Cimə 148 - Ghena ta Shala

Tsahe Shala mbeli pelɛ ghweme ba'a te hɛɗi

¹ Alɛləwya! Tsahe mə Mahwətə sawa pelɛ ghweme, tsahe mə ŋkɛ, gheyɛ nyi kenza pelɛ ghəa ŋkwa.

² Tsahe mə ŋkɛ, gheyɛ pɛtɛa ka ghwene ta ŋkɛ, tsahe mə ŋkɛ, gheyɛ pɛtɛa ka sewajɛa ŋkɛ.

³ Tsahe mə ŋkɛ, gheyɛ veci le tere, tsahe mə ŋkɛ, gheyɛ pɛtɛa saseregwa nyi keɓele.

⁴ Tsahe mə ŋkɛ, gheyɛ ŋkwa nyi kənəa ghweme ba'a gheyɛ yɛmə nyi kənəa ghweme.

⁵ Tsahe Mahwətə wəshi pɛtɛ, kwa nza ŋkɛ deke ghena yagezete ŋkɛ nda pate geva hɛ.

⁶ Nahe ŋkɛ keveveyi hɛ kaghala ghala, nahe ŋkɛ keveyi wəsə mahalegə nya keɗema kakiɗi.

⁷ Tsahe mə Mahwətə se te hɛɗi: ndərə nyi jama jama ba'a wəshi keseɗa nyi jama jama dzeyi kwa yɛ ndərə,

⁸ ghwə ba'a kwacakelɛ, meləkwə ləkwə ba'a kwelɛmentehe, sefə nya wəba nya kehawe va ghena ta ŋkɛ,

⁹ yɛ ghweme ba'a pɛtɛa yɛ wəmbə, wəfe nyi keya ba'a pɛtɛa yɛ lekeleke,

¹⁰ wəshi keseɗa nyi hwa gamba ba'a nyi ki ghɛ, yɛ 'yɛ ba'a wəshi keseɗa nyi kentsehe geva dzete te hɛɗi,

¹¹ ka meghea kɛfi nyi te hɛɗi ba'a mbeli pɛtɛ, mbeli nyi te ghə ba'a pɛtɛa ka meha ghwə nyi te hɛɗi,

¹² ka mempɛhwetɛti ba'a deghelɛshi, ka meha mehɛɗi ba'a ŋwale.

¹³ Tsahe mə Mahwətə, kwa nza ŋkɛ deke gheŋkɛ yanza sləa ŋkɛ wəbake, hərəkə hɛɗi ba'a ghweme va zləvəa ŋkɛ.

¹⁴ Nahe ŋkɛ kendeke nda berete ba'a farefa ke mbelia ŋkɛ. Vatse tsahe ŋkɛ pɛtɛa mbelia ŋkɛ, ka Israyɛl, mbeli nyi terasle yite. Alɛləwya!