Cimə 116 - Ghena ta Shala

Səkwə ghə ta wəndə nya kembele va mte

¹ Kaɗe Mahwətə 'ya, kwa nza ŋkɛ kafa ɗa ŋa ɗa ketsave nda lewela 'ya.

² Nahe ŋkɛ kezhɛrave ɗa sleme, katetsa nda lewela 'ya mbe pɛtɛa nza ta ɗa.

³ Nahe mte ketseyi ɗa kwa zewe lɛ, nahe ghɛa mbelia kwahɛɗi kekeseyi ɗa kwa zewe. Nahe 'ya kadake ɗa ba'a keyirə ɗa.

⁴ Tagha gɛ, ma 'ya hekate Mahwətə le sləa ŋkɛ: «Təhwə təhwə ŋa 'ya Mahwətə, mbelete ɗa.»

⁵ Mahwətə ya kande ganyɛa mehele nahe ŋkɛ kenza tiɗiɗi. Shala ta ɓəmə ya kande zhɛ heli.

⁶ Kaya ka gwedəa kɛfi Mahwətə. Ma te və nya se 'ya kedene dene ne, nahe ŋkɛ kembelete ɗa.

⁷ Mehele ta ɗa, zhɛnakɛ mpi, kwa nza ŋkɛ nahe Mahwətə kemenete ɗa ganyɛ.

⁸ Kaganda ne, nahe na kembelete ɗa va mte, nahe na kesehwemte ɗa nehwene kwa ntsə ba'a nahe na keyate yɛ seɗa ta ɗa va tehene.

⁹ Vatse gɛ, katedzeghwa 'ya kwa kema ta Mahwətə, te hɛɗia mbeli nyi teghweme.

¹⁰ Nahe 'ya keyɛte, ya 'ya se kageze: «Nde dewə berete lagana 'ya», a 'ya.

¹¹ Ma te və nya se 'ya keyirə yirə ne, ma 'ya sha se kageze: «Nahe mbeli pɛtɛ kenza kaka tseŋwəa kɛfi.»

¹² Wa wəsə nya teve nda 'ya ke Mahwətə te pɛtɛa wəshi ganji nyi menete ɗa ŋkɛ tse wa?

¹³ Kateha nda zlerekwea hərə ŋkwa 'ya ba'a kateheka sləa Mahwətə 'ya.

¹⁴ Ma mɛ nyi meɗeyi nda 'ya ke Mahwətə ne, kateyipə hɛ 'ya kadzawa kwa kema ta pɛtɛa mbelia ŋkɛ.

¹⁵ Kawəsə nya ndiremi ŋkɛ sha Mahwətə kanewe mpə ta mbelia ŋkɛ.

¹⁶ Təhwə təhwə ŋa 'ya Mahwətə, nde mene slene ta ŋa 'ya, kaganda, nde mene slene ta ŋa, wəzege ta kwatera ta ŋa. Nahe na ketsakame ɗa same kwa zewe lɛ.

¹⁷ Katedzeghe ŋa melɛ ketsa hana 'ya ba'a kateheka ŋa 'ya, gha Mahwətə le sləa ŋa.

¹⁸ Ma mɛ nyi meɗeyi nda 'ya ke Mahwətə ne, kateyipə hɛ 'ya kadzawa kwa kema ta pɛtɛa mbelia ŋkɛ,

¹⁹ te ŋwela nyi yitea ghɛa Mahwətə, te tepe ta ŋa, Zhɛrəzalɛm. Alɛləwya!