Cimə 102 - Ghena ta Shala

Yaka ba'a ve ghə

¹ Səkwə ghə ta nde dewə ŋeli lagana nya keŋgaɗe ghə kwa kema ta Mahwətə.

² Mahwətə yawe, fa səkwə ta ɗa, dzeme lewela ta ɗa hwa'a sha gha.

³ Wəfərəma kema ta ŋa na va 'ya te və nya nza 'ya mbe yaka ma. Zhɛrete sleme ta ŋa laka 'ya. Ma te veci nya səkwə ŋa 'ya ne, zhɛne ɗa kahe kahe gi!

⁴ Kwa nza ŋkɛ kiɗi yakiɗi hɛa ɗa kala n'yia ghwə, ghyanake nake yɛ 'yɛ'yɛa ɗa kala ghwə.

⁵ Keghwele ghwele wənəa ɗa kala gwəzə nya kesla sla. Pa le zeme wəsə kezeme zaghə 'ya.

⁶ Tewəmbəreke ŋələvə ne, deke hweta nde tene kənəa 'yɛ'yɛa ɗa.

⁷ Yipə yipə 'ya le kwatɛghɛa tɛghɛa nya te ɓerama, nahe 'ya kenza kala sheware nya hwa kwəfi.

⁸ Ghwɛre ghwɛre hɛ 'ya le ntsə kala təwəvəŋə nya kwetɛŋenyɛ kwa ghəa cɛ.

⁹ Keveci keveci ŋele ɗa ka jaga ta ɗa, le sləa ɗa bezla ŋkwa mbeli nyi keyiɗə ɗa.

¹⁰ Pəsəɗə yabəmə 'ya kawəsə kezeme, megweɗə wəsə nya sa 'ya le nehwene ta ɗa.

¹¹ Va hwepe ta wənəa ŋa ba'a va beze ta wənəa ŋa ne, nahe na kekafete ɗa ba'a keneghamte ɗa cakeɗake.

¹² Kakiɗi yɛ hɛa ɗa kala shenaŋkwe ta tɛhwɛɗi, nahe 'ya kenza kala gwəzə nya keghwele ghwele.

¹³ Ama gha gɛ Mahwətə, meghe nya kaghala ghala na, keshi keshi tezəzə ŋa mbeli.

¹⁴ Katesate na te ŋkwa, kateɗe Siyon na, kwa nza ŋkɛ və kezhɛ heli yite nya. Kaganda ne, nahe və kese.

¹⁵ Kaɗe yɛ pelɛa ŋkɛ ka mene slene ta ŋa, kazhɛ nda heli yitea kwəfia ŋkɛ ke hɛ.

¹⁶ Tagha gɛ, katehawe kweci hwelefefi va Mahwətə, pɛtɛa ka meghe nyi te hɛɗi lema va zləvəa ŋkɛ.

¹⁷ Ma vəa ŋkwa nya tezhɛne Mahwətə kaŋa Siyon ne, katencɛ ghəa ŋkɛ ŋkɛ mbe zləvəa ŋkɛ.

¹⁸ Katefa səkwə ta mbeli nyi fəhwe wəshia nci mbeli ŋkɛ, kateɓelama səkwə ta nci ŋkɛ we.

¹⁹ Rafete ghena shɛ mbeli kezha hwelefe nya keteya, yitea tsahe Mahwətə hwelefe mɛnɛfɛ.

²⁰ Kayiŋwə geva ŋkɛ sawa pelɛ ŋkwa ŋkɛ nya keveyi geva tekeleke, kanewe hɛɗi lema Mahwətə sawa pelɛ ghweme

²¹ kezha fa ŋələvə ta ka daŋgayɛ ba'a kezha mbele mbeli nyi tempə mbeli.

²² Tagha gɛ, kategeze sləa Mahwətə mbeli mbe Siyon, katetsahe ŋkɛ mbeli mbe Zhɛrəzalɛm,

²³ te və nya tetsene geva pɛtɛa mbeli ba'a yɛ hɛɗia meghe mbe kezha hawe va Mahwətə.

²⁴ Nahe ŋkɛ kedzakwemte berete ta ɗa kwa hweŋkwa, nahe ŋkɛ kentamte hɛa ɗa.

²⁵ Tagha gɛ, ma 'ya gezete: «Shala ta ɗa, ma gha kenza kaghala ghala ne, kelema mpia ɗa na kahe kahe ma.»

²⁶ Ma vəashi ne, nahe na kepate hɛɗi, nahe dzeve ta ŋa kepate ghweme.

²⁷ Ma ghenci ne, kateza sebe te hɛ, ama gha ne, katenza na. Katehale hɛ pɛtɛ kala lekwesa, katembeɗe hɛ na kala lekwesa, katekiɗi hɛ.

²⁸ Ama gha ne, katenza na, katekiɗi yɛ va ta ŋa we.

²⁹ Katenza ŋwalea ka mene slene ta ŋa bereteke ba'a katenza hwelefefia nci gwezlayɛ kwa kema ta ŋa.