Cimə 50 - Ghena ta Shala

Katenca Shala kezha meha ghwə

1 Ciməa Asaf.

¹ Ciməa Asaf. Nahe Shala Mahwətə nde berete kegezete ghena. Nahe ŋkɛ kehekake pɛtɛa mbeli nyi te hɛɗi, se te ŋkwa nya same veci pa te nya pəkwə ŋkɛ.

² Kaɓele waŋea Shala mbe Siyon, meleme nya ganyɛ.

³ Se yase Shala ta ɓəmə, kanza ŋkɛ divə we. Ghwə nya ketere ŋkwa ya mbe kema ta ŋkɛ, sefə nya wəba ya dzeyi yite.

⁴ Kaheka ghweme ba'a hɛɗi Mahwətə kezha meha ghwə te mbelia ŋkɛ.

⁵ Ma ke: «Tsenete mə mbelia ɗa, mbeli nyi kemenete jikə geva le 'ya laka melɛ.»

⁶ Kategeze tiɗiɗia ŋkɛ ghweme, kwa nza ŋkɛ Shala ya kande meha ghwə. Zhɛne mpi.

⁷ Hwelefe ta ɗa, fa, 'ya kategeze ŋa ghena. Israyɛl, 'ya kategeze ghena te gha. 'Ya ya kaShala nya kaShala ta ŋa.

⁸ Tewəmbəreke yɛ melɛa ŋa ve ŋa fete 'ya we, kevə kevə dzeghe ɗa yɛ melɛ kwa tere tere na.

⁹ Katekele mca 'ya shave ki ghɛa ŋa, ya zhɛfa lɛmə same kwa yɛ zlema ta ŋa we.

¹⁰ Kwa nza ŋkɛ ŋa ɗa wəshi keseɗa pɛtɛ nyi hwa gamba ba'a wəshi keseɗa nyi kwele kwele hwa ghweme.

¹¹ Nahe 'ya keɗepe pɛtɛa 'yɛ nyi hwa ghweme, ŋa ɗa wəshi keseɗa pɛtɛ nyi hwa gamba.

¹² Ma kezhɛte ɗa ma ne, kategeze ŋa 'ya we, kwa nza ŋkɛ ne, ŋa ɗa hɛɗi lema ba'a wəshi nyi te.

¹³ Katezeme slia mcɛmcɛli 'ya na? Katesa mimia zhɛfa lɛmə 'ya na?

¹⁴ Te ŋkwa melɛ ne, tsahe ɗa, 'ya Shala ta ŋa, menete wəsə nya meɗeyi ɗa na, 'ya Shala tehwə ghweme.

¹⁵ Tsa ɗa lewela te vəa yaka, katembele ŋa 'ya ba'a kateve zləvə na te 'ya.

¹⁶ Ama ma ke nde 'yaghwa mehele ne, ma ke Shala: Yitea ɓela wəshi mahalegəa ɗa na ba'a nza jikə geva ta ɗa te mɛ va gha,

¹⁷ gha nya keɗema ŋele ba'a nya kenegha ghena nyi geze 'ya wa?

¹⁸ Ma kenakɛ ghərə na, nda dzawa hweŋkwa ta ŋkɛ na ne, hwa ka mene vale tahe tenza na.

¹⁹ Ghena nyi ndiremi ndiremi yageze na, tseŋwə yasla mɛa ŋa.

²⁰ Kantishɛ na kezha geze ghena te menə ŋa, kageze ghena kwa ndiremi na te wəza meyɛ ŋa.

²¹ Nya ya kawəsə nya menete na. Katenza ɗa 'ya divə ɗa na? Ma zəzə na ne, kala gha 'ya na? Kateve ŋa fete 'ya, katepelaŋe hɛ 'ya pɛtɛ te ntsə ta ŋa.

²² Fave mə wəshi nyi, gheyɛ mbeli nyi kezaghə Shala. Ma keɗema nde tsagha ne, kateslekwe ŋayɛ 'ya. Tagha, wəndə shɛ katembele ŋayɛ we.

²³ Ma wəndə nya ketsahe ɗa te zhia melɛ ne, zləvə yave ŋkɛ te 'ya. Ma wəndə nya keya dzeghwa ta ŋkɛ ne, katencɛ nda 'ya, 'ya ya kande mbele ŋkɛ.