Cimə 38 - Ghena ta Shala

Səkwə ta nde zereghwe nya keɗepete fete ta ŋkɛ

¹ Ciməa David, kezha zəzə ŋkɛ Shala.

² Mahwətə, ɗa ɗa ma na le wənə le wənə ma, 'yɛ ɗa ma na mbe beze ta wənəa ŋa ma.

³ Nahe yɛ have ta ŋa kemenji te 'ya, nahe dzeve ta ŋa keneghate ɗa te ŋkwa.

⁴ Pɛtɛ geva ta ɗa kazhɛ ɗa va hwepe ta wənəa ŋa, lɛŋelɛ shɛ mbe yɛ 'yɛ'yɛa ɗa va jaɗafa ta ɗa we.

⁵ Dzemedze ma ke ghəa fete nyi menete 'ya, ɗaŋe ɗaŋe hɛ kənəa 'ya kala wəsə nya ɗaŋeɗa fate fate.

⁶ Ndiremike mike zəŋwə zhia ɗa nyi nza leɓe mbe, gheŋkɛ ya kazhɛme nya mbe gezhia ɗa.

⁷ Nahe 'ya keŋa ɗa, kedene dene 'ya, keveci keveci nza 'ya le kema teheɗe.

⁸ Kwa nza ŋkɛ ne, dzawe dzawe zhɛ ɗa dəŋəa ɗa, bela ta geva ta ɗa shɛ kazhɛ ɗa ma we.

⁹ Mba berete mbe 'ya we, nahe 'ya kedene ɗa, ŋələvə yaŋələvə 'ya va beze ta wənəa ɗa.

¹⁰ Mahwətə, pɛtɛ wəshi nyi mawe 'ya kwa kema ta ŋa, kewəfərəakɛ geva ŋələvə ta ɗa va gha we.

¹¹ Sla yasla helia ɗa, nahe berete keslənyɛ mbe 'ya, mba ntsə ta ɗa kanakɛ ŋkwa we.

¹² Cakeɗake nza ka mcɛhɛ ɗa ba'a ka ghedəkwəa ɗa va zhi nyi te 'ya, pelɛ ŋwela nza ka menəhɛ ɗa.

¹³ Keleŋa yaŋa ɗa mbeli nyi keɗe mte ta ɗa, za ta ɗa yageze mbeli nyi kezele ve ndiremi te 'ya. Bepepe pe vəghwə hɛ kasla tseŋwə te 'ya.

¹⁴ Ama 'ya ne, kala mədəŋə nya keɗema kafa ghena 'ya, kala ɓeɓə nya keshɛma ŋsle ghena 'ya.

¹⁵ Kala wəndə nya keɗema kafa ghena ba'a nya keshɛma zhɛne ghena 'ya.

¹⁶ Mahwətə, te gha ve ghə 'ya. Shala Mahwətə yawe, katezhɛne ɗa na.

¹⁷ Kwa nza ŋkɛ ma 'ya gezete: «Ma vəa ŋkwa nya seraɗe seɗa ta ɗa ne, ɗema hɛ kezlama yitea 'ya, ɗema hɛ kele zləvə te 'ya.»

¹⁸ Kaganda ne, takwa takwa 'ya kateɗe, kakiɗi yaka nya te 'ya we.

¹⁹ Kwa nza ŋkɛ ne, 'ya kancɛ fete ta ɗa, keyirə yirə 'ya va jaɗafa ta ɗa.

²⁰ Kelɛŋelɛa lɛŋelɛanji ba'a keberete beretenji ka jaga ta ɗa. Kwele kwele mbeli nyi keɗema ntsə ta ɗa gəmə gəmə.

²¹ Wəsə kwa ndiremi yamene ɗa hɛ te ŋkwa wəsə ganyɛ, 'ya yaŋele hɛ va nya mene ganyɛ 'ya.

²² Mahwətə, wəfəyite ɗa ma na ma. Shala ta ɗa, nzama na cakeɗake le 'ya ma.

²³ Se kahe kahe kakemane ɗa, gha nya kaMahwətə nya kande mbele ɗa.