Cimə 104 - Ghena ta Shala

Hana ke Shala nya kepate ŋkwa

¹ Kaɗe 'ya katsa nda hana ke Mahwətə. Shala Mahwətə ta ɗa, kewəba ŋa na. Bətə na mbe waŋe ba'a zləvə.

² Kanza na bətə mbe waŋe kala karalame, kapelake ghweme na kala cɛ lekwesa.

³ Kaŋa ghɛa ŋa na biya ma ke ghweme, kakele ləmbə na kawəmata gədəwə, kadzeghwa na te yɛ bidzəa sefə.

⁴ Kakele yɛ sefə na kaka ghwene ta ŋa, tsagha yɛ tse ta ghwə kaka mene slene ta ŋa.

⁵ Nahe na keveyi hɛɗi te yɛ shihəa ŋkɛ, kategaŋkəɗə ŋkɛ tɛape we.

⁶ Nahe na kezhiɓəyi ndərə kənə kala lekwesa, nahe yɛmə kedzeme pa pelɛ ghəa yɛ ghweme.

⁷ Nahe ŋkɛ kehwɛnyɛ te və nya vate ɗa na te. Va gaka ta ŋa kala va ne, nahe yɛmə kehwɛnyɛ.

⁸ Nahe ŋkɛ kedzemenyɛ pelɛ yɛ ghweme, kedzawanyɛ kwa yɛ zlərə, hwa'a te ŋkwa nya dzegheyi nda na.

⁹ Nahe na kedzeghete nda ghala nya ɗema ŋkɛ kazlake. Katezhɛne yɛmə kase kazhiɓə geva kənəa hɛɗi we.

¹⁰ Kahwɛ yɛməa ɗasle ŋkɛ kadzawa yɛ hələ, kahwɛ yɛməa shɛ dzawa kwelɛ yɛ ghweme.

¹¹ Kasa ŋkɛ pɛtɛa wəshi keseɗa nyi hwa gamba, kasa ŋkɛ kwara lɛmə gamba va ndere.

¹² Kapa ghɛa nci yɛ 'yɛ terasle yite yɛməa shɛ, kagha cimə hɛ dzeme hwa yɛ wəfe.

¹³ Kame nda va na ke yɛ ghweme sawa pelɛ ghweme, kabehe hɛɗi na le wəshi ganjia ŋa.

¹⁴ Kapese gwəzə na kezha wəshi keseɗa, tsagha wəshi nyi wəza mbeli. Tagha gɛ, kave nda wəsə kezeme hɛɗi ke hɛ.

¹⁵ Kave nda zlama tɛ ke wənəa mbeli, kadəɗəmə kema ta nci ŋkɛ za ma ke n'yi. Kave nda berete ɗafa ke mbeli.

¹⁶ Pa le yɛ wəfe ta Mahwətə behe behe va yɛmə, tsagha yɛ lekeleke nyi mbe Liban nyi mɓete ŋkɛ.

¹⁷ Dzeyi te yɛ dzeve ta nci pa yɛ ghɛa nci yɛ 'yɛ, kanza kwaghela dzeyi hwa yɛ vɛ.

¹⁸ Nahe ghweme nyi bebiya bebiya kenza kaŋa yɛ ghweɓeke, nahe yɛ gela kenza kaŋkwa kewəfərə ta yɛ kese.

¹⁹ Nahe na kepate tere kezha ɓela və, tsagha veci nya keɗepe və kepəkwə ta ŋkɛ.

²⁰ Kakele ŋkwesle na kase, tagha gɛ, hwa'a viɗi nya dzeghwa pɛtɛa wəshi keseɗa nyi hwa gamba mbe.

²¹ Kaghwəghwə ŋwalea nivɛrə kwetere wəmbəa wəsə kezeme ta nci, ka'yɛwe wəsə kezeme ta nci hɛ va Shala.

²² Ma kasame veci ne, kaslənji hɛ, kalə hɛ kaɓelahe te ghweɓea nci.

²³ Tagha gɛ, kashave mbeli ki ghɛ kezha mene slene ba'a kezha leɓe ghə pa va tɛhwɛɗi.

²⁴ Mahwətə, kwele kwele wəshi nyi menete na, le ntsehwele menete hɛ na pɛtɛa nci. Viɗi hɛɗi va wəshi nyi pate na.

²⁵ Wa nya ndərə nya kewəbanyɛ ba'a kebezlenyɛ. Kwagha dzeghwa wəshi keseɗa kwele kwele, nyi jama jama ba'a nyi ɓɛhwɛ ɓɛhwɛ.

²⁶ Te ndərəa shɛ dzedzeghwa yɛ kwambelə, tsagha kele nya pate na kezha gwaghe kwa.

²⁷ Pɛtɛa wəshi keseɗa shɛhɛ kave ghə te gha kezha ve nda wəsə kezeme ta nci na ke hɛ te vəa ŋkɛ.

²⁸ Ma kave nda ŋkɛ na ke hɛ ne, kakele hɛ. Ma kapele dzeve na ne, kanza hɛ behe behe.

²⁹ Ama kazhɛre kema na ne, kadake hɛ. Ma kakele mpi na shave mbe hɛ ne, kampə hɛ ba'a kazhɛne hɛ kanza kahɛɗi.

³⁰ Ma kaghwene nda mpi na ke hɛ ne, kazhɛne hɛ kanza teghweme, kazhɛre yayata wəsə kamɛnɛfɛ te hɛɗi.

³¹ Nza zləvəa ŋa, gha Mahwətə kaghala ghala, nza zlama va gha Mahwətə te wəshi nyi menete na.

³² Ma kanewe hɛɗi na ne, kagaŋkəɗə ŋkɛ. Ma kakwaɗe yɛ ghweme na ne, katələ n'yi shave mbe hɛ.

³³ Kaɗe 'ya kagha nda cimə ke Mahwətə mbe pɛtɛa nza ta ɗa, katetsahe Shala ta ɗa 'ya mbe hɛa ɗa nyi ketene.

³⁴ Nza ghena ta ɗa zeɗehwe nda. Ma 'ya ne, zlama ya va 'ya tewəmbəreke Mahwətə.

³⁵ Zanji ka jaɗafa te hɛɗi, ɗema ka 'yaghwa mehele nza shɛ. Kaganda ne, kaɗe 'ya katsa nda hana ke Mahwətə. Alɛləwya!