Cimə 107 - Ghena ta Shala

KWA MCƐFE TA PALEPA CIM 107–150 Tsahe mə Shala nya kande mbele ŋkwa

¹ Tsahe mə Mahwətə, kwa nza ŋkɛ ganyɛke ŋkɛ, kakiɗi ɗe ta ŋkɛ we.

² Geze ghena shɛ mbeli nyi mbelete Mahwətə, mbeli nyi zləgwəke ŋkɛ va nde ghema,

³ mbeli nyi tseneke ŋkɛ se te pɛtɛa hɛɗi, se te ŋkwa kesame ta veci ba'a ŋkwa kepəkwə ta ŋkɛ, se te bela kwa gwela ba'a bela kwa zeme.

⁴ Nahe kweci mbelia nci kezanji te ɓerama, te ŋkwa nya dɛrɛŋe rɛŋe, kasləyi hweŋkwa kedzete ŋkwa nya nza mbeli hɛ we.

⁵ Ma kwa zhɛte nda ma ba'a ndere ke hɛ ne, kwetɛ kwetɛŋe mehele ta nci tazenji.

⁶ Nahe hɛ ketsave nda lewela ke Mahwətə mbe yaka ta nci, tagha gɛ, pa mbelete hɛ va yirə nya te hɛ.

⁷ Nahe ŋkɛ kebegheghe hɛ kwa hweŋkwa nya kata kata kezha dzembe meleme nya nza mbeli mbe hɛ.

⁸ Tsahe Mahwətə hɛ kezha ganyɛa ŋkɛ ba'a kezha wəshi meŋelea ŋkɛ laka mbeli gɛ!

⁹ Kwa nza ŋkɛ nahe ŋkɛ kesame nda yɛmə ke mbeli nyi zhɛ nda ndere, nahe ŋkɛ kebehekɛ mbeli nyi zhɛ nda ma.

¹⁰ Mbe viɗi ba'a ŋkwesle ta mte se kweci mbelia nci, kaka daŋgayɛa yaka ba'a yɛ zewe lɛ,

¹¹ va nya fatema ghena nyi gezete Shala hɛ, va nya ɓelama zəzə ta Shala tehwə ghweme hɛ.

¹² Pa Shala denemte hɛ le yaka, pa hɛ betenji, wəndə shɛ kese kakemane hɛ we.

¹³ Nahe hɛ ketsave nda lewela ke Mahwətə mbe yaka ta nci, tagha gɛ, pa mbelete hɛ va yirə nya te hɛ.

¹⁴ Pa ŋkɛ fəakave hɛ mbe viɗi ba'a mbe ŋkwesle ta mte, pa ŋsleŋslemte yɛ zewe lɛ nci.

¹⁵ Tsahe Mahwətə hɛ kezha ganyɛa ŋkɛ ba'a kezha wəshi meŋelea ŋkɛ laka mbeli gɛ!

¹⁶ Kwa nza ŋkɛ nahe ŋkɛ kempəmte yɛ gelembe mze kwa ghwə ghwə ba'a kekweraɗemte wəshi keŋzle nyi kalɛ.

¹⁷ Nahe kweci kezhɛrenji kaka gezhia kɛfi va wəshi nyi ndiremi ndiremi ta nci. Nahe hɛ kesahwe nda yaka ke ghəa nci le jaɗafa ta nci.

¹⁸ Mba wəsə kezeme zeɗehwe nda ke hɛ we, nahe hɛ kenza takwa yitea mte.

¹⁹ Nahe hɛ ketsave nda lewela ke Mahwətə mbe yaka ta nci, tagha gɛ, pa mbelete hɛ va yirə nya te hɛ.

²⁰ Nahe ŋkɛ kembete hɛ laka ghena ta ŋkɛ, nahe ŋkɛ kezləgwəke hɛ va mte.

²¹ Tsahe Mahwətə hɛ kezha ganyɛa ŋkɛ ba'a kezha wəshi meŋelea ŋkɛ laka mbeli gɛ!

²² Dzeghe nda melɛ ketsa hana hɛ, zlape wəshi nyi menete ŋkɛ hɛ le zlama.

²³ Nahe kweci mbelia nci keslənji le kwambelə kezha mene slene ta nci te ndərə nya wəba.

²⁴ Nahe mbelia shɛhɛ kenakɛ wəshi nyi menete Mahwətə ba'a wəshi meŋelea ŋkɛ te ndərə.

²⁵ Gezetema ta ŋkɛ ke ghena ne, kantsa sefə nya wəba nya kegaŋkeɓe yɛmə.

²⁶ Kadzeme kwambeləa nci yitea ghweme, zhɛne ne, kadzawa yɛ deɓa ŋkɛ. Kala mbeli nyi ketempə newe ghəa nci hɛ.

²⁷ Kadɛwərə hɛ ghəa nci, katsepe tsepe hɛ kala ka ghwəyi ghwəyi, rayɛ ntsehwelea nci kezanyɛ.

²⁸ Nahe hɛ ketsave nda lewela ke Mahwətə mbe yaka ta nci, tagha gɛ, pa mbelete hɛ va yirə nya te hɛ.

²⁹ Pa ŋkɛ gweɗakwete sefə nya wəba, pa yɛ gaŋkeɓe ta yɛmə nzanji tikə tikə.

³⁰ Ntake hɛ kazlama yitea gweɗakwe ta ŋkwa, pa Shala begheyi hɛ mɛa hələbə nya ɗe hɛ.

³¹ Tsahe Mahwətə hɛ kezha ganyɛa ŋkɛ ba'a kezha wəshi meŋelea ŋkɛ laka mbeli gɛ!

³² Zlape kwelea ŋkɛ hɛ hwa tsene ta mbeli ba'a tsahe ŋkɛ hɛ hwa rəkwə ta mbelia jama.

³³ Gheŋkɛ nde zhɛre yɛ hələ kaɓerama, yɛ ɗasle kahɛɗi nya keghwele ghwele,

³⁴ hɛɗi ganyɛ kahɛɗi nya kemte mte va 'yaghwa mehele ta mbeli nyi te.

³⁵ Gheŋkɛ nde zhɛre ɓerama ŋkɛ kandərə perə, hɛɗi nya keghwele ghwele kaɗasle.

³⁶ Kabete mbeli nyi shewə va ma ŋkɛ te. Kaŋa meleme ta nci hɛ te ŋkwa shɛ.

³⁷ Katsawe wəshi hɛ dzeyi mbe yɛ wəve, kamɓe yɛ rɛzɛŋe hɛ ba'a kanda ya ta nci hɛ.

³⁸ Kawəpi hɛ ŋkɛ, tagha gɛ, kaya hɛ kwele kwele, kasərə wəshi keseɗa ta nci ŋkɛ kakiɗi we.

³⁹ Ama kiɗi yakiɗi kweci mbeli, kaŋa geva hɛ va dzawea yaka ba'a ndiremi.

⁴⁰ Kaɓela mbeli nyi te ghə ŋkɛ we, kave nda ndeŋe ŋkɛ ke hɛ te ɓerama nya ɗema hweŋkwa.

⁴¹ Ama kaya ka titikwəa kɛfi ŋkɛ va yaka, kambake mbelia nci ŋkɛ kala wəshi keseɗa.

⁴² Katezlama mbeli nyi tiɗiɗi kenakɛ wəsəa shɛ hɛ, ama kateŋzle mɛ te pɛtɛa ka 'yaghwa mehele.

⁴³ Ma wəndə nya kentsehwele ntsehwele ne, katemene slene ŋkɛ le ghena nyi ba'a kateɗepe ganyɛa Mahwətə ŋkɛ.