Azhɛ 2 - Ghena ta Shala

Zləvəa ghɛ mɛnɛfɛa Shala

¹ Ma mbe kwa bake ta va ta Dariyəs mbe meghe, mbe hɛ kwa bakemsə kwetɛŋeghəmbe te tere kwa mberefaŋe ne, ma ke Mahwətə zhɛne kagezete nda ke nde mɛ ŋkwa Azhɛ:

² «Ma pa na sha Zorobabɛl, wəzege ta Shɛyaltiyɛl, ŋgwamna nya mbe Zhəwda, Yɛshəwa, wəzege ta Yosadak, wəndə kwelea ka dzeghe Shala ba'a pɛtɛa mbeli nyi ketene:

³ Wa wəndə nya mba teghweme hwa gheyɛ nya kenakɛ zləvəa ghɛa Shala nya vəashi wa? Tsema newe ŋkɛ yɛ tsetsenya wa? Ashɛ wəsə gəmə ŋkɛ kwa ntsə ta ŋayɛ wəka?

⁴ Vatse gɛ, ma 'ya, 'ya Mahwətə sha gheyɛ: Ntsə geva gɛ Zorobabɛl! Ntsə geva gɛ Yɛshəwa, wəzege ta Yosadak, gha nya kawəndə kwelea ka dzeghe Shala! Ntsə mə geva gɛ gheyɛ pɛtɛa mbeli nyi te hɛɗi! Mene mə slene, kwa nza ŋkɛ hwa gheyɛ tenza 'ya, 'ya Mahwətə nde berete nde geze ŋayɛ.

⁵ Nahe 'ya kemenete jikə geva le gheyɛ vəa ŋkwa nya shave yɛ mbe Ɛzhipte. Hwa gheyɛ tenza Sefəa ɗa, ghazlənəma yɛ ma!

⁶ Kwa nza ŋkɛ ne, wa nya ghena nya geze 'ya, 'ya Mahwətə nde berete nya: Temə ɓɛhwɛ ne, 'ya kategaŋkəɗə yɛ ghweme le hɛɗi, yɛ ndərə le hɛɗi kwa ghwele ghwele.

⁷ 'Ya katetaze nda mehele ke kweci hwelefefi. Katefə geva mcɛləa pɛtɛa hwelefefi kase teke ba'a katezhɛne 'ya kave zləvə te ghɛ nya, 'ya Mahwətə nde berete nde gezete.

⁸ Kwa nza ŋkɛ nahe mze kwa tere tere ba'a mze kwa tɛawetɛa kenza kaŋa ɗa, 'ya Mahwətə nde berete.

⁹ Tsagha gɛ, zləvə ma tenza te ghɛ mɛnɛfɛa ɗa nya ke nya keghate. Ma mbe ŋkwa nya ne, kateve ŋayɛ kwelɛŋe 'ya, 'ya Mahwətə nde berete nde gezete.»

Mbeli nyi kenza wale wale

¹⁰ Ma mbe kwa bake ta va ta Dariyəs mbe meghe, mbe hɛ kwa bakemsə wəfaɗeghəmbe te tere kwa mesli ne, ma ke Mahwətə nde berete zhɛne kagezete nda ghena ke nde mɛ ŋkwa Azhɛ:

¹¹ «Wa nya ghena nya geze Mahwətə nde berete nya: Geze nda ke ka dzeghe Shala kezha slamte ghena nya:

¹² Ma keveyi sli nya keveyi geva tekeleke wəndə mbe lekwesa ta ŋkɛ, nda kwaɗakɛ ɗafa, nɗeli, tɛ, n'yi keɗema kwete wəsə kezeme lekwesa shɛ ne, kaveyi geva wəsə kezemea shɛ tekeleke na?» -- «Ewə», ke ka dzeghe Shala zhɛnete nda.

