɗa ŋkwa ghena ta nci. Ma ke hɛ sha geze: «Wa nde tefa ghena ta ɓəmə wa?»

⁹ Ama gha Mahwətə gɛ ne, ŋ'wəshi nde zhɛ ŋa va hɛ, yiɗə yayiɗə pɛtɛa hwelefefia shɛhɛ na.

¹⁰ Gha ya kaberete ta ɗa, te gha ve ntsə 'ya. Shala yawe, gha ya kaŋkwa kewəfərə ta ɗa.

¹¹ Kase Shala ta ɗa nya ganyɛa mehele sha 'ya, katencɛ ɗa ka ghema ta ɗa nyi keŋzle ɗa vəkwə ŋkɛ.

¹² Mpəma hɛ na, yagha hwelefe ta ɗa kazaghəyite ma. Mahwətə nya kageləa n'yɛ, gagəzəte hɛ le berete ba'a betate hɛ te hɛɗi gi ga!

¹³ Ghwenemtema ta nci ke mɛ ne, ghena nyi ndiremi ndiremi yageze hɛ. Teɗemte hɛ kele ghəa ta nci, ghenci nyi kebebezla ŋkwa ba'a nyi keslesla tseŋwə gɛ!

¹⁴ Zamte sebe te hɛ le wənə le wənə, zamte sebe te hɛ kezha ɗema kazhɛne kanza. Tagha gɛ, kateɗepe mbeli hwa'a te mendɛkwe ta hɛɗi Shala ya kande sleke Israyɛl. Zhɛne mpi.

¹⁵ Ma hetɛhwɛɗi ne, kazhɛne geva hɛ kase kala kelɛa keti nyi kembɛhwɛ. Kadzasle meleme hɛ.

¹⁶ Gaŋe yagaŋe hɛ kezha wəsə kezeme. Ma kebehema hɛ ne, kambɛhwɛ hɛ.

¹⁷ Ma 'ya le ŋa ɗa ne, berete ta ŋa yatsahe 'ya. Ma masheke ne, ganyɛa ŋa yagha 'ya, kwa nza ŋkɛ gha ya kaŋkwa kewəfərə ta ɗa, kaŋkwa kewəfərə nya te vəa ndiremi.

¹⁸ Gha nya kaberete ta ɗa ne, kategha ŋa cimə 'ya. Shala ya kaŋkwa kewəfərə ta ɗa, Shala nya ganyɛa mehele laka 'ya.