2 Timotɛ 4 - Ghena ta Shala

Zlape ghena ta Shala

¹ Ma 'ya sha gha gheci gheci kwa kema ta Shala ba'a Yɛsə Kriste nya ketemeha ghwə te mbeli nyi teghweme ba'a nyi kempə mpə, te sləa nca ta Kriste ba'a meghea ŋkɛ:

² zlape nda ghena ta Shala ke mbeli le ntsə geva, ya və nza ganyɛke keɗema ndiremike. Ncɛ nda fete ta nci ke mbeli, ŋele hɛ ba'a ntsə nda berete ke hɛ le zereghe ghena mbe wəshi nyi teke nda na ke mbeli.

³ Kwa nza ŋkɛ katese kwete və nya teɗema mbeli kazhɛne kafa teke wəsə nya tiɗiɗi, ama katezele wəshi nyi mawe geva ta nci hɛ. Kateheka ka teke nda wəshi ke mbeli nyi ketegeze nda wəsə nya zeɗehwe nda ke hɛ hɛ.

⁴ Katezhɛremte sleme ta nci hɛ va fa kaganda kezha zhɛre nda geva ke ghena heca.

⁵ Ama gha gɛ ne, ntsehwele yitea pɛtɛa wəshi nyi mene na, zereghe yaka, mene slene ta zlape ghena kwatenca nya ganyɛ, nza kawəndə ganyɛ nya kemene slene ta Shala.

Nahe vəa slə ta ɗa kese

⁶ Ma 'ya kwa ŋa ɗa ne, nahe 'ya kenza kala wəsə nya tedzeghe melɛ mbeli le. Nahe vəa slə ta ɗa kese.

⁷ Nahe 'ya kempamte mpa ganyɛ, nahe 'ya kekiɗimte wampelɛa mpelɛa ta ɗa, nahe 'ya keyate yɛ ta ɗa.

⁸ Ma tsetsenya ne, mbe neghe ɗa zhɛme ta nza mpelɛa: gheŋkɛ derə meghea nza tiɗiɗi nya teve ɗa Nde sleke ŋkwa nya kande meha ghwə nya tiɗiɗi te vecia meha ghwə. Deke ke 'ya ve ɗa ŋkɛ we, ama ke pɛtɛa mbeli nyi keneghe se ta ŋkɛ le ɗe.

Pol kancɛ nza ta ŋkɛ

⁹ Ntsə geva kase sha 'ya kahe kahe.

¹⁰ Kwa nza ŋkɛ nahe Dɛmas kesərəakɛ ɗa, va nya ɗehwe nza nya tsetsenya nya ŋkɛ, nahe ŋkɛ keslə kadzembe Tɛsalonike. Nahe Krɛsaŋe kedzembe Galate ba'a Tite kedzembe Dalmasi.

¹¹ Deke Ləwke nde tene teke yitea 'ya. Hekakɛ Mark kase yitea gha, kwa nza ŋkɛ kwele kwele tekemane ɗa ŋkɛ mbe slene.

¹² Nahe 'ya keghwenakɛ Tishike kadzembe Ɛfɛze.

¹³ Ma vəa ŋkwa nya tese na ne, kelete ɗa karalame nya sərəakɛ 'ya ki ghɛa Karpəs mbe Trowas, fəte ɗa yɛ palepa, halama yɛ palepa kwa peɗe peɗe.

¹⁴ Nahe Alɛgezandre, nde gezla wəshi, kemenete ɗa wəsə kwa ndiremi kwele kwele, Nde sleke ŋkwa nde temene nda kala slene nyi menete ŋkɛ.

¹⁵ Ntsehwele yite, gha perə, kwa nza ŋkɛ kwele kwele se ŋkɛ kaɗema ta ɓəmə.

¹⁶ Ma te kwa ghate ta zhigəa ɗa kampa yitea ghəa ɗa te ghwə ne, wəndə shɛ kese kakemane ɗa we, pɛtɛ wəfəyite ɗa hɛ. Mba Shala keɓela wəsə nya menete hɛ.

¹⁷ Ama nahe Shala kekemanakɛ ɗa ba'a kendeke ɗa berete, kezha geze ba'a kezha fave nda ghena ta ŋkɛ 'ya ke pɛtɛa kweci hwelefefi. Nahe ŋkɛ kembeleke ɗa shave mbe mɛ nivɛrə.

¹⁸ Katembele ɗa Nde sleke ŋkwa va yayata wəsə kwa ndiremi, katekele ɗa ŋkɛ kadzembe Meghea ŋkɛ nya pelɛ ghweme lɛŋe lɛŋe. Ŋa ŋkɛ zləvə kaghala ghala. Amɛn.

Ka keɗaŋe ta njiŋwe ŋkwa

¹⁹ Njiŋwakɛ yɛ Prisile le Akilas, tsagha yɛ Onɛzifore le mbelia ŋkɛ.

²⁰ Nahe Ɛraste kenzanyɛ mbe Korɛnte, nahe 'ya kesərəakɛ Trofime mbe Milɛ, va nya nza ŋkɛ shewə.

²¹ Megela ma se na kahe kahe nda tese vɛa. Kanjiŋwe ŋa Ebələs, Pədanse, Linəs, Kolodiya ba'a pɛtɛa kweci ka kesaka ma.

²² Pa Nde sleke ŋkwa nza le gha. Pa zlaɓa ta Shala nza le gheyɛ pɛtɛ.