Cimə 146 - Ghena ta Shala

Mahwətə ya kande ya ka dewə berete

¹ Alɛləwya! Katetsahe Mahwətə 'ya.

² Katetsahe Mahwətə 'ya mbe pɛtɛa hɛa ɗa, kategha nda cimə 'ya ke Shala mbe pɛtɛa nza ta ɗa.

³ Vema ghə yɛ te mbeli nyi te ghə, ya te mbeli nyi keɗema kambelete ŋkwa ma.

⁴ Shavema ta sefə hwa hɛ ne, katezhɛne geva hɛ kadzembe hɛɗi, kateza sebe te zəzə ta nci te vecia shɛ.

⁵ Zlama ya va wəndə nya kedɛŋe geva te Shala ta Zhakob ba'a nya keve nda ghə ke Shala Mahwətə ta ŋkɛ.

⁶ Shala nde pate ghweme ba'a hɛɗi, ndərə ba'a pɛtɛa wəshi nyi kwa. Shala ya kande kaganda kaghala ghala.

⁷ Shala nde ve nda nza tiɗiɗi ke ka sa yaka, Shala nde ve nda wəsə kezeme ke mbeli nyi shewə va ma. Mahwətə nde pele ka daŋgayɛ waɗe.

⁸ Mahwətə nde pele nda ntsə ke ka ghwələa kɛfi, Mahwətə nde kese ka dewə berete sate te ŋkwa, Mahwətə nde ɗe mbeli nyi tiɗiɗi,

⁹ Mahwətə nde ya ka se se, katawe mezhɛte ba'a wede ŋkɛ, ama kaza ka 'yaghwa mehele ŋkɛ.

¹⁰ Mahwətə nde tenza kameghe kaghala ghala. Siyon, gheŋkɛ ya kaShala ta ŋa keshi keshi. Alɛləwya!