1 Timotɛ 1 - Ghena ta Shala

Njiŋwe ŋkwa

¹ Se va Pol, wəndə nya ghwenakɛ Yɛsə Kriste laka ghena nya gezeke Shala Nde mbele ɓəmə ba'a Yɛsə Kriste, wəndə nya vate ghə gheɓəmə te.

² Ke Timotɛ, wəzege ta ɗa nya kaganda mbe yɛ. Pa Shala Yita ba'a Yɛsə Kriste Nde sleke ɓəmə ndeke ŋa zlaɓa, zhɛ heli ba'a kwelɛŋe.

Ya ghə va ka teke nda tseŋwə ke mbeli

³ Kala nya gezete ŋa 'ya, nda teslə 'ya kadzembe Masɛdowane ne, nza ŋa mbe Ɛfɛze. Kweci mbeli nyi keteke nda tseŋwə ke mbeli ya shɛ mbe, fɛake hɛ yite.

⁴ Geze nda ke hɛ kezha ɗema hɛ kadambeghənji yitea ghena heca ba'a sləa ka shihɛ nyi keɗema kakiɗi. Wəshi nyi kala nyighɛ ne, kancɛte nda ghena ta Shala hɛ ke mbeli we, fɛa yafɛa nda zəzə ta Shala hɛ ke mbeli, nya kemene geva laka yɛ.

⁵ Ma wəsə nya ganyɛ mbe ghena nya ne, ncɛ ɗe nya ganyɛ nya kesame kwa wənə nya wɛŋe, mbe mehele ganyɛ ba'a yɛ nya ɗema mbəɗəkwə hwe.

⁶ Nahe hweŋkwa kezave nda za ke kweci mbeli, nahe hɛ kezelete ghena ghweleme gəmə nyi geze mbeli.

⁷ Kaɗe hɛ kanza kambeli nyi kencɛ nda wəshi mahalegə ke mbeli, ama keɗepe ghena nyi geze hɛ hɛ, ya ghena nyi ntsə geva hɛ kageze we.

⁸ Nahe gheɓəmə keɗepe megela wəsə mahalegə kenza wəndə kamene slene le kala nya kehi.

⁹ Fave ɓəmə ghena nya megela: kenza wəsə mahalegə kaŋa mbeli nyi tiɗiɗi we, ama kaŋa mbeli nyi kebeze ghena, ka fama ghena, ka 'yaghwa mehele, ka jaɗafa, mbeli nyi kehawema va Shala ya wəshi nyi keveyi geva kaŋa Shala, ka pesle yiteyɛa nci ba'a megheyɛa nci, ka mpə ŋkwa,

¹⁰ ka vale tahe, ka vale ŋwale, ka pamte mbeli ka mavashi, ka tseŋwəa kɛfi, ka zeme fela tseŋwə, pɛtɛa mbeli nyi keɗema wəsə nya tiɗiɗi nya teke nda mbeli ke mbeli.

¹¹ Nya ya kaghena nya keyipə geva le Ghena kwatenca nya ganyɛ nya kendeke ɗa geva, nya kencɛ Shala nya nza zləvə kwele kwele te, nya keɗe zeɗe nza ta ɓəmə.

Pol katsa nda ŋ'wese ke Shala yitea ganyɛa ŋkɛ

¹² Ŋ'wese 'ya sha Yɛsə Kriste Nde sleke ɓəmə, nya kendeke ɗa berete yitea slene ta ŋkɛ. Ŋ'wese 'ya shɛ, va nya veyi ɗa ŋkɛ kawəndə nya dɛŋe dɛŋe te slene ta ŋkɛ,

¹³ ya kwela se 'ya kaŋele vəashi, kaghweze mɛ hwa mbelia ŋkɛ ba'a kamene berete te hɛ. Ama nahe Shala kezhɛakɛ heli yitea 'ya, kwa ɗema 'ya keyɛte, keɗepe wəsə nya mene 'ya 'ya we.

¹⁴ Nahe Nde sleke ɓəmə kezlaɓa le 'ya kwele kwele, nahe ŋkɛ ndeke ɗa yɛ le ɗe kala nya va gheɓəmə laka jikə ta ɓəmə le Yɛsə Kriste.

¹⁵ Wa nya ghena nya kaganda, nya hi mbeli pɛtɛ kayɛ nya: Nahe Yɛsə Kriste kesawa te hɛɗi kezha mbele ka jaɗafa. 'Ya nde jaɗafa nya za ma hwa hɛ.

¹⁶ Ama kezha nya kala nya zhɛakɛ heli Shala yitea 'ya, kezha baŋe Yɛsə Kriste kancɛte zereghe ghena ta ŋkɛ laka 'ya, nde ghate ta ka jaɗafa, kawəsə keyipə pa kezha mbeli nyi keteyɛ ŋkɛ, yitea kemave mpi nya kaghala ghala hɛ.

¹⁷ Hawe pɛtɛa mbeli va Shala ba'a tsahe ŋkɛ mbeli kaghala ghala. Gheŋkɛ ya kaMeghe nya keɗema kakiɗi, nya keɗema kamte, nya ɗema mbeli kanakɛ, nya Shala kwetɛŋe! Amɛn.

¹⁸ Timotɛ, wəzege ta ɗa, kadape ŋa ghena nya 'ya, nya keyipə geva le ghena kelɛŋə nyi gezete ka mɛ ŋkwa ta Shala te ghəa ŋa vəashi. Dɛŋate geva te ghena nya kezha mpa mpa ganyɛ,

¹⁹ keseve yɛ ba'a mehele ganyɛ. Nahe kweci mbeli keɗema yɛ ghena shɛ, vatse zamte yɛ ta nci hɛ.

²⁰ Hwa mbelia shɛhɛ yɛ Himɛnɛ le Alɛgezandre, nahe 'ya kendeke nda hɛ ke Satan yitea teke hɛ kaŋelema Shala.