Cimə 24 - Ghena ta Shala

1 Ciməa David.

¹ Ciməa David. Ŋa Mahwətə hɛɗi ba'a wəshi nyi te, hɛɗi lema ba'a mbeli nyi te.

² Gheŋkɛ nde peyi ŋkɛ te ndərə ba'a nde ghereŋeyi ŋkɛ te ghəa yɛmə.

³ Wa nde tedzeme ghweme ta Mahwətə wa? Wa nde teghereŋe mbe ŋkwa ŋkɛ nya keveyi geva tekeleke wa?

⁴ Deke mbeli nyi kemenema wəsə kwa ndiremi ba'a nyi nza wənəa nci wɛŋe, mbeli nyi ɗema ghəa nci yitea tseŋwə ba'a nyi kezemema fela kezha ghwete ŋkwa.

⁵ Katekemave wəpi ta Mahwətə hɛ, kateve hɛ Shala nya kembele hɛ kambeli nyi tiɗiɗi.

⁶ Nyi ya kambeli nyi kezele ŋkɛ, kambeli nyi kesepa Shala ta Zhakob. Zhɛne mpi

⁷ Ŋkwa kedzeki, mbake mə biya, gelembe nyi vəashinji, ghwene mə geva kezha dzembe meghe nya nza zləvə te!

⁸ Wa meghe nya nza nya zləvə te wa? Mahwətə nya berete ba'a nya kakatsala, Mahwətə nya kakatsala kempa.

⁹ Ŋkwa kedzeki, mbake mə biya, gelembe nyi vəashinji, ghwene mə geva kezha dzembe meghe nya nza zləvə te!

¹⁰ Wa meghe nya nza nya zləvə te wa? Mahwətə nde berete, gheŋkɛ ya kameghe nya nza zləvə te. Zhɛne mpi