Cimə 57 - Ghena ta Shala

Kasəkwə Shala tehwə ghweme 'ya

¹ Se va wəndə nya te ghəa cimə. Cimə nya gha mbeli kala «Zama sebe na ma.» Ciməa David. Vəa ŋkwa nya hwɛnyɛ ŋkɛ kadzembe zlera va Sawəl.

² Zhɛ heli yitea 'ya Shala yawe, zhɛ heli yitea 'ya, kwa nza ŋkɛ gha ŋa ɗa ŋkwa kewəfərə. Kawəfərə 'ya yitea shenaŋkwe ta bidzəa ŋa pa te və nya tekiɗinyɛ ndiremi.

³ Katsa lewela 'ya ke Shala tehwə ghweme, ke Shala nya ketemene ɗa yayata wəsə.

⁴ Ghwenave ɗa mbele ŋkɛ sawa pelɛ ghweme, vate hawe ŋkɛ te wəndə nya kekeka ɗa. Zhɛne mpi. Ghweneke ɗa ganyɛa ŋkɛ ba'a kaganda ta ŋkɛ Shala.

⁵ Hwa yɛ nivɛrə 'ya, meɓelahe 'ya hwa wəshi nyi kempeɗe mbeli. Kala yɛ megha ba'a kala yɛ have yɛ slene ta nci. Kala kafayɛ nya nɛme nɛme ghɛnia nci.

⁶ Shala yawe, ncɛte kwelea ŋa kənəa ghweme. Ɓele zləvəa ŋa te hɛɗi lema.

⁷ Nahe hɛ keŋate keleŋa kwa hweŋkwa ta ɗa, takwa takwa 'ya kateteɗe kadzete. Nahe hɛ kelate ki mbe kema ta ɗa, nahe hɛ kebetenji kadzawa. Zhɛne mpi.

⁸ Shala yawe, gweɗakwe wənəa ɗa, kaganda nza wənəa ɗa gweɗakwe. 'Ya kategha cimə, 'ya katetsahe ŋa.

⁹ Zləvəa ɗa, feɗeghe ŋa, gagera ba'a getsepele, feɗeghe mə, 'ya katefeɗeghe kiɗi ta ŋkwa.

¹⁰ Mahwətə, katetsa ŋa hana 'ya hwa mbeli, katetsahe ŋa hwa hwelefefi.

¹¹ Kwa nza ŋkɛ pa pelɛ ghweme dzeme ganyɛa ŋa, pa pelɛagha te ləmbə ntsehe kaganda ta ŋa.

¹² Shala, ncɛte kwelea ŋa pelɛ ghweme. Ɓele zləvəa ŋa te hɛɗi lema.