2 Saməyɛl 5 - Ghena ta Shala

David veyi geva kameghe mbe Israyɛl

¹ Pɛtɛa hwelefe ta ka Israyɛl kase sha David kwa Hɛbron, ma ke hɛ shɛ: «Hwelefe ta ŋa ghen'yɛ, pelə nya kwetɛŋe mə.

² Ma vəashi kwa nza Sawəl kamazea n'yɛ, gha ya te ghəa ka sewajɛa ka Israyɛl. Nahe Mahwətə kegezete ŋa: ‹Gha nde temene meghe te ka Israyɛl mbelia ɗa, gha nde tenza kameghea nci.›»

³ Pɛtɛ mbelia jama ta ka Israyɛl kase sha David perə kwa Hɛbron. Pa ŋkɛ menete meɗe mɛ le hɛ kwa kema Mahwətə, pa hɛ fikɛ kanza kameghea ka Israyɛl.

⁴ Va ta David mahekenemsə nda dzembe meghe ŋkɛ, pa ŋkɛ menete va wəfaɗemsə kamaze.

⁵ Kwa Hɛbron, pa ŋkɛ menete va mberefaŋe ba'a gasle yite, te ghəa ka Zhəwda, pelɛ Zhɛrəzalɛm ne, va mahekenemsə mahekeneghəmbe te ghəa mbelia Zhəwda le ka Israyɛl perə.

David kantishɛ mbe Zhɛrəzalɛm

⁶ Pa meghe David ba'a mbelia ŋkɛ have nda mpa ke ka Zhɛrəzalɛm. Ma ke ka Zhɛbəs nyi te ŋkwa shɛ le nza sha David: «Katedzembe meleme ta n'yɛ na we, ya ka ghwələa kɛfi ba'a ka gweleba kɛfi ne, katefɛa ŋa hɛ.» Ma laka ghena shɛhɛ ne, ghenci ɗe kageze kaɗema David kakelete meleme ta nci.

⁷ Nahe David kekelehwe zli kwa berete nya yitea Siyon, meleme ta David teheka mbeli.

⁸ Ma te kwete veci ne, ma ke David gezete: «Ma kenza wəndə kaɗe kaɗa ka Zhɛbəs ne, se laka ghɛ nya late mbeli mbe hɛɗi ha nda mpa wəndə ke hɛ.» Nahe David keɗema ghena ta ka gweleba nyighɛ le ka ghwələa kɛfi shɛ! Vatse nda geze mbeli: «Kaghwələ kɛfi le ka gweleba ne, kaɗe hɛ mbeli mbe cɛ kesəkwə ghə ta Mahwətə we.»

⁹ Pa David ntishɛ mbe ŋkwa kwa berete le zli yite, nya heka mbeli kameleme ta David. Pa pate kwete ŋkwa nya berete, kwelɛ ŋkwa nya heka mbeli kaMilo le ghɛa ŋkɛ

¹⁰ Tsetse ne, mbe kema mbe kema berete ta David mtsehete geva, kwa nza Shala Mahwətə nde berete ne, le David ŋkɛ.

¹¹ Pa Hiram, meghea ka Tir, ghweneghe nda mbeli ke David. Pa ŋkɛ fəke nda sheghwəa lekeleke ba'a ghweneke nda ka feɗe sheghwə ba'a ka tsehe pelɛ, kezha ŋa ghɛ meghe.

¹² Nahe David keɗepete Mahwətə nde veyi ŋkɛ kameghea ka Israyɛl ba'a nde vate zləvə te meghea ŋkɛ kezha ka Israyɛl, mbelia Shala.

Ŋwalea David nyi keya pelɛ Zhɛrəzalɛm

¹³ Ma kwa slə David mbe Hɛbron kadzeme Zhɛrəzalɛm ne, pa wəmeve kweci mi le mi meghwa, nyi yake ŋwale ŋkɛ le hɛ, ŋwale tezhili le ŋwalea kwɛ.

¹⁴ Wa nyi ŋwalea ŋkɛ nyi keya mbe Zhɛrəzalɛm nyi: Shaməwa, Shobab, Natan, Salomon,

¹⁵ Ibar, Ɛlishəwa, Nɛfɛg, Yafiya,

¹⁶ Ɛlishama, Ɛliyada ba'a Ɛlifɛlɛt.

Yɛ hərə ŋkwa ta David te ka Filisti

¹⁷ Pa ka Filisti fate na mbeli kefikɛ David kamazea ka Israyɛl. Pɛtɛ hɛ slə kadzeme le mpa kazele. Pa David fate, pa wəfərənyɛ te ŋkwa kwa berete.

¹⁸ Pɛkwe ka Filisti kazele kwa zlərəa Refay.

¹⁹ Ma ke David 'yɛwakɛ va Mahwətə: «Lə 'ya kampa le ka Filisti na? Katefəyi hɛ na mbeyitere berete ta ɗa na?» Ma ke Mahwətə shɛ: «Kwiɗi kampa le hɛ! Ghəpə yite we kave ŋa hɛ 'ya.»

²⁰ Pa David lə kadzembe Ba'al-Perasim, te ŋkwa nya ɗate ka Filisti ŋkɛ. Ma ke: «Nahe Mahwətə keghwenemte ŋkwa kwa kema ta ɗa kala nya ŋate ŋkwa mbeli te ghwa nya tsate mbeli.» Tagha se sləa ŋkwa shɛ, Ba'al-Perasim.

²¹ Te ŋkwa shɛ sərəakɛ wəshia nci nyi zhɛrete hɛ kashala ka Filisti. Pa yɛ David le mbelia ŋkɛ fəhwe hɛ.

²² Pa ka Filisti dzeme zhɛkwa ba'a pesleyi geva kwa zlərəa ka Refay.

²³ Pa David 'yɛwakɛ va Mahwətə, ma ke Mahwətə shɛ: «Ha nda ma mpa na ke hɛ se kwa kema ma! Kwiɗi dzeyi ŋa kwetere wəmbəa nci nda ve nda mpa na ke hɛ se laka kema ta yɛ weɗɛaka.

²⁴ Ma kefate gaka ta seɗa na pelɛ ghəa yɛ weɗɛaka ne, ve nda mpa ke hɛ kahe kahe, kwa nza ŋkɛ mbe vəa shɛ tedzeghwa 'ya te kema ta ŋa kezha ɗa ka Filisti.»

²⁵ Pa David menete kala nya gezete nda Mahwətə. Pa ŋkɛ ɗate ka Filisti ba'a kekate hɛ se mbe Gɛba hwa'a mɛa mɛa Gɛzɛr.