¹³ Ma ke Azhɛ 'yɛwete va hɛ zhɛkwa: «Ma kezhɛrenyɛ wəndə wale wale va nya kwaɗakɛ wəndə kemte mte ŋkɛ, nda kwaɗakɛ kwete hwa wəshia shɛhɛ ŋkɛ ne, katenza wəsəa shɛ wale wale na?» -- «E'e», ke ka dzeghe Shala zhɛnete nda.

¹⁴ Tagha gɛ, ma ke Azhɛ sha hɛ: «Yawa, wa nya ghena nya geze Mahwətə nya: ‹Tsetse nza ta mbeli nyi te hɛɗi nya ba'a nza ta wəshi nyi mene hɛ. Nahe pɛtɛa wəshi nyi dzeghe ɗa melɛ hɛ le hɛ kenza wale wale.›»

Ntsehwele mə se ɓeshi nya

¹⁵ Ma ke Shala zhɛkwa: «Ma tsetsenya gɛ, ntsehwele mə yitea wəshi nyi ketemene geva se mɛa ɓeshi nya kajive mbe kema. Ma nda tegha yɛ kazhɛne kaŋa ghɛa ɗa, 'ya Mahwətə le pelɛ ne,

¹⁶ wa wəsə nya ketemene ŋayɛ geva wa? Ma vəa ŋkwa nya dzeme tame wəndə kanewe ha bakemsə kwa 'yɛmbe ne, deke meŋe kemave ŋkɛ. Ma vəa ŋkwa nya lə wəndə ka'yɛ litrəa tɛ mcɛfemsə same kwa weta ne, deke bakemsə kemave ŋkɛ.

¹⁷ Nahe 'ya kebezemte wəshi nyi menete yɛ pɛtɛ: nahe 'ya keghwelemte yɛ ha te wəve keɗema kemenete hɛ kawəbəghə, nahe 'ya kebetekawa kwacakelɛ, ama kese yɛ kazhɛne geva kase sha 'ya, 'ya Mahwətə we.

¹⁸ Ntsehwele mə yitea wəshi nyi ketemene geva se mɛa ɓeshi nya kajive mbe kema. Se te veci nya ghate geva shihəa ghɛa ɗa, se te hɛ bakemsə wəfaɗeghəmbe te tere kwa mesli ne, ntsehwele mə.

¹⁹ Kezhɛne ha kanza dzeyi kwa yɛ tame we. Kezhɛne yɛ rɛzɛŋe, yɛ dasekwa, yɛ kwakweme ba'a yɛ bekele kaya we. Yawa, se mɛa ɓeshi ne, 'ya katewəpi ŋayɛ.»

Yɛ meɗe mɛ ke Zorobabɛl nya ntave Shala

²⁰ Te vecia shɛnyɛ, mbe hɛ kwa bakemsə wəfaɗeghəmbe ta tere ne, ma ke Mahwətə zhɛne kagezete nda ghena ke Azhɛ:

²¹ «Ma pa na sha Zorobabɛl, ŋgwamna nya mbe Zhəwda: 'Ya kategaŋkəɗə yɛ ghweme le hɛɗi.

²² 'Ya katefə ka meghea kɛfi 'ya sawa pelɛ pasla ta nci ba'a 'ya katekiɗi berete ta hɛɗi meghe nyi te hɛɗi lema. 'Ya katedzəɓə wəmata gədəwə le mbeli nyi kezleɗe hɛ, katempə gədəwəa lɛmə, kateghazle ghəa nci ka zleɗe gədəwəa lɛmə.

²³ Ama te vecia shɛ, kateve ŋa slene 'ya, 'ya Mahwətə nde berete Zorobabɛl, gha nya kande mene ɗa slene ta ɗa, 'ya Mahwətə. Katenza na kala lamba ta ɗa, kwa nza ŋkɛ gha yantave 'ya. Nya ya kaghena nya geze 'ya, 'ya Mahwətə nde berete.»