Amos 8 - Ghena ta Shala

Kwa wəfaɗe ta wəsə nya nakɛ ŋkɛ: kwaciga ta ya ta wəfe

¹ Pa Shala Mahwətə ncɛte ɗa kwaciga ta ya ta wəfe nyi kenehe nehe zhɛkwa.

² Ma ke 'yɛwakɛ va 'ya: «Amos, wa yanewe na wa?» Ma 'ya zhɛnete nda: «Kwaciga ta ya ta wəfe nyi kenehe nehe.» Tagha, ma ke Mahwətə sha 'ya: «Nahe ka Israyɛl, mbelia ɗa kenehe kala ya ta wəfe. Katezhɛne 'ya kakele jaɗafa ta nci te wənə we.

³ Ma te veci nya teɗa hɛ 'ya, 'ya Shala Mahwətə ne, kaŋələvə tezhɛre cimə nyi ki ghɛa meghe. Kwele kwele tenza mbeli nyi kempə mpə te yayata ŋkwa. Shawe tenza ŋkwa te yayata ŋkwa.»

Mbəɗəkwəa ka zhɛre dzeve

⁴ Fa mə ghena nya gɛ, gheyɛ nyi kedzeghwa te ka titikwəa kɛfi, gheyɛ nyi keza sebe te ka gwedəa kɛfi nyi te hɛɗi!

⁵ Ma pe yɛ sha geze: «Mtenyɛ tere kahe kahe kezha tepamte ha n'yɛ. Kiɗinyɛ veci kezhɛne mpi kahe kahe kezha ghwene tame n'yɛ. Katembeɗe wəsə kedzeghe wəshi n'yɛ, katembake səkəməa wəshi n'yɛ ba'a katemene mbəɗəkwə n'yɛ le kiləwə.

⁶ Katepa ka dewə berete n'yɛ te cɛdɛ ba'a nde titikwə te tsahwa meslɛcɛ. Pa le ha nyi kefəhwe fəhwe tepamte n'yɛ.»

⁷ Ma ke Mahwətə zemete fela: «Le hɛɗi nya nza nya ka Israyɛl fare fare yite ne, katezaghə wəshi nyi menete hɛ 'ya tɛape we.»

⁸ Vatse gɛ ne, kategaŋkəɗə hɛɗi, pɛtɛ tenehwene mbeli nyi te. Katewepe geva ŋkɛ pɛtɛ kala hələ, katedzeme ŋkɛ ba'a katesawa ŋkɛ kala hələa Ɛzhipte.

⁹ Ma ke Shala Mahwətə: «Ma te vecia shɛ ne, katepəkwə veci 'ya talala ŋkɛ kwa ghə ba'a katemene geva viɗi veci te hɛɗi.

¹⁰ 'Ya katezhɛre yɛ gəsəkəa ŋayɛ kanehwene ba'a pɛtɛ ciməa ŋayɛ kaŋgaɗe ghə. Pɛtɛa mbeli katehwepe wəsə hwa hwə. Pɛtɛ tenza ghə keŋsə ŋsə kala wəsə nya mte wəzege kwetɛ. Kala veci nya 'yaghwa tekiɗi ŋkɛ.»

¹¹ Ma ke Shala Mahwətə: «Katese veci nya teghwene ma 'ya kadzete hɛɗi. Katezhɛ nda ma ke mbeli, ama ma te ɗafa we. Katezhɛ nda ndere ke hɛ, ama ndere ta yɛmə we. Katezhɛ nda ma ba'a ndere ta fa ghena ta ɗa ke hɛ.

¹² Katendeŋe hɛ se mɛa kwete ndərə hwa'a mɛa kwete, se laka bela kwa gwela hwa'a laka ŋkwa nya same veci kezha zele kafa ghena ta Mahwətə, ama katekemave hɛ we.

¹³ Ma te vecia shɛ ne, katempə deghelɛshi nyi ganji ganji ba'a ka mempɛhwetɛti va ndere.

¹⁴ Katezeme fela kweci mbeli le shala ta ka Samari. Ma ke hɛ sha tegeze: ‹Le shala ta ŋa, Dan!›, keɗema ‹Le hweŋkwa nya keveyi geva tekeleke kadzembe Bɛrshɛba!› Pɛtɛ tebete hɛ te hɛɗi kashɛma sate te ŋkwa.»