Cimə 143 - Ghena ta Shala

Mahwətə, mehama ghwə na te 'ya ma

1 Ciməa David.

¹ Ciməa David. Mahwətə yawe, fa səkwə ta ɗa, ve sleme yitea lewela ta ɗa. Ma laka ganyɛa ŋa ba'a tiɗiɗia ŋa ne, zhɛnete ɗa.

² Nahe 'ya kenza kande mene slene ta ŋa, mehama ghwə na te 'ya ma. Kwa nza ŋkɛ ne, wəndə shɛ tiɗiɗi kwa kema ta ŋa we.

³ Mɛ yaghweze nde jaga hwa 'ya, nahe ŋkɛ keweleyi ɗa kezha ŋkeɗe ɗa. Nahe ŋkɛ keveyi ɗa mbe ŋkwesle kala mbeli nyi kempə mpə nyi vəashi.

⁴ Nahe 'ya kenza mbe wənə mbe wənə, nahe mehele ta ɗa ketazenyɛ.

⁵ Kazəzə və nyi vəashi 'ya, kazəzə yayata slene nya menete na 'ya, kakele zəzə 'ya te wəshi nyi menete dzeve ta ŋa.

⁶ Kakafe dzeve 'ya dzeme laka gha, nahe 'ya kenza kwa kema ta ŋa kala hɛɗi nya keghwele ghwele. Zhɛne mpi.

⁷ Mahwətə yawe, zhɛnete ɗa kahe kahe, nahe 'ya kenza mbe wənə mbe wənə. Zhɛre ɗa ma wəmbə na ma, kenza ŋkɛ tsagha ne, yipə yipə tenza 'ya le mbeli nyi kedzawa kwele.

⁸ Kiɗima ta ŋkwa ne, ncɛte ɗa ganyɛa ŋa, kwa nza ŋkɛ te gha ve ghə 'ya. Ɗepete ɗa hweŋkwa nya dzeghwa 'ya kwa, kwa nza ŋkɛ ke gha zhɛre ŋa kema 'ya.

⁹ Mahwətə yawe, mbelete ɗa va ka jaga ta ɗa. Kanza 'ya kwa ghwədərəa ŋa.

¹⁰ Tekete ɗa mene ɗe ta ŋa, kwa nza ŋkɛ gha ya kaShala ta ɗa. Beghe ɗa Sefə ganyɛa ŋa kadzete hɛɗi nya ɓerayɛ.

¹¹ Mahwətə, ndeke ɗa nza teghweme te zlaɓa ta ŋa, katekele ɗa na shave mbe yaka laka ganyɛa ŋa.

¹² Ma laka ganyɛa ŋa ne, kateza sebe na te ka jaga ta ɗa ba'a katempə ka ghema ta ɗa na, kwa nza ŋkɛ nahe 'ya kenza kande mene slene ta ŋa.