Amos 4 - Ghena ta Shala

Meha ghwə ta Mahwətə te mia ka Samari

¹ Ma gheyɛ mia ka Samari nyi dɛɓedɛa dɛɓedɛa kala ŋemia sla nyi mbe Bashan ne, fa mə ghena nya: kaɓela ka dewə ŋeli yɛ we, yaka yasa nda yɛ ke ka titikwəa kɛfi. Ma pe yɛ sha geze nda ke zhilia ŋayɛ: «Keleke wəsə kesa kezha sa mə.»

² Ma ke Mahwətə zemete kafela: «Kaganda ne, katese kwete veci nya tekese ŋayɛ mbeli le dzara kala kelepe ba'a ŋwalea ŋayɛ le kwaslerakacɛ.

³ Katehwɛ yɛ dzawa te ŋzla nyi te zli, yayata wəndə laka ŋa ŋkɛ ŋkwa. Katebete geva yɛ laka ghweme ta Hɛrmon.» Nya ya kaghena nya gezete Mahwətə.

Te ghəa zele shala nya keɗema kakete ŋkwa

⁴ Ma ke Mahwətə: «Ka Israyɛl, dzembe mə Bɛtɛl kamene beze ghena, dzembe mə Gilgal kamtsehete beze ghena. Dzeghe mə melɛ kiɗima ta ŋkwa, fə mə kwa meŋe ta bela ta wəshia ŋayɛ kase te kwa mahekene ta hɛ.

⁵ Tere mə yɛ ɗafa kwalekwala te reghwetɛ kamelɛ ketsa hana ta ŋayɛ. Zlape mə wəshi gəmə nyi fəke ɗa yɛ le ɗe ta ŋayɛ, kwa nza ŋkɛ wəshi nyi kala nyi yaɗe yɛ, gheyɛ ka Israyɛl.» Nya ya kaghena nya gezete Shala Mahwətə.

Ntɛaŋentɛa ghəa ka Israyɛl

⁶ Ma ke Mahwətə: «Mbe meleme ta ŋayɛ pɛtɛ ne, nahe 'ya keghwename ma, nahe 'ya kendaŋete ŋayɛ te wəshi kezeme te yayata ŋkwa, ama kese yɛ kazhɛne geva kase sha 'ya we.

⁷ Nahe 'ya kefɛake ŋayɛ va katere mahekene nda tenaka wəshi te wəve. Nahe 'ya kemame va mbe kwete meleme kaɗema mbe kwete. Nahe kwete wəve kekemave va, ama keghwele ghwele kwete va titikwə va.

⁸ Kemeleme kemeleme se mbeli kadzeghwa kezha zele yɛmə kasa, ama keketekɛ hɛ we. Ama kese yɛ kazhɛne geva kase sha 'ya we. 'Ya Mahwətə nde gezete.

⁹ Nahe 'ya kezhɛremte ha ta ŋayɛ kawəbəghə ba'a keghwelemte ŋkɛ kwamte te wəve. Pɛtɛ dzale kezehwe wəshi nyi kwa ntsa ta ŋayɛ ba'a wəfe ta rɛzɛŋea ŋayɛ, tsagha yɛ dasekwa ba'a yɛ bekelea ŋayɛ, ama kese yɛ kazhɛne geva kase sha 'ya we. 'Ya Mahwətə nde gezete.

¹⁰ Nahe 'ya keghweneke ŋayɛ ba kala nya kempəmte wəshi keseɗa kwa Ɛzhipte. Nahe 'ya kepelakɛ ka ghema kampə ka mempɛhwetɛtia ŋayɛ ba'a kafə yɛ gədəwəa ŋayɛ. Hərəkə ŋkwa nya mbe ŋshia ŋayɛ va zəŋwə ta mbeli nyi kempə mpə mbe ghedəkwəa ŋayɛ, ama kese yɛ kazhɛne geva kase sha 'ya we. 'Ya Mahwətə nde gezete.

¹¹ Nahe 'ya kedazeɓemte ŋayɛ pɛtɛ kala nya bezemte geva yɛ Sodome le Gomore vəashi, kala metəlikeghwə se yɛ, ama kese yɛ kazhɛne geva kase sha 'ya we. 'Ya Mahwətə nde gezete.

¹² Vatse gɛ Israyɛl, katenewe wəsə nya temene ŋa 'ya na. Ma kwa nza ŋkɛ tsagha temene ŋa 'ya ne, hite geva kezha begeme le Shala ta ŋa.»

¹³ Kwa nza ŋkɛ ne, gheŋkɛ nde pate yɛ ghweme, nde pate sefə, nde ncɛ nda zəzə ta ŋkɛ ke wəndə ŋelɛ nde zhɛre viɗi kaveci, nde dzeghwa dzeyi kwa ghəa wəmbə nyi te hɛɗi. Shala Mahwətə nde berete ya kasləa ŋkɛ.