Amos 5 - Ghena ta Shala

Ŋgaɗe ghə ta nde mɛ ŋkwa yitea ka Israyɛl

¹ Ka Israyɛl, fa mə ghena nya, ghə nya ŋgaɗe 'ya yitea gheyɛ:

² Kala degheli nya kemte mte Israyɛl. Nahe nde keteɗenyɛ, katezhɛne nde kasate we. Ɓelayɛ nde te hɛɗia nta, wəndə shɛ kezha kese ŋkɛ sate te ŋkwa we!

³ Kwa nza ŋkɛ ne, wa nya ghena nya geze Shala Mahwətə te ghəa ka Israyɛl nya: «Ma meleme nya keghweneghe mbeli slibə kadzemte mpa ne, deke mbeli gwəmsə ka tetene. Ma nya keghweneghe gwəmsə ne, deke mbeli meŋe ka tetene.»

Mahwətə kaheka ŋkwa kezha zhɛre nza

⁴ Wa nya ghena nya geze nda Mahwətə ke ka Israyɛl nya: «Ma keɗe yɛ kanza teghweme ne, zele ɗa mə.

⁵ Ama zele ɗa ma yɛ mbe Bɛtɛl ma, dzembema Gilgal yɛ ma, ləma Bɛrshɛba yɛ ma. Kwa nza ŋkɛ pɛtɛ tefə ka Gilgal mbeli ba'a zlɛcɛ teza sebe te Bɛtɛl.»

⁶ Ma keɗe yɛ kanza teghweme ne, zele mə Mahwətə. Ma keɗema ŋkɛ tsagha ne, katedzeghəa hwelefe ta Zhozɛf ŋkɛ kala ghwə nya ketetse mbe Bɛtɛl kaɗema wəndə shɛ kapesle.

⁷ Nahe wəsə nya tiɗiɗi kezhɛrenyɛ kanya ndɛalɛa, nahe mbeli keŋkeɗemte kaganda.

⁸ Gheŋkɛ nde pate yɛ saseregwa, ka danehi ba'a ka kese sla. Gheŋkɛ nde zhɛre viɗi kaveci, nde zhɛre veci diŋwə diŋwə kala viɗi, nde heka yɛmə same kwa ndərə kezha ɓasle ŋkwa nya te hɛɗi. Mahwətə ya kasləa ŋkɛ.

⁹ Gheŋkɛ nde ve nda hweŋkwa ke mbeli kafə wəshia nde berete ba'a kaŋzla meleme nya nza zli yite.

¹⁰ Kaɗe ghena ta wəndə nya keɗema mbəɗəkwə te ghwə hɛ we, kaɗe ntsə ta wəndə nya kegeze kaganda hɛ we.

¹¹ Dɛke yadɛke nda seɗa yɛ yitea ghə ke nde titikwə laka fə ha ta ŋkɛ. Vatse gɛ ne, katenza yɛ mbe ghɛ ganji nyi ŋate nyi yɛ le pelɛ nyi ketsehe tsehe we, katendɛme tɛa wəfe ta rɛzɛŋe nyi ganji ganji nyi mɓete nyi yɛ yɛ we.

¹² Kwa nza ŋkɛ nahe 'ya keɗepe kwelea fete nyi menete yɛ, nahe 'ya keɗepe ɗaŋeɗa ta jaɗafa ta ŋayɛ: kadɛke nda seɗa yɛ yitea ghəa ke mbeli nyi kemenetema fete, ka meha ghwə ɗafa yɛ, kasa nda yaka yɛ ke ka titikwəa kɛfi te ghwə.

¹³ Və nya ndiremi və nya, vatse ɗema nde ntsehwele ntsehwele kageze ghena.

¹⁴ Zelema wəsə kwa ndiremi yɛ ma, ama wəsə kwa ganyɛ yitea nza yɛ teghweme. Ma tsagha, katenza Shala Mahwətə nde berete le gheyɛ kala nya geze nya yɛ.

¹⁵ Sərəakɛ mə wəsə kwa ndiremi, ɗe mə wəsə ganyɛ. Zhɛneyi mə kaganda te ŋkwa kemeha ghwə, nda kwete katezhɛ heli Shala Mahwətə nde berete yitea hwelefefia Zhozɛf nyi ketene teghweme.

¹⁶ Vatse gɛ ne, wa nya ghena nya geze Shala Mahwətə nde berete nya: «Ma te pɛtɛa ŋkwa nyi beke mbeli ne, katefa nehwene mbeli. Ma dzeyi kwa yɛ pɛtɛa hweŋkwa ne, ‹A kemagɛaŋwa, a kemagɛaŋwa› ke mbeli sha tetsa lewela. Kateheka ka wəza mbeli yitea nehwene ba'a mi nyi kegha nehwene gela kezha shiŋəli.

¹⁷ Ma dzeyi mbe yɛ wəvea rɛzɛŋe ne, ŋgaɗe ghə nde tenza shɛ te veci nya tedzeyi 'ya hwa gheyɛ.» Mahwətə nde gezete.

Vecia meha ghwə ta Mahwətə

¹⁸ Ndiremi ya te mbeli nyi keneghe vecia meha ghwə ta Mahwətə! Tsema tenza vecia Mahwətə kaŋa ŋayɛ wa? Kavecia waŋe tenza ŋkɛ na? Ewə: kavecia ŋkwesle tenza ŋkɛ!

¹⁹ Kala wəndə nya kehwɛ va nivɛrə kalə kabegeme le mtsekwele tenza ŋkɛ. Ma kwa dzeki ghɛa ŋkɛ ŋkɛ, dɛŋe ke sha dzeve vare dewe ne, ndaŋwe shishi ndeke nda slene!

²⁰ Kavecia waŋe tenza vecia Mahwətə na? Ewə, kaveci ŋkwesle, kaveci nya zhikwətəkwə tenza ŋkɛ, kaɗema waŋe shɛ ya ci'a.

Shala ɗema hawe ta ka Israyɛl ve

²¹ Nahe 'ya keɗema yɛ gəsəkəa ŋayɛ, keɓela hɛ 'ya we. Mba 'ya kandahwe yɛ tsene ta ŋayɛ we.

²² Ma kenza yɛ kadzeghe ɗa melɛ kwa tere tere ba'a kafə ɗa wəshi gəmə ne, ndeɗehwe ɗa hɛ we. Ma melɛ nyi dzeghe nyi yɛ le wəshi keseɗa nyi dɛɓedɛa dɛɓedɛa ne, kanewe hɛ 'ya we.

²³ Sərəakɛ mə gha ciməa ŋayɛ kwa sleme ta ɗa. Kazhɛne 'ya kafa tsa ta gagera ta ŋayɛ we.

²⁴ Ama gwezha gwezha nza tiɗiɗi kala yɛmə ba'a hwɛ kaganda kala hələ nya keɗema kashifə.

²⁵ Ka Israyɛl, ma mbe va nyi menete nyi yɛ wəfaɗemsə kwamte te ɓerama ne, nahe yɛ kedzeghekɛ ɗa melɛ ba'a kefəke ɗa wəshi gəmə na?

²⁶ Ama tsetsenya ne, ashɛ kele yakele wəshi nyi menete yɛ le dzeve ta ŋayɛ: yɛ Sakəwt nya kameghea ŋayɛ ba'a nya kashala ta ŋayɛ le Kɛwan nya kasaseregwa ta ŋayɛ ba'a nya kashala ta ŋayɛ yɛ wəka?

²⁷ Vatse gɛ ne, 'ya katefə ŋayɛ zlake ke Damas. Mahwətə nya nza sləa ŋkɛ kaShala nde berete nde gezete.