1 Timotɛ 6 - Ghena ta Shala

Ka mavashi

¹ Nahe ka mavashi pɛtɛ kehi kave zləvə te mbeli nyi kesleke hɛ, yitea ɗema mbeli kaŋele te sləa Shala ba'a wəsə nya teke nda n'yɛ ke mbeli.

² Ma ka mavashi nyi nza ka sleke kaka zele Yɛsə Kriste ne, mba hɛ keɗema hawe va hɛ, va nya nza hɛ kaka mama mbe Yɛsə Kriste. Ama mene nda slene hɛ ke hɛ za ma. Kwa nza ŋkɛ nahe ka sleke hɛ nyi kefa deme te slene ta nci kenza kambeli nyi ɗehwe Shala. Nya ya kawəsə nya hi na kateke nda ba'a kageze nda ke mbeli.

Teke wəshi tseŋwə ba'a mcɛlə nya kaganda

³ Ma kenza kwete wəndə kateke nda kwete wəsə ke mbeli, ma kezeletema ghena ganjia Nde sleke ɓəmə Yɛsə Kriste ba'a teke wəsə nya kedzeghwa le yɛ ta ɓəmə ŋkɛ ne,

⁴ nahe ŋkɛ kenza kande kele ghə ba'a kande ɗepema wəsə. Ma wəndə nya kala nyagha ne, nde zereghwe nya keghəpə ba'a nya kevereslə ŋkɛ. Shave mbe wəsə nya kala nyagha shave zlɛ, mpa, zəzə nyi ndiremi ndiremi ba'a ghena nyi 'yaghwa 'yaghwa,

⁵ ghəpə nyi keɗema kakiɗi kwelɛ mbeli nyi kaka dewə zəzə, nyi keɗepema kaganda, nya keveyi yɛ Shala kawəsə kemene ghə.

⁶ Kaganda ne, nahe yɛ Shala kenza kawəsə kemene ghə, kenza wəndə kazlama te wəsə nya ve.

⁷ Kwa nza ŋkɛ kesawa gheɓəmə kwa hwə le kwete wəsə we, tsagha shɛ ne, wəsə shɛ kateslə gheɓəmə le we.

⁸ Ma kenza wəsə kezeme ba'a yɛ lekwesa va gheɓəmə ne, zlama ɓəmə le hɛ.

⁹ Ama mbeli nyi kezele nza kaka mcɛlə ne, nahe dagalawe wəshi gezhi ba'a ndiremi ndiremi nyi mawe hɛ, nyi kebete mbeli mbe beze ba'a za kekesehwe hɛ.

¹⁰ Kwa nza ŋkɛ ɗe cɛdɛ ya kaslərəa ndiremi pɛtɛ. Ma kweci mbeli kwa ɗe hɛ kakemave cɛdɛ kwele kwele ne, bətə zamte hweŋkwa ta yɛ hɛ ba'a kwele kwele sahwe yaka hɛ.

Slene ganyɛ ta yɛ

¹¹ Ama gha wəndəa Shala ne, fɛa ghəa ŋa yitea wəshia shɛhɛ. Zele nza tiɗiɗi, nza jikə le Shala, yɛ, ɗe, zereghe ghena ba'a nza kagwedə.

¹² Mpa mpa ganyɛ kezha yɛ, yitea nza le Shala kaghala ghala. Kezha gheŋkɛ hekakɛ ŋa Shala, kwa nza ŋkɛ nahe na kegezete yɛ ta ŋa kwa kema ta mbeli kwele kwele.

¹³ Ma 'ya sha gha kwa kema ta Shala nya keve nda mpi ke pɛtɛa wəshi, ba'a kwa kema ta Yɛsə Kriste, nya keneghate fete laka yɛ kwa kema ta Ponse Pilate:

¹⁴ hawe va ghena nya gezete ŋa mbeli, yate ghena shɛ tiɗiɗi ba'a kaɗema ŋele te, hwa'a te veci nya tese Nde sleke ɓəmə Yɛsə Kriste.

¹⁵ Katenca geva wəsəa shɛ te və nya dzeghete Shala, gheŋkɛ ya kameghe nya kwele kwetɛŋenyɛ, nya kewəpi wəpi, meghea ka meghea kɛfi, Nde sleke ŋkwa ta ka sleke ŋkwa.

¹⁶ Gheŋkɛ kwetɛŋenyɛ nde ɗema kamte, nya te ŋkwa nya ghwɛaɗɛaɗɛa nya ɗema wəndə kahendave nda geva. Kegha wəndə kanakɛ ŋkɛ we, wəndə shɛ kapesle kanakɛ ŋkɛ we. Ŋa ŋkɛ zləvə ba'a berete kaghala ghala. Amɛn.

Ncɛ nda ntsehwele ke ka mcɛləa kɛfi

¹⁷ Geze nda ke ka mcɛləa wəshi nyi kwake te hɛɗi kezha ɗema hɛ kakele ghə. Geze nda ke hɛ kezha ɗema hɛ kave ghə te mcɛlə nyi keɗema katemə, ama kezha ve ghə hɛ te Shala nya keɗa ɓəmə wəshi kwele kwele, kezha zlama gheɓəmə te hɛ.

¹⁸ Geze nda ke hɛ kamene ganyɛ, kanza kaka mcɛlə laka slene ganji, kanza kaka vele ba'a kaka nehe wəshi le kweci mbeli.

¹⁹ Ma kala nya ne, katetsene nda wəshi hɛ kwele kwele ke ghəa nci kezha kwete veci, yitea kemave mpi nya kaganda hɛ.

Njiŋwe ŋkwa kwa keɗaŋe

²⁰ Timotɛ, yate ghena nya kedapave ŋa geva megela. Ya ghəa ŋa va ghena ghweleme ba'a ghena nyi keɗema laka yɛ, tsagha va ɗepe wəsə tseŋwə.

²¹ Ma kwa ɗe kweci mbeli kakele ɗepe wəsəa shɛ ne, nahe hɛ kezamte yɛ ta nci. Pa zlaɓa ta Shala nza le gheyɛ.