1 Saməyɛl 2 - Ghena ta Shala

Ane katsa nda hana ke Mahwətə

¹ Kwa sebe ta ŋkɛ, ma ke Ane səkwəte ghə: «Te zlaɓa ta Mahwətə ne, kwele kwele zlama kwa wənəa ɗa. Se te zlaɓa ta Mahwətə ne, nahe 'ya kekafete ghə, wərə 'ya kaŋ'wəshi ka jaga ta ɗa. Kwele kwele zlama va 'ya: Shala nde mbelete ɗa.

² Wəndə nya kala Shala shɛ we, kwete keleɓa shɛ kala gheŋkɛ we. Keɗema Shala ta ɓəmə, kwete keleɓa keya ŋkwa shɛ we.

³ Mba yɛ keseghe ghena le mɛ gəmə, gezema ghena nya kezhɛ ŋkwa yɛ ma, kwa nza nde deke Mahwətə ya kaShala nya keɗepe wəshi pɛtɛ, kameha ghwə ŋkɛ te wəshi nyi mene wəndə ŋelɛ.

⁴ Nahe rəgia mbeli nyi kempa keɓelenji, ama nahe ka dewə ŋeli keŋ'wete berete.

⁵ Ma mbeli nyi kese behe behe ne, slene yasepa hɛ slaɗe hwələ kezha ŋ'we wəsə kedzawa mɛa nci, ama mpi yazhɛne mbeli nyi kese shewə va ma. Mberefaŋe zhigə ya ŋkwa male jɛŋa, ama mba male nya keyake ŋwale kazhɛne kaya wəzege we.

⁶ Kaza mpia wəndə Mahwətə, kazhɛne nda ŋkɛ ŋkɛ ke wəndə, kave ŋkwa ŋkɛ kwa ghɛa mbelia kwahɛɗi, kafə ŋkwa ŋkɛ same kwa ɓiyitsa.

⁷ Kazhɛre wəndə Mahwətə kande titikwə, kazhɛre wəndə ŋkɛ kande mcɛlə, kashifə ŋkwa ŋkɛ, kakafe ŋkwa ŋkɛ.

⁸ Kakele nde dewə ŋeli nya keteɗe ŋkɛ shave hwa keləwə, kakele nde titikwə ŋkɛ shave hwa reɗa ta kəsə kezha ve nda ŋkwa kentishɛ ŋkɛ ke hɛ hwa mbelia jama. Kave nda ŋkwa kenza ŋkɛ ke hɛ kala pasla nya nza zləvə te. Kwa nza nde Mahwətə nde sleke hɛɗi lema, gheŋkɛ nde pate hɛɗi lema ba'a nde veyi seɗa ta ŋkɛ bereteke.

⁹ Kaya dzeghwa ta mbeli nyi dɛŋe dɛŋe te ŋkɛ, ama terayɛ za sebe ŋkɛ te ka 'yaghwa mehele mbe ŋkwesle. Va nya nza nde wəndə shɛ kahərəte ŋkwa le berete ta ŋkɛ we.

¹⁰ Ma ka jaga ta Mahwətə ne, terayɛ tenza hɛ, kateghwene berazlɛ ta va ŋkɛ kadzeghəa hɛ sawa pelɛ ghweme. Katemeha ghwə Mahwətə te mbeli nyi te hɛɗi. Katembake nda berete ŋkɛ ke meghea mbelia ŋkɛ, katembake nda kwele ŋkɛ ke Mɛsi nya ntave ŋkɛ.»

¹¹ Pa Ɛlkana dzeghwanyɛ sha ghɛa ŋkɛ mbe Rama. Ama Saməyɛl nya kawəzege le ŋa ŋkɛ, mba ŋkɛ tagha mbe Silo kamene nda slene ke Mahwətə kwetere wəmbəa Hɛli, nde dzeghe Shala.

Ŋwalea tezhilia Hɛli

¹² Nahe ŋwalea Hɛli kenza kaka dewə mehele, kaka hawema va ghena ta Mahwətə.

¹³ Kaka dzeghe Shala se hɛ, ama tsetse se hɛ kamene le mbeli: ma kenza kwete wəndə kadzeghe Shala ne, kalə nde mene slene ta nde dzeghe Shala yipə le və nya nza sli te ghwə kezha pesa le lɛ nya nza njaŋa ŋa mahekene te yitea dzeve.

¹⁴ Kaha ŋkɛ kadzawa wəshi kesheke wəshi: kwenə, dəghwə keɗema helape. Kave nda yayata wəsə nya kesame te lɛ nya njaŋa ŋa shɛ ŋkɛ ke nde dzeghe Shala. Wa nya tsagha se hɛ kamene le ka Israyɛl nyi kedzeme ghɛa Shala nya pelɛ Silo.

¹⁵ Ma nda teslɛwa merege ta wəsə keseɗa nyagha mbeli, kase nde mene slene ta nde dzeghe Shala kezha geze nda ke wəndə nya kedzeghe melɛ, ma ke shɛ: «Ndeke ɗa sli kepesa kaŋa nde dzeghe Shala. Kateyɛ ŋa ŋkɛ kave nda sli kwa ta ta na we, ama deke sli nya teghweme.»

¹⁶ Ma kegeze nda wəndə nyagha: «Kaba slɛwamte merege mbeli nda ŋave na kala nya ɗe na» a ke shɛ ne, ma ke sha zhɛne nda: «Ewə! Ndeke ɗa tsetsenya, keɗema tsagha, 'ya kakele le berete.»

¹⁷ Kwele kwele se beze ghena ta ŋwalea Hɛli mbe kema ta Mahwətə kwa se hɛ kahawema va wəsə nya ve nda mbeli ke Mahwətə.

¹⁸ Ma Saməyɛl nya kadɛgwə ne, slene ta Mahwətə yamene ŋkɛ. Lekwesa pawa nya ganyɛ ya kənə.

Saməyɛl mbe Silo

¹⁹ Keva keva ne, kasla nda karalame nya ɓɛhwɛ meghekɛ ba'a kakele nda nde kenza hɛ kadzeme Silo le za nta kezha dzeghe melɛ nya mene hɛ kala yayata va.

²⁰ Pa Hɛli wəpikɛ yɛ Ɛlkana le male ta ŋkɛ, ma ke: «Ndeke ŋa hwelefe Mahwətə sawa hwa male nya kezha nza te zhia wəzege nya ndeke nda nde ke Mahwətə!» Kwetere wəmbəa ŋkɛ, pa hɛ zhɛneghe geva kalə sha ghɛa nci.

²¹ Pa Mahwətə kemanakɛ Ane, pa nde dzedzawa hwə ba'a yeyake ŋwale tezhili mahekene ba'a ŋwalea kwɛ bake. Kele yakele Saməyɛl nya kawəzege mbe kema ta Mahwətə.

Hɛli kaŋele ŋwale tezhilia ŋkɛ

²² Nahe Hɛli nya kande dzeghe Shala kehalenyɛ təwə təwə. Nahe ŋkɛ kefate wəshi nyi mene ŋwalea ŋkɛ le ka Israyɛl, kaɓelahe hɛ le mi nyi kemene slene mɛa ŋkwa kedzembe cɛ lekwesa kebegeme geva.

²³ Ma ke sha hɛ: «Yitea wa mene wəshi nyi ndiremi ndiremi nyi yɛ kala nya wa? Nahe 'ya kefate kageze wəshi nyi wale wale nyi mene yɛ pɛtɛa mbeli.

²⁴ Ewə, ŋwalea ɗa, sərəakɛ mə mene wəshi nyi ndiremi ndiremi, va nya nza nde kendireminyɛ ghena nya fate 'ya kageze mbelia Mahwətə te gheyɛ.

²⁵ Ma kebezemte nda ghena wəndə ke kwete wəndə ne, katemeha ghwə Shala te. Ama kenza nde ke Mahwətə bezemte nda ghena wəndə ne, wa wəndə nya ketenegha fete te wa?» Ama kese hɛ kafa ghena ta yiteyɛa nci we. Vatse ɗete Mahwətə kampəmte hɛ.

²⁶ Ama Saməyɛl nya kawəzege, kele yakele ŋkɛ ba'a nza yanza ganyɛke kwa kema ta Mahwətə ba'a kwa kema ta pɛtɛ mbeli.

Ɗa nya gezete nda Mahwətə ke Hɛli le mbelia ŋkɛ

²⁷ Pa kwete nde mɛ ŋkwa lə kabegeme le Hɛli, ma ke gezete nda: «Wa nya ghena nya geze Mahwətə nya: Ashɛ nahe 'ya kencɛte nda ghəa ɗa ke ka shihɛ ŋa kwa se hɛ kwa Ɛzhipte mbe dzeve ta Farawon kamene nda slene wəka?

²⁸ Hwa pɛtɛa hwelefefi nyi mbe Israyɛl ne, nahe 'ya kentave shia ŋa Aron yitea nza ŋkɛ kande dzeghe Shala nya ketedzeghe ɗa melɛ te reghwetɛa