Cimə 10 - Ghena ta Shala

¹ Mahwətə, va wa nza ŋa na cakeɗake wa? Va wa wəfərə ŋa na te vəa yaka wa?

² Kasa nda yaka ka 'yaghwa mehele ke ka dewə ŋeli mbe kele ghəa nci, kakese hɛ hɛ le keleŋa nyi ŋate hɛ.

³ Kafege nde 'yaghwa mehele le wəshi nyi kemave ŋkɛ. Ma kwa tsenete wəshi mbəɗəkwə ŋkɛ ne, kaŋele Mahwətə ŋkɛ ba'a kaŋ'wəshi ŋkɛ.

⁴ «Shala shɛ we», a ke nde 'yaghwa mehele sha geze mbe kele ghəa ŋkɛ. Nya ya kazəzə ta nde 'yaghwa mehele.

⁵ Kevə kevə jive wəshi nyi mene ŋkɛ mbe kema, kakwaɗe ŋkɛ meha ghwə ta Shala we. Kantifə ndɛghwɛɗɛ ŋkɛ te pɛtɛa ka ghema ta ŋkɛ.

⁶ Ma ke mbe ghəa ŋkɛ: «Wəsə shɛ kapesle yitea 'ya we, wəsə kwa ndiremi shɛ katemene ɗa geva tɛape we.»

⁷ Deke bezla ŋkwa, tseŋwə ba'a mene berete ya te mɛa ŋkɛ. Ghena nya ndiremi ba'a nya 'yaghwa ya te ghɛnia ŋkɛ.

⁸ Terasle yitea yɛ meleme nza ŋkɛ te ghweɓe. Kawəfərə ŋkɛ kezha pesle wəndə nya ɗema fete ve. Kaslə ntsə ta ŋkɛ te nde dewə ŋeli we.

⁹ Te ghweɓe ba'a tewəfərə nza ŋkɛ kala nivɛrə nya mbe zlimbəa ŋkɛ. Te ghweɓe nza ŋkɛ kezha kese nde dewə ŋeli. Kakese ŋkɛ laka ghwete ŋkɛ kadzete keleŋa ta ŋkɛ.

¹⁰ Kagwəɗəŋə ŋkɛ ba'a kabərəɓə ŋkɛ, kateɗe nde dewə ŋeli mbe dzeve ta ŋkɛ.

¹¹ Ma ke mbe ghəa ŋkɛ: «Kazaghə wəsə Shala, kedəpə dəpə kema ta ŋkɛ, kanakɛ ŋkwa ŋkɛ tɛape we.»

¹² Mahwətə yawe, sate te ŋkwa! Shala yawe, kafe dzeve ta ŋa! Zaghəyitema ka dewə ŋeli na ma.

¹³ Va wa ŋ'wəshi ŋa nde 'yaghwa mehele wa? «Katemeha ghwə Shala te 'ya we», a ke mbe ghəa ŋkɛ.

¹⁴ Ama gha gɛ Shala yawe, kanewe pɛtɛa wəshi na, kanewe mbeli nyi kesa yaka ba'a titikwə na. Mbe dzeve ta ŋa nzanji hɛ. Ke gha ve ŋa ghəa ŋkɛ nde dewə ŋeli, gha nde tawe mezhɛte.

¹⁵ Ŋslemte berete ta wəndə nya ndiremia mehele. Ma kenza mbeli kazele wəsə kwa ndiremi nya menete nde 'yaghwa mehele tsagha gɛ ne, wəsə shɛ katesləyi mbeli we.

¹⁶ Mahwətə ya kameghe nya kaghala ghala, nahe hwelefefi kezanji te hɛɗia ŋkɛ.

¹⁷ Mahwətə, kafa wəshi nyi mawe ka gwedəa kɛfi na, kambake nda berete na ke hɛ, kave sleme na yitea ghena ta nci.

¹⁸ Kave nda kaganda na te ghwə ke ka mezhɛtiti ba'a ke mbeli nyi kesa yaka. Ma tsagha gɛ ne, wəndə shɛ katenza kande ghwərə ghwərəa ntsə te hɛɗi lema we.