1 Saməyɛl 5 - Ghena ta Shala

Səndəkwəa Shala va ka Filisti

¹ Pa ka Filisti kelehwe səndəkwəa Shala. Pa hɛ kelemte ŋkɛ shave mbe Ɛbɛn-Ɛzɛr kadzembe Asdod.

² Ma kwa kelehwe səndəkwəa Shala ka Filisti ne, pa hɛ keleghe ŋkɛ kadzeki ghɛa shala ta nci Dagon ba'a veyi terasle vare Dagon nya feɗete mbeli.

³ Te hendɛ ta ŋkwa ne, pa ka Asdod sate te ŋkwa masheke masheke, ama newe hɛ ne, nahe Dagon keteɗenyɛ mbe kema ta səndəkwəa Mahwətə. Pa hɛ kelete Dagon ba'a veyi ŋkɛ te ŋkwa ŋkɛ.

⁴ Te hendɛ ta ŋkwa masheke masheke zhɛkwa ne, pa hɛ nakɛ Dagon te hɛɗi. Ketsasle tsasle ghəa ŋkɛ ba'a dzeve ta ŋkɛ bake tagha te hɛɗi kwa ŋkwa kedzeki ghɛa ŋkɛ. Deke geva nde tene tagha.

⁵ Vatse nza nde pa ɓeshi mbe Asdod ne, kaya ghə ka dzeghe shala Dagon ba'a mbeli nyi kedzeki ghɛa ŋkɛ pɛtɛ va ŋkeɗe ŋkwa nya teɗenyɛ Dagon kwa ŋkwa kedzeki ghɛa ŋkɛ.

⁶ Pa Mahwətə ɗate ka Asdod kwele kwele ba'a vahwe ndiremi hwa hɛ. Pa ŋkɛ vahwe zereghwe ta tereme zeweve hwa hɛ mbe Asdod ba'a ŋkwa nyi kwa ghala ta ŋkɛ.

⁷ Ma kwa nakɛ ka Asdod dzawe ghena shɛ ne, ma ke hɛ gezete: «Yagha səndəkwəa Shala ta ka Israyɛl kanza hwa gheɓəmə, kwa nza ŋkɛ nahe ŋkɛ keɗate ɓəmə zlaɓe le shala ta ɓəmə Dagon!»

⁸ Pa hɛ tsenete mbeli nyi te ghəa ka Filisti ki ghɛa nci, ma ke hɛ gezete nda ke hɛ: «Tsema nza gheɓəmə kamenete le səndəkwəa Shala ta ka Israyɛl tse wa?» Ma ke hɛ zhɛnete: «Kadzawa meleme Gat nza mbeli kakeleghe səndəkwəa Shala ta ka Israyɛl.» Pa mbeli keleghe səndəkwəa Shala ta ka Israyɛl kadzawa Gat.

⁹ Ama kwa keleghe mbeli kadzawa ne, pa Mahwətə ɗate melemea shɛ kwele kwele. Pa ghazlənə nya wəba menete geva. Pa Mahwətə ɗate mbeli nyi mbe melemea shɛ se te ŋwale hwa'a te mbelia jama. Pa tereme zeweve zhɛte nda ke hɛ kwele kwele.

¹⁰ Pa hɛ ghweneghe səndəkwəa Shala kadzawa Ɛkron. Ama ntsehema ta nci kwa Ɛkron, ma ke ka Ɛkron tsate lewela: «Ghenci keleke n'yɛ səndəkwəa Shala ta ka Israyɛl kezha zamte sebe te ghen'yɛ le mbelia n'yɛ.»

¹¹ Pa hɛ hekate mbeli nyi te ghəa ka Filisti pɛtɛ yitea tsene. Ma ke hɛ sha hɛ: «Zhɛnemte mə səndəkwəa Shala ta ka Israyɛl, zhɛneghe geva ŋkɛ kadzete ŋkwa nya se ŋkɛ yagha ŋkɛ kazamte n'yɛ, ghen'yɛ le mbeli n'yɛ.» Va nya nza ŋkɛ nahe ghazlənə ta mte kedzembe yayata meleme nya se dzeve ta Shala ghyanake kənəa mbeli.

¹² Ma mbeli nyi kempəma ne, bətə se hɛ va zhi nyi kebeghe ŋkwa ba'a kadzeme nehwene yaka ta nci hwa'a pelɛ ghweme se mbe meleme.