Cimə 34 - Ghena ta Shala

Mahwətə nde kele ɗa shave mbe ghazlənə

¹ Ciməa David. Ma kwa kema ta Abimɛlɛk, pa David zhɛrete ghəa ŋkɛ kala gezhi. Tagha gɛ, pa Abimɛlɛk ŋkamte ŋkɛ. Ma kwa slənyɛ David ne, ma ke:

² Katetsa nda hana 'ya ke Mahwətə te yayata və, katefɛa mɛa ɗa yitea tsahe ŋkɛ we!

³ Mahwətə ya kafarefa ta ɗa. Gheyɛ ka dewə ŋeli, zlama mə va nya fa yɛ katsahe ŋkɛ 'ya.

⁴ Tsahe mə kwelea Mahwətə zlaɓe le 'ya, ve ɓəmə zləvə te sləa ŋkɛ kanya kwetɛŋe.

⁵ Nahe 'ya kesəkwəte Mahwətə, nahe ŋkɛ kezhɛnete ɗa, nahe ŋkɛ kembelete ɗa va pɛtɛa ghazlənə nyi kezhɛ ɗa.

⁶ Zlama ya va mbeli nyi keve ntsə te, katezhɛne hawe kanza kwa kema ta nci we.

⁷ Ma ketsate lewela nde dewə ŋeli ne, kafa Mahwətə ba'a kambele ŋkɛ ŋkɛ va pɛtɛa yaka nyi te.

⁸ Yitea mbeli nyi kehawe va Shala nza nde ghwene ta Mahwətə, tagha gɛ, kambele hɛ ŋkɛ.

⁹ Dzeghakɛ mə ba'a neweve mə tsema tsema nza Mahwətə ganyɛke. Zlama ya va wəndə nya nza ŋkɛ kaŋkwa kewəfərə ta ŋkɛ.

¹⁰ Hawe mə va Mahwətə, gheyɛ mbelia ŋkɛ, kwa nza ŋkɛ wəsə shɛ kandaŋe ka hawe ve te we.

¹¹ Kazhɛ nda yaka ba'a ma ke yɛ nivɛrə, ama wəsə shɛ kandaŋe ka zele Mahwətə te we.

¹² Ŋwalea ɗa, nde mə, fa ɗa mə ŋa ɗa. Kateteke ŋayɛ hawe va Mahwətə 'ya.

¹³ Kaɗe na kanza teghweme na? Kaɗe nza kanewe zeɗe nza na?

¹⁴ Ya mə ghɛnia ŋa va geze ghena te mbeli, fɛa mɛa ŋa yitea sla tseŋwə,

¹⁵ hwɛ ŋa va wəsə kwa ndiremi, mene ganyɛ, sepa kwelɛŋe ba'a zele ŋkɛ.

¹⁶ Te mbeli nyi tiɗiɗi nza ntsə ta Mahwətə, kave sleme ŋkɛ yitea lewela nci.

¹⁷ Ama kaɗema ka mene wəsə ndiremi Mahwətə yitea zamte geva sləa nci te hɛɗi lema.

¹⁸ Kafa Mahwətə ketsave nda lewela mbeli nyi tiɗiɗi ba'a kambele hɛ ŋkɛ shave mbe pɛtɛa yaka ta nci.

¹⁹ Terasle nza Mahwətə yitea mbeli nyi nza helia nci kesla sla, kambele mbeli nyi nza mehele ta nci ketaze taze ŋkɛ.

²⁰ Kwele kwele nza ndiremi te wəndə nya tiɗiɗi, ama kambele ŋkɛ Mahwətə va pɛtɛa ndiremia shɛhɛ.

²¹ Kaya pɛtɛa 'yɛ'yɛa ŋkɛ ŋkɛ, kwete shɛ kateɓele geva hwa hɛ we.

²² Katemte nde 'yaghwa mehele va ndiremi, katenza ɗa te ka jaga ta wəndə nya tiɗiɗi.

²³ Kambele mpia ka mene slene ta ŋkɛ Mahwətə. Wəndə shɛ hwa mbeli nyi kewəfərə mbe katedzete ɗa we.