Cimə 55 - Ghena ta Shala

Səkwə ghə ta wəndə nya pamte mbeli

¹ Se va wəndə nya te ghəa cimə. Yitea wəshi ketsa nyi nza zewe te. Ciməa David.

² Shala yawe, ve sleme yitea səkwə ta ɗa. Wəfərəma na te və nya mpi ŋa dzeve 'ya ma.

³ Fa ghena ta ɗa ba'a zhɛnete ɗa. Ketaze taze mehele ta ɗa, ghə yaŋgaɗe 'ya ba'a keɗepe ghena nya geze 'ya 'ya we.

⁴ Kwa nza ŋkɛ lewela yatsa nde jaga ta ɗa yitea 'ya, ŋele yaŋele ɗa nde 'yaghwa mehele. Ndiremi yave hɛ kadzete 'ya ba'a le wənə le wənə ha ɗa mpa hɛ.

⁵ Kaslesla heli kwa hwə va 'ya, ghazlənə kemte ya te 'ya.

⁶ Ghazlənə nde zhɛ ɗa, bare bare yabare bare 'ya, nahe 'ya kemte ɗa va ghazlənə.

⁷ Tagha gɛ ma 'ya gezete: «Amaga! Wa ndeke ɗa bidzə kala gheɗepe yitea zlə ɗa 'ya ba'a yitea me ɗa 'ya te kwete ŋkwa tse wa?

⁸ Katehwɛ ɗa 'ya cakeɗake, katelə 'ya kanza te ɓerama. Zhɛne mpi.

⁹ Nza kateŋ'we ŋkwa kewəfərə 'ya kahe kahe va sefə nya wəba, va va nya wəba.»

¹⁰ Shala yawe, yirəmte ghena ta ka ghema ta ɗa, nza ghena ta nci keghə keghə. Kwa nza ŋkɛ nahe 'ya kenakɛ mene berete ba'a ghəpə mbe meleme.

¹¹ Veci le viɗi dzasle zlia ŋkɛ hɛ, Ma mbe meleme ne, ndiremi ba'a yaka ya shɛ.

¹² Ma mbe meleme ne, ŋkwa yampə mbeli. Kakiɗi mene berete ba'a mbəɗəkwə te yɛ ŋkwa kebeke we.

¹³ Kenza kande jaga ta ɗa nde keŋele ɗa we, ma nda tsagha ŋkɛ ne, nza katesəwəte 'ya. Kenza kande ghema ta ɗa nde hərə ɗa we, ma nda tsagha ŋkɛ ne, nza katewəfərə ɗa 'ya ve.

¹⁴ Ama gha ya kawəndə nya kala 'ya, kamcɛ ɗa ba'a kawəndə nya seneve 'ya.

¹⁵ Kanya kwetɛŋe se mə kageze ghena ganji, zlaɓe se mə kadzeghwa mbe ghɛa Shala.

¹⁶ Dzeghə ka jaga ta ɗa mte gi ga! Dzawa ghɛa mbelia kwahɛɗi hɛ le ntsə, kwa nza ŋkɛ 'yaghwake ghwake mehele ta nci.

¹⁷ Ma 'ya ne, Shala yatsa nda lewela 'ya, tagha gɛ, katembele ɗa Mahwətə.

¹⁸ Masheke, kwa ghə veci ba'a hetɛhwɛɗi ne, kaŋələvə 'ya ba'a kaŋgaɗe ghə 'ya. Tagha gɛ, pa fate lewela ta ɗa,

¹⁹ pa ŋkɛ ndeke ɗa kwelɛŋe, pa yate ɗa mbe mpa nya se 'ya kampa le ka jaga ta ɗa nyi kwele kwele.

²⁰ Katefa Shala ba'a kateshifə hɛ ŋkɛ, gheŋkɛ nya pelɛ pasla se te vəashi. Zhɛne mpi. Katezhɛre hɛ we, kahawe hɛ va Shala we.

²¹ Nahe nde pamte ŋkwa kekafete dzeve yitea ka mcɛhɛnyɛ, nahe ŋkɛ kedzawanyɛ wəmbə jikə geva ta ŋkɛ.

²² Ghɛni ma ghena ta ŋkɛ ke yɛməa mze, ama mpa yazəzə wənəa ŋkɛ. Ganyɛ ma ghena nyi geze ŋkɛ ke n'yi, ama kala kafayɛ nzere ŋkwa hɛ.

²³ Veyi nda wəsə nya ɗaŋeɗa ta ŋa kwa ghə ke Mahwətə, kateve ŋa berete ŋkɛ. Kasərə wəndə nya tiɗiɗi ŋkɛ kaseraɗe tɛape we.

²⁴ Ama gha gɛ Shala yawe, katebete mbelia shɛhɛ na kwa kwele. Ka mpə ŋkwa ba'a ka mbəɗəkwə hɛ, katekekave tepe ta temə ta nci teghweme hɛ we. Ama 'ya ne, kave ŋa ghəa ɗa 'ya.