2 Timotɛ 2 - Ghena ta Shala

Sewajɛ nya dɛŋe dɛŋe te Yɛsə Kriste

¹ Ma gha gɛ wəzege ta ɗa, nza bereteke mbe zlaɓa nya kemave mə mbe Yɛsə Kriste.

² Ma ghena nya fate na va 'ya te kema ta ka negha fete kwele kwele ne, dapate nda ŋkɛ te dzeve ke mbeli nyi gezleŋema ghə mbeli va hɛ, nyi gare teke nda ŋkɛ ke kweci mbeli.

³ Sa yaka kala 'ya kala sewajɛ nya dɛŋe dɛŋe te Yɛsə Kriste.

⁴ Ma sewajɛ nya dɛŋe dɛŋe ne, kadambeghənyɛ ŋkɛ yitea zele ghena ta nza, keɗe ŋkɛ kanza kawəndə ganyɛ sha wəndə ke gheŋkɛ we.

⁵ Tsagha shɛ ŋkɛ wəti perə, ma nda nza nde wəti kahərəte ŋkwa ne, nda ŋkɛ kawətite wəti kala ghena nyi kegezete geva te ghəa wəti.

⁶ Ma nde wəza nya kewəzakɛ wəza le yaka ne, gheŋkɛ nde hi kakemave wəshi nyi kese te wəve mpelɛa.

⁷ Zəzəte ghena nya gezete 'ya. Ma nyi ketene ne, Nde sleke ŋkwa nde tefave ŋa hɛ.

⁸ Zəzəte Yɛsə Kriste nya kesamenyɛ kwa kwele le mpi, nya kahwelefe ta David, kala nya gezete Ghena kwatenca nya ganyɛ nya zlape 'ya.

⁹ Tewəmbəreke Ghena kwatenca nya ganyɛa shɛ sa yaka 'ya ba'a nza 'ya kwa daŋgayɛ kala nde mefətekwə. Ama kenza ghena ta Shala kwa lɛ we.

¹⁰ Vatse zereghe pɛtɛa wəshi 'ya kezha mbeli nyi tsehave Shala, yitea kemave mbele hɛ mbe Yɛsə Kriste, tsagha zləvə nya kaghala ghala.

¹¹ Wa nya ghena nya kaganda nya: Ma kenza nde nahe gheɓəmə kempə jikə le ne, katenza gheɓəmə teghweme jikə le perə.

¹² Ma kenza gheɓəmə kasa yaka jikə le ne, katezeme meghe gheɓəmə jikə le. Ma keɗema Yɛsə gheɓəmə ne, kateɗema ɓəmə ŋkɛ perə.

¹³ Ma keɗema gheɓəmə dɛŋe dɛŋe te ne, kanza ŋkɛ dɛŋe dɛŋe, kwa nza ŋkɛ kaɗema ghəa ŋkɛ ŋkɛ we.

Nde mene slene nya dɛŋe dɛŋe te slene ta ŋkɛ

¹⁴ Zəzəte nda ghena shɛ pɛtɛ ke hɛ, meɗe hɛ mbe kema ta Shala yitea ɗema hɛ kaghəpə te ghena ghweleme. Kwete wəsə mbe we, deke beze yabezemte mehele ta mbeli nyi kefa ŋkɛ.

¹⁵ Ntsə geva kanza kala nya kehi kwa kema ta Shala, kala nde mene slene nya keɗema kahawe va slene ta ŋkɛ, nya kegeze nda ghena nya kaganda ke mbeli tiɗiɗi.

¹⁶ Ya ghəa ŋa va ghena ghweleme ba'a nyi keɗema kehi laka yɛ. Kwa nza ŋkɛ ma mbeli nyi kezele ghena ghweleme ne, katelə hɛ cakeɗake le Shala.

¹⁷ Ma wəsə nya teke nda hɛ ke mbeli ne, kala zhiwəva nya kwa zhi nya kezeme geva ta mbeli ŋkɛ. Hwa mbelia shɛhɛ yɛ Himɛnɛ le Filɛte.

¹⁸ Cakeɗake mbelia shɛhɛ yitea ghena kaganda, va nya gezete hɛ nahe mbeli kesame kwa kwele. Ma tsagha ne, yɛ ta mbeli kwele kwele yazhɛremte hɛ.

¹⁹ Ma ya tsagha ŋkɛ ne, mba shihə nya veyi Shala bereteke shanda. Wa nya ghena nya kerafete geva te nya: «Nahe Nde sleke ŋkwa keɗepe mbelia ŋkɛ», ba'a: «Ma yayata wəndə nya kehekɛme sləa Nde sleke ŋkwa ne, kahwɛ ŋkɛ cakeɗake va mashiwəshi.»

²⁰ Ma ki ghɛ nya wəba ne, deke helape mze kwa tere tere ba'a ŋa mze kwa tɛawetɛa ya ki we, ama kwalekwə wəfe ba'a helape rekɛ nyi ɗema zləvə te hɛ ya ki. Kezha mentiɓə kweci, kezha mene wəshi nyi ɗema zləvə te hɛ kweci.

²¹ Ma keyaɓemte ghəa ŋkɛ wəndə va mashiwəshia ŋkɛ kala nya geze 'ya ne, kawəndə ganyɛ tenza ŋkɛ kezha slene ganyɛ, kwa nza ŋkɛ ne, kaŋa wəndə kesleke ŋkɛ fate fate, megela ŋkɛ shɛ, kehi hi ŋkɛ kamene yayata slene ganyɛ.

²² Hwɛ ŋa va wəshi nyi mawe mempɛhweta, zelete nza tiɗiɗi, yɛ, ɗe, kwelɛŋe le mbeli nyi kehekɛme sləa Nde sleke ŋkwa le wənə nyi wɛŋe wɛŋe.

²³ Neghamte ghena ta ka gezhia kɛfi ba'a ŋa ka dewə ntsehwele. Nahe na keɗepe mpa yamtse hɛ.

²⁴ Kwa nza ŋkɛ ne, kehi nde mene slene ta Nde sleke ŋkwa kaghəpə le mbeli we. Kawəndə nya ɗe mbeli pɛtɛ, nya gare teke nda wəshi ke mbeli ba'a gare zereghe ghena hi ŋkɛ.

²⁵ Nda ŋkɛ ka'yɛ ka ghema ta ŋkɛ le gwedəa mehele, nda kwete kateve nda hweŋkwa kezhɛre wənəa nci Shala ke hɛ kezha kaɗepe kaganda hɛ.

²⁶ Tagha gɛ, katese mehele ta nci ba'a katembele ghəa nci hɛ va keleŋa ta gətəli nya kekeseve hɛ kezha mene ɗe ta ŋkɛ.