2 Saməyɛl 7 - Ghena ta Shala

Ghena kelɛŋəa Natan

¹ Ma kwa dzeki ghɛa ŋkɛ meghe David kanza ki ne, nahe Mahwətə keyate ŋkɛ va ka ghema ta ŋkɛ nyi kentəsləte hɛɗia ŋkɛ.

² Ma te kwete hɛ ne, pa meghe gezete nda ke nde mɛ ŋkwa Natan: «Newema nza ta ɗa gi, mbe cɛ nya menete mbeli le sheghwə lekeleke 'ya ne, ama mbe cɛ lekwesa səndəkwəa Shala, nya kala ghɛa ŋkɛ. Tsema zəzə na te wa?»

³ Ma ke Natan sha maze: «Fəyitekeghə, zəzə ya va gha te ghəa ŋkɛ. Menete wəsə nya ɗe na, kwa nza nde le gha Mahwətə.»

⁴ Ama te viɗia shɛ, ma ke Mahwətə gezete nda ghena ke Natan:

⁵ «Kwiɗi sha nde mene slene ta ɗa, David gezete nda ghena ta ɗa: 'Kaganda geze 'ya, 'ya Mahwətə, gha nde teŋa ɗa ghɛ kanza 'ya mbe we.

^6-7 Kwa nza ŋkɛ ghala fəakave ka Israyɛl 'ya mbe Ɛzhipte pa ɓeshi nya, nahe 'ya kegha kanza mbe ghɛ na? Ama kwa beghe ka Israyɛl 'ya ne, deke cɛ lekwesa ŋkwa nya nza 'ya mbe. Ɓiyitsa mbe vəa shɛ ne, nahe 'ya kendeke nda ke mbelia nyi te ghə kwele kwele kasleke mbelia ɗa, ka Israyɛl. Ama kegha 'ya kageze sha wəndə: ‹Wa raberə ɗema yɛ ŋate ɗa ghɛ le sheghwə lekeleke wa?›, a 'ya we.

⁸ Vatse, pa na geze nda ghena ta ɗa ke nde mene slene ta ɗa David: ‹'Ya Mahwətə nya kesleke wəshi pɛtɛ, kwamte kaya wəshi na kwa sebe ta timɛti nda keleke ŋa 'ya, 'ya ɗete kezha nza na kawəndə nya te ghəa mbelia ɗa, ka Israyɛl.

⁹ Le gha se 'ya te yayata ŋkwa nya se na te. Nahe 'ya kempəmte ka ghema ta ŋa te kema ta ŋa. Pa 'ya veyi sləa ŋa kanya wəba kala ka meghe nyi te hɛɗi pɛtɛ.

¹⁰ Kateve nda ŋkwa 'ya ke mbelia ɗa ka Israyɛl. Kave hɛ 'ya te ŋkwa shɛ, katenza hɛ kaɗema ghazlənə shɛ. Kase ka ndiremia mehele kampə hɛ kala nya vəashi,

¹¹ kala nya veyi ka meha ghwə 'ya kamene meghe te ka Israyɛl mbelia ɗa we. Nahe 'ya kembelete ŋa va ka ghema ta ŋa pɛtɛ, nda se na kanza nza ta ŋa kwelɛŋe. Tagha gɛ, ma 'ya sha tegeze ŋa: 'Ya le ghəa ɗa, Mahwətə, nde teŋa ŋa ghɛ.

¹² Kwa nza ŋkɛ ma te veci nya tekiɗi mpia ŋa, kelə na sha ka shihɛ ŋa, katenta kwete 'ya kwetɛŋe hwa ŋwalea ŋa kanza kamaze te sebe ta ŋa, kave meghea ŋkɛ 'ya kakwa berete.

¹³ Gheŋkɛ nde teŋa ɗa ghɛ kaŋa sləa ɗa, te zlaɓa ta ɗa nda tenza meghea ŋkɛ kaghala ghala.

¹⁴ Kayitenyɛ tenza 'ya, kawəzege ta ɗa tenza ŋkɛ. Ma kemenete wəsə kwa ndiremi ŋkɛ ne, nda 'yɛ 'ya kala nya mene wəndə ŋelɛ, kala nya ɗa wəzege ta ŋkɛ yita.

¹⁵ Ama kakelemte ganyɛ nya mene nda 'ya 'ya ya tsemanyɛ ŋkɛ, kala nya kelemte 'ya va Sawəl we. Nahe 'ya keneghamte Sawəl kezha ve ŋa te ŋkwa ŋkɛ.

¹⁶ Kwete mbe hwelefe ta ŋa ne, kameghe tenza ŋkɛ kaghala ghala kwa sebe ta ŋa. Berete ta meghea hwelefe ta ŋa ne, kaghala ghalanza ŋkɛ.›»

¹⁷ Pɛtɛ Natan ɓelamte nda ghena shɛhɛ ba'a wəsə nya nakɛ ŋkɛ ke David.

Səkwə ghə ta David

¹⁸ Ma ɓiyitsa gɛ, pa meghe David lə kadzawa kema ta Mahwətə. Ma ke shɛ: «Shala Mahwətə ta ɗa, nahe 'ya keɗepe kaɗema 'ya le mbelia ɗa wərə ghen'yɛ gare kemave wəsə nya ndeke n'yɛ na pa tsetsenya we.

¹⁹ Ama sha gha ne, kawəsə ɓɛhwɛ ŋkɛ kwa kema ta ŋa Shala Mahwətə ta ɗa. Nahe na kemenete meɗe mɛ kezha və nya ketese kaŋa hwelefe ta ɗa. Tsagha ghena ta ŋa kaŋa wəndə ŋelɛ Shala Mahwətə.

²⁰ Wa kwete ghena nya nza 'ya kagezete ŋa zhɛkwa kwa nza nde nahe na keɗepe nde mene slene ta ŋa wa Shala Mahwətə ta ɗa?

²¹ Kwa nza ŋkɛ kala ghena ta ŋa nya meɗeyi na kwa ɗehwe ɗa na, vatse menete wəshi meŋele nyi na, pa na ncɛte ɗa.

²² Shala Mahwətə ta ɗa, wəbake na kaganda! Wəndə shɛ nya keyipə le gha we. Kwete Shala shɛ keɗema gha kala nya fate ghen'yɛ ghalanza kageze mbeli we.

²³ Tsagha shɛ perə ne, kwete hwelefe shɛ te hɛɗi nya keyipə le ka Israyɛl we. Pa na se kambelemte hɛ, deke hɛ kwetɛŋe, va yaka nya te hɛ va ka Ɛzhipte ba'a va yɛ shala ta nci, kezha veyi hɛ kambelia ŋa. Pa na vate zləvə te hɛ, kwa menete wəshi meŋele na kezha hɛ kakwa hərə ŋkwa te hɛɗia ŋa.

²⁴ Pa na veyi hɛ kambelia ŋa kaghala ghala, Mahwətə, pa na veyi ghəa ŋa kaShala ta nci.

²⁵ Ma tsetsenya gɛ, Shala Mahwətə ta ɗa, menete wəshi nyi gezete na, yipəte ya hweŋkwa hweŋkwa ŋkɛ kala meɗe mɛa ŋa ke 'ya ba'a ke ka shihɛ ɗa.

²⁶ Pa sləa ŋa nza kewəbanyɛ kaghala ghala nda geze mbeli: ‹Shala ta ka Israyɛl, Mahwətə nya kesleke pɛtɛa wəshi ŋkɛ› ke hɛ! Veyi sebe ta meghea ɗa kakwa ndimə ndimə.

²⁷ Kwa nza ŋkɛ ne, Mahwətə nya kesleke pɛtɛa wəshi Shala ta ka Israyɛl, nahe na kencɛmte ɗa kandeke ɗa hweŋkwa. Katenza kwete hwa ka shihɛ ɗa kameghe kandimə ndimə te sebe ta ɗa. Vatse nza 'ya le berete kasəkwə ŋa kala nya.

²⁸ Shala Mahwətə, gha ya kaShala, ghena nya gezete na ne, katemene geva ŋkɛ! Nahe na kemeɗeyi ɗa ganyɛ nya tsetsenya!

²⁹ Ma tsetsenya gɛ, wəpikɛ mbelia ɗa kezha nza hɛ te meghe kwa kema ta ŋa kaghala ghala. Kala nya meɗeyi na, Shala Mahwətə, pa wəpi ta ŋa kanza kaghala ghala kənəa ghɛa ɗa!»