1 Saməyɛl 4 - Ghena ta Shala

¹ Pa Saməyɛl gezete nda ghena shɛ ke pɛtɛa ka Israyɛl. Ma te kwete veci, cape ka Israyɛl kalə yitea mpa le ka Filisti. Pa hɛ ŋsleyi ghweɓea nci terasle le Ɛbɛn-Ɛzɛr, ma ka Filisti le ŋa nci, kwa Afɛk nzanji hɛ.

Səndəkwəa Shala mbe dzeve ta ka Filisti

² Pa ka Filisti tseɓate geva kwa zəɗə kwa zəɗə mbe kema ta ka Israyɛl kezha mpa, pa mpa ghate geva zlahe. Hərə ka Israyɛl va ka Filisti nyi kempəmte mbeli gare 4.000 yitea hɛ hwa mpa.

³ Pa hɛ zhɛreghe geva kalə sha ghedəkwəa nci, ma ke mbelia jama ta ka Israyɛl gezete: «Yitea wa sərəakɛ Mahwətə kaɗa ɓəmə ka Filisti ɓeshi wa? Mbara ɓəmə kadzawa Silo yitea sepate səndəkwəa jikə geva ta Mahwətə, kezha se ŋkɛ kadzehwa gheɓəmə ba'a yitea mbele ɓəmə shave mbe dzeve ta ka jaga ta ɓəmə.»

⁴ Pa hɛ ghweneghe mbeli kadzawa Silo, pa hɛ keleghe səndəkwəa jikə geva ta Mahwətə nde berete nya kənəa ka shɛrəbɛŋe. Tagha ŋwalea Hɛli nyi bake: yɛ Hofni le Pinhas dekwede le səndəkwəa jikə geva ta Shala.

⁵ Ntsehema ta səndəkwəa jikə geva ta Mahwətə mbe ghedəkwə ne, pa pɛtɛa ka Israyɛl tsate gaghwe le berete ba'a pa hɛɗi gaŋkəɗəte geva.

⁶ Pa ka Filisti fate gaka ta gaghwea shɛ, ma ke hɛ gezete: «Wa yaɗe gaghwe nya berete nya mbe ghedəkwəa ka Ɛbrə kancɛ tse wa?» Pa hɛ fate nahe səndəkwəa Mahwətə kedzembe ghedəkwəa ka Israyɛl.

⁷ Pa ghazlənə zhɛte nda ke ka Filisti, kwa nza ŋkɛ ma ke hɛ: «Ɗa nde tenza te gheɓəmə! Nahe shala kedzawa ghedəkwəa shɛ, kwa nza ŋkɛ tagha ŋkɛ vəashi we.

⁸ Ɗa ya te gheɓəmə! Wa nde nza kambelemte ɓəmə shave mbe dzeve ta shala nya berete nya, nya kevate yaka te ka Ɛzhipte laka mama ta ndiremi te ɓerama wa?

⁹ Mba gheɓəmə keghazlənə ka Filisti, nza ɓəmə kazhili yagha gheɓəmə kanza mbe dzeve ta ka Ɛbrə kala nya se hɛ mbe dzeve ta ɓəmə, nza ɓəmə kazhili ba'a kaka ɗa ŋkwa!»

¹⁰ Pa ka Filisti dzembe mpa, pa hɛ hərəte ka Israyɛl. Yayata wəndə kahwɛ kadzembe yɛ cɛ lekwesa ta ŋkɛ. Ɗa nya wəba ŋkɛ: zhili 30.000 ka mpə hwa ka Israyɛl.

¹¹ Laŋe ka Filisti kelehwe səndəkwəa Mahwətə, nahe ŋwale tezhilia Hɛli nyi bake, yɛ Hofni le Pinhas kempə.

Mte ta nde dzeghe Shala Hɛli ba'a ŋa makwa ta ŋkɛ

¹² Te vecia shɛnyɛ, pa kwete wəndə mbe hwelefe ta Bɛnjamɛn slə se te ŋkwa mpa le hwɛ, pa ŋkɛ kekave Silo le lekwesa keŋkwahe ŋkwahe ba'a le ghə bətə va hɛɗi kezha ncɛ yaka nya kenza shɛ.

¹³ Ma kwa ntsehe ŋkɛ ne, mentishɛ Hɛli te ŋkwa ŋkɛ vare hweŋkwa kaneghe ŋkwa, va nya nza nde kaslesla helia ŋkɛ va səndəkwəa Shala. Pa wəndəa shɛ lə kagezete nda ghena nya kemenete geva ke mbeli mbe meleme, pɛtɛ mbeli nyi mbe meleme katsa lewela.

¹⁴ Pa Hɛli fate lewela shɛ, ntake ŋkɛ kageze nda ke ghəa ŋkɛ, ma ke: «Yitea wa tsa geva lewela tse wa?» Pa wəndəa shɛ lə le hwɛ sha Hɛli ba'a gezete nda ghena nya kemenete geva.

¹⁵ Meslimsə degheseghəmbe va ta Hɛli mbe vəa shɛ. Mteghere nza ntsə ta ŋkɛ te wəndə, ama mba kanakɛ ŋkwa we.

¹⁶ Ma ke wəndəa shɛ sha Hɛli: «Same ta ɗa nya kwa ghwa mpa. Nahe 'ya kehwɛ ɗa same kwa ɓeshi nya.» Ma ke Hɛli shɛ: «Wa wəsə nya kemenete geva wa wəzege ta ɗa?»

¹⁷ Ma ke nde ghwenea shɛ shɛ: «Nahe ka Israyɛl kehwɛnji va ka Filisti ba'a kwele kwele ɗate hɛ hɛ, zlaɓe le ŋwalea ŋa nyi bake yɛ Hofni le Pinhas kempə, ɓiyitsa, nahe hɛ kekelehwe səndəkwəa Shala.»

¹⁸ Ma kwa gezete ghena ta səndəkwəa Shala ŋkɛ ne, pa Hɛli teɗenyɛ sawa pelɛ ŋkwa kentishɛ ta ŋkɛ me'yaŋe 'yaŋe kadzevare gelembe, perawakwe tsaraka ta ŋkɛ, mtiwə ŋkɛ, kwa nza ŋkɛ kehale hale ŋkɛ ba'a zlahe ɗaŋeɗa ta ŋkɛ. Kande meha ghwə se ŋkɛ te ghəa ka Israyɛl kava wəfaɗemsə.

¹⁹ Le hwə makwa ta ŋkɛ, male ta Pinhas, takwa takwa nde kaya. Ma kwa fate kele nya kelehwe səndəkwəa Shala mbeli, mte ta yiteyɛa za nta ba'a ŋa za nta nde ne, pa nde ntserete nda kwa nza nde kwele kwele zhɛ nda ŋkɛ, pa nde ya nda.

²⁰ Ma kwa nza nde takwa takwa kamte ne, ma ke mi nyi tagha kənə shɛ: «Ghazlənəma na ma, wəzege teza yayake na.» Kese nde kazhɛne we, kese nde kave sleme yite we.

²¹ Kwa sebe ta ŋkɛ, ma ke: «Ma va nya shavenyɛ zləvəa Shala mbe Israyɛl ne, 'ya kaheka nda slə ke wəzegea shɛ kaIkabod», geze ta ŋkɛ, «Mba zləvə shɛ we.» Kele ta səndəkwəa Shala, mte ta yiteyɛa za nta ba'a ŋa za nta yazəzə sləa shɛ.

²² Ma nda gezete nde: «Nahe zləvə kekelemte geva shave mbe Israyɛl», a ke ne, va nya kelehwe səndəkwəa Shala ka ghema.