Cimə 58 - Ghena ta Shala

Shala nya kemeha ghwə ya shɛ te hɛɗi

¹ Se va wəndə nya te ghəa cimə. Cimə nya gha mbeli kala «Zama sebe na ma.» Ciməa David.

² Kaganda ne, vəa ŋkwa nya nza yɛ divə meha ghwə nya tiɗiɗi yɛ na? Gheyɛ mbeli, ghwə nya tiɗiɗi yameha yɛ te mbeli na?

³ Ewə! Le ɗe ta ŋayɛ mene wəsə nya kehitema geva yɛ. Berete yamene yɛ le ghəa ŋayɛ te hɛɗi.

⁴ Yama ta nci nza ka 'yaghwa mehele kaka beze beze, Sawama ta nci kwa hwə nza ka tseŋwəa kɛfi kaka za za.

⁵ Kala ghwɛa mentsape ghwɛa nci, kazhiɓə sleme ta nci hɛ kala shishi

⁶ nya keɗema kafa ŋwələa nde gweɗakwe shishi le ghwɛ, ya ŋa nde ɗepemte mene ghwɛ.

⁷ Shala, tsetsakawa slene kwa mɛ va hɛ. Mahwətə, ntenteɗakame zhigala kwa nivɛrəa shɛhɛ.

⁸ Zanji sebe te hɛ kala yɛmə nya kehasenyɛ! Nza yɛ have ta nci kagavelɛaŋe!

⁹ Nza hɛ kala ghwerezlɛa nya keyirəwə ndɛghwɛɗɛ kenza nde kadzeghwa! Ɗema hɛ kanakɛ veci kala bereɗe ta wəzege!

¹⁰ Fəmte ka ndiremia mehelea shɛhɛ sefə nya wəba nda teta wəsə nya kwa dəghwəa ŋayɛ.

¹¹ Katezlama wəndə nya tiɗiɗi va nya tenakɛ ɗa nya te ndiremia mehele ŋkɛ. Katepɛ yɛ seɗa ta ŋkɛ ŋkɛ dzeyi hwa mimia ka 'yaghwa mehele.

¹² Tagha gɛ, ma ke mbeli sha tegeze: «Kaganda ne, katekemave zhɛme wəndə nya tiɗiɗi, kaganda ne, Shala kameha ghwə ya shɛ te hɛɗi.»