Cimə 103 - Ghena ta Shala

Kaɗe 'ya katsa nda hana ke Mahwətə

1 Se va David.

¹ Se va David. Kaɗe 'ya katsa nda hana ke Mahwətə. Kaɗe 'ya katsahe sləa ŋkɛ nya keveyi geva tekeleke le pɛtɛa wənəa ɗa.

² Kaganda ne, kaɗe 'ya katsa nda hana ke Mahwətə, wəsə shɛ hwa wəshi ganjia ŋkɛ kazaghə 'ya we.

³ Gheŋkɛ nde kele pɛtɛa fete ta ɗa te wənə, nde mbe ɗa va pɛtɛa zereghwe.

⁴ Kazləgwə mpia ɗa ŋkɛ same kwa kwele, kapeɗe ɗa ghə ŋkɛ le ɗe ba'a ganyɛ.

⁵ Kabehe nza ta ɗa ŋkɛ le wəshi ganji, kave ɗa mɛnɛfɛa berete ŋkɛ kala zele.

⁶ Kamene slene nyi kehi Mahwətə, kameha nda ghwə nya tiɗiɗi ŋkɛ ke ka dewə berete.

⁷ Nahe ŋkɛ kencɛte nda zəzə ta ŋkɛ ke Moyize, wəshi nyi jama jama ta ŋkɛ ke ka Israyɛl.

⁸ Mahwətə ya kande zhɛ heli ba'a kande ganyɛa mehele, nahe ŋkɛ kenza kande səwə ghena ba'a kande ɗe ŋkwa.

⁹ Kaŋele ŋkwa ŋkɛ kevə kevə we, kanza hwepe ta wənəa ŋkɛ kaghala ghala we.

¹⁰ Kamene ɓəmə ŋkɛ kala jaɗafa ta ɓəmə we, kave ɗa ŋkɛ te gheɓəmə kala fete ta ɓəmə we.

¹¹ Kala dzeme ta ghweme kənəa hɛɗi ne, tsagha ganyɛa ŋkɛ kaŋa mbeli nyi kehawe ve.

¹² Kala cakeɗa ta ŋkwa kesame ta veci yitea ŋkwa kepəkwə ta ŋkɛ ne, tsagha hende yɛ jaɗafa ta ɓəmə ŋkɛ seyi yitea gheɓəmə.

¹³ Kala nya ɗe ŋwalea ŋkɛ yita ne, tsagha ɗe mbeli nyi kehawe ve Mahwətə.

¹⁴ Kwa nza ŋkɛ nahe ŋkɛ keɗepe le wa le wa pate geva gheɓəmə, kazaghə ŋkɛ kahɛɗi gheɓəmə we.

¹⁵ Nahe yɛ hɛa wəndə ŋelɛ kenza kala gwəzə, kapese ŋkɛ kala ghwə ta wəfe nyi hwa gamba.

¹⁶ Ma kevɛke vɛ sefə ne, kaza ŋkɛ, kazaghə ŋkɛ ŋkwa nya se ŋkɛ te.

¹⁷ Ama ganyɛa Mahwətə kaŋa mbeli nyi kehawe ve ne, se vəashi ŋkɛ ba'a kaghala ghala tetemə ŋkɛ. Kevə kevə nza tiɗiɗia ŋkɛ kaŋa ŋwalea ŋwalea nci,

¹⁸ kaŋa mbeli nyi keya jikə geva ta ŋkɛ ba'a nyi kezəzə mene slene le ghena nyi gezete ŋkɛ.

¹⁹ Nahe Mahwətə keveyi pasla ta ŋkɛ pelɛ ghweme, gheŋkɛ nde sleke pɛtɛ wəshi.

²⁰ Tsa nda mə hana ke Mahwətə, gheyɛ ka ghwene ta ŋkɛ, gheyɛ ka katsala nyi keyipə ghena ta ŋkɛ kadzawa, gheyɛ ka hawe ve gezetema ta ŋkɛ ke ghena.

²¹ Tsa nda mə hana ke Mahwətə, gheyɛ pɛtɛa ka sewajɛa ŋkɛ, gheyɛ ka mene slene ta ŋkɛ nyi kemene ɗe ta ŋkɛ.

²² Tsa nda mə hana ke Mahwətə, gheyɛ pɛtɛa wəshi nyi pate ŋkɛ, te yayata ŋkwa nya nza ŋkɛ kameghe. Ma 'ya perə ne, kaɗe 'ya katsa nda hana ke Mahwətə.