Cimə 47 - Ghena ta Shala

Tsahe mə Mahwətə, meghe nya wəba

¹ Se va wəndə nya te ghəa cimə. Ciməa ŋwalea Korɛ.

² Gheyɛ mbeli pɛtɛ, mpi mə dzeve, tsahe mə Shala le gaghwe ba'a yɛyi,

³ Kwa nza nde ghyanake Mahwətə, Shala tehwə ghweme, gheŋkɛ ya kameghe nya wəba te hɛɗi lema.

⁴ Kave hwelefefi ŋkɛ mbe dzeve ta ɓəmə, kave yɛ hɛɗi ŋkɛ mbe hwə seɗa ta ɓəmə.

⁵ Gheŋkɛ nde ntave ɓəmə hɛɗi kaŋa ɓəmə. Kagwəfə ghə ta Zhakob nya ɗehwe ŋkɛ. Zhɛne mpi.

⁶ Kadzeme Siyon Shala te tepe ta gaghwe, kadzeghwa Mahwətə yitea vɛ ta tereme.

⁷ Gha nda mə cimə ke Shala, gha mə cimə, gha nda mə cimə ke meghea ɓəmə, gha mə cimə!

⁸ Kwa nza ŋkɛ ne, Shala ya kameghea hɛɗi lema. Gha nda mə cimə nya zeɗe ma.

⁹ Shala ya kameghea hwelefefi. Mentishɛ Shala pelɛ pasla ta ŋkɛ nya keveyi geva tekeleke.

¹⁰ Nahe mbeli nyi te ghəa hwelefefi ketsenete geva: ghenci ya kambelia Shala ta Abraham. Kwa nza ŋkɛ ŋa Shala mbeli nyi te ghə te hɛɗi, gheŋkɛ ya te ghəa wəshi pɛtɛ.