Cimə 108 - Ghena ta Shala

'Ya katefeɗeghe kiɗi ta ŋkwa

¹ Cimə. Ciməa David.

² Shala ta ɗa, gweɗakwe wənəa ɗa, kategha cimə 'ya ba'a katetsahe ŋa 'ya le wənə kwetɛŋe.

³ Feɗeghe mə, gagera ba'a ŋgwəleŋə, 'ya katefeɗeghe kiɗi ta ŋkwa.

⁴ Mahwətə, katetsahe ŋa 'ya hwa mbeli, kategha ŋa cimə 'ya hwa hwelefefi.

⁵ Kwa nza ŋkɛ biya ma ganyɛa ŋa ke ghweme, dzemedze ma kaganda ta ŋa ke yɛ ləmbə.

⁶ Shala yawe, ncɛte kwelea ŋa kənəa ghweme, ɓele zləvəa ŋa kwake te hɛɗi lema.

⁷ Kezha nza ka mcɛhɛ ŋa pələsə ne, mbelete hɛ laka berete ta ŋa ba'a zhɛnete ɗa ghena.

⁸ Ma ke Shala gezete mbe ghɛa ŋkɛ: «'Ya ya kande hərə ŋkwa, 'ya katenehe meleme ta Sishɛm, 'ya katedzeghe zlərəa Səwkot.

⁹ Ŋa ɗa Gala'ad, ŋa ɗa Manasɛ perə. Ɛfrayim ya kakwenə nya mbe ghəa ɗa, Zhəwda ya kageta meghe ta ɗa.

¹⁰ Mowab ya kakwapɛ ta ɗa. Te Ɛdom ŋkeɗe seɗa 'ya. Katsa kaka 'ya yitea Filisti.»

¹¹ Wa nde tekele ɗa kadzembe meleme nya berete wa? Wa nde tebeghe ɗa hwa'a mbe Ɛdom tse wa?

¹² Deke gha nde nza kamenete Shala yawe. Ama nahe na kebetemte n'yɛ, kezhɛne na kadzemte mpa le ka sewajɛa n'yɛ we.

¹³ Se kakemane n'yɛ va nde ghema ta n'yɛ, kwa nza ŋkɛ gəmə kemane ta wəndə ŋelɛ.

¹⁴ Ma le Shala ne, katehərə ŋkwa ghen'yɛ, gheŋkɛ nde ŋkeɗe ka ghema ta n'yɛ.