Cimə 37 - Ghena ta Shala

Zlɛma na va jive mbe kema ta ka 'yaghwa mehele ma

1 Ciməa David.

¹ Ciməa David. Hwepema wənə na va ka 'yaghwa mehele ma, zlɛma na va ka mene wəshi nyi ndiremi ndiremi ma.

² Kwa nza ŋkɛ kahe kahe teghwelenji hɛ kala gwəzə, katekwesamenji hɛ kala sleke nyi menjaɓa.

³ Ve ghə te Mahwətə ba'a mene wəsə ganyɛ. Tagha gɛ, katenza na gwezlayɛ te hɛɗi.

⁴ Nza fare fare mbe Mahwətə, kateve ŋa wəsə nya ɗe wənəa ŋa ŋkɛ.

⁵ Ndeke nda mpia ŋa ke Mahwətə, ndeke nda ghəa ŋa. Tagha gɛ, katemene slene ta ŋkɛ ŋkɛ.

⁶ Katencɛ tiɗiɗia ŋa ŋkɛ kala waŋe ta ŋkwa masheke ba'a kaganda ta ŋa kala veci nya talala kwa ghə.

⁷ Nza divə mbe kema ta Mahwətə, ndeke nda ghəa ŋa. Bezema wənəa na va wəndə nya kejive mbe kema, va wəndə nya kemene wəshi nyi ndiremi ndiremi ma.

⁸ Sərəakɛ hwepe wənə, bezema wənəa ŋa ma. Bezema wənə na ma, wəsə kwa ndiremi tenza ŋkɛ.

⁹ Kwa nza ŋkɛ ne, kateza sebe ta ka 'yaghwa mehele, ama katenza hɛɗi kaŋa mbeli nyi keve ghə te Mahwətə.

¹⁰ Temə vireɗi ne, katezamte geva nde 'yaghwa mehele. Katezele ŋkwa nya se ŋkɛ te na ne, ama wəndə shɛ katesləyi na we.

¹¹ Ama katenza hɛɗi kaŋa ka dewə ŋeli, katefa deme hɛ te kwelɛŋe nya wəba.

¹² Wəshi nyi ndiremi yazəzə nde 'yaghwa mehele te wəndə nya tiɗiɗi. Kanca slene ŋkɛ yite.

¹³ Ama ntake Mahwətə kaŋ'wəshi ŋkɛ, kwa nakɛ ŋkɛ takwa takwa vecia ŋkɛ.

¹⁴ Kanteɗe kafayɛ ka 'yaghwa mehele, kapenake rəgi hɛ kezha he nde titikwə ba'a nde dewə ŋeli, kezha mpə mbeli nyi kedzeghwa tiɗiɗi.

¹⁵ Kadzembe wənəa nci ten'yi geva kafayɛa nci, kateɓelenji rəgia nci.

¹⁶ Ganyɛ ma wəsə nya ɓɛhwɛ va wəndə nya tiɗiɗi ke mcɛləa pɛtɛa ka 'yaghwa mehele.

¹⁷ Kwa nza ŋkɛ kateŋslenji berete ta ka 'yaghwa mehele, ama katetawe mbeli nyi tiɗiɗi Mahwətə.

¹⁸ Nahe Mahwətə keɗepe hɛa mbeli nyi tiɗiɗi, katenza hɛɗi kaŋa nci kaghala ghala.

¹⁹ Katezhɛ nda hawe ke hɛ te vəa ndiremi we, behe behe tenza hɛ te vəa ma.

²⁰ Ama kateza sebe te ka 'yaghwa mehele, katempə ka jaga ta Mahwətə kala gwəzə nyi kwamte. Kateslənji hɛ, kateslənji hɛ kala n'yia ghwə.

²¹ Kakele dewa nde 'yaghwa mehele kaɗema kaŋki, ama kazhɛ heli wəndə nya tiɗiɗi ba'a kavele ŋkɛ.

²² Katenza hɛɗi kaŋa mbeli nyi wəpi ŋkɛ, ama kateza sebe te mbeli nyi bezla ŋkɛ.

²³ Ma kezeɗehwe nda dzeghwa ta wəndə ke Mahwətə ne, kave nda nza le gezleŋema ghə ke wəndəa shɛ.

²⁴ Ya tehene tsakɛ ŋkɛ ne, kateɗe ŋkɛ we, kwa nza ŋkɛ kakese ŋkɛ Mahwətə te dzeve.

²⁵ Nahe 'ya kese kamempɛhweta, kehale hale 'ya tsetsenya. Ama kegha 'ya kanakɛ wəndə nya tiɗiɗi nya kewəfəyite geva, ya hwelefefia ŋkɛ nyi kesəkwə wəsə kezeme ta nci we.

²⁶ Keveci keveci ne, kazhɛ heli ŋkɛ, kave nda dewa ŋkɛ ke mbeli. Kawəpi tenza hwelefefia ŋkɛ.

²⁷ Ya ghəa ŋa va wəsə kwa ndiremi ba'a mene wəsə nya ganyɛ. Tsagha ne, katenza te hɛɗi nya kaghala ghala.

²⁸ Kwa nza ŋkɛ ne, wəsə nya tiɗiɗi yaɗe Mahwətə, kawəfə mbelia ŋkɛ ŋkɛ we. Kaya hɛ ŋkɛ keveci keveci, ama kateza sebe ŋkɛ te hwelefefia ka 'yaghwa mehele.

²⁹ Katenza hɛɗi kaŋa mbeli nyi tiɗiɗi, katenza hɛ te kaghala ghala.

³⁰ Ghena ntsehwele yageze mɛa wəndə nya tiɗiɗi, ghena nya tiɗiɗi nde sawa te ghɛnia ŋkɛ.

³¹ Wəsə mahalegəa Shala ta ŋkɛ ya kwa wənəa ŋkɛ, katsa ŋkɛ tehene mbe dzeghwa ta ŋkɛ we.

³² Kawəmbɛne wəndə nya tiɗiɗi nde 'yaghwa mehele, kasepa ŋkɛ kapesle ŋkɛ.

³³ Ama kawəfə ŋkɛ Mahwətə mbe dzeve ta ŋkɛ we. Kasərə ŋkɛ kave ghena te kenza ŋkɛ te ghwə we.

³⁴ Ndeke nda ghəa ŋa ke Mahwətə, zele hweŋkwa ta ŋkɛ. Kateve ŋa kwele ŋkɛ kezha nza hɛɗi kaŋa ŋa ba'a katenewe ka 'yaghwa mehele na keza za.

³⁵ Nahe 'ya kenakɛ nde 'yaghwa mehele kazhɛre kande ghwərə ghwərəa ntsə ba'a kapesle dzeve kala wəfe nya gwəzləmə.

³⁶ Ama nahe ŋkɛ keslənyɛ, mba ŋkɛ we. Nahe 'ya kese kasepa ŋkɛ, ama kesləyi ŋkɛ 'ya we.

³⁷ Neweve wəndə nya nza kaganda ve, mareve wəndə nya tiɗiɗi: Zeɗe nza ya shɛ kaŋa wəndə nya keɗe ghena ta kwelɛŋe.

³⁸ Ama kanya kwetɛŋe tezamte geva sebe te ka fama ghena, zeɗe nza shɛ kaŋa ka 'yaghwa mehele we.

³⁹ Va Mahwətə se mbele ta mbeli nyi tiɗiɗi, gheŋkɛ ya kaŋkwa kewəfərə ta nci te vəa ndiremi.

⁴⁰ Kakemane hɛ Mahwətə ba'a kawəfərə hɛ ŋkɛ. Kawəfərə hɛ ŋkɛ va ka 'yaghwa mehele ba'a kambele hɛ ŋkɛ, kwa nza ŋkɛ gheŋkɛ ya kaŋkwa kewəfərə ta nci.