Cimə 12 - Ghena ta Shala

Ghena ta Mahwətə te hɛɗi nya kebeze beze

¹ Se va wəndə nya te ghəa cimə. Yitea getsepele nya nza zewe deghese te. Ciməa David.

² Mahwətə, kemane n'yɛ! Za yaza sebe te mbeli nyi tiɗiɗi. Nahe mbeli nyi kegeze kaganda kezanji te hɛɗi.

³ Tseŋwə yaslesla mbeli, ghena hətə ŋkwa yageze mɛa nci, ama kaganda kwa wənəa nci we.

⁴ Mahwətə, zamte sebe te ka hətə ŋkwa, mpəmte mbeli nyi kesla ghena ŋkele ntsə,

⁵ mbeli nyi kegeze: «Berete ya va ghen'yɛ laka ghɛnia n'yɛ, nahe ghen'yɛ keɗepe geze ghena, wəndə shɛ kaghazlənə n'yɛ ve we», ke hɛ.

⁶ Ma ke Mahwətə: «Ma tsetsenya, va yaka nya te ka titikwəa kɛfi ba'a va nehwene ta ka dewə berete ne, 'ya katesate te ŋkwa, 'ya katembele wəndə nya ɓelama mbeli.»

⁷ Ghena nya wɛŋe ghena ta Mahwətə, kala mze kwa tɛawetɛa nya yaɓekɛ mbeli wɛŋe mberefaŋe zhigə kwa ghwə.

⁸ Mahwətə, kateya ka dewə ŋeli na, kateya n'yɛ na kaghala ghala va mbelia shɛhɛ.

⁹ Dzeghwa yadzeghwa ka 'yaghwa mehele te yayata ŋkwa, mbake yambake geva beze hwa mbeli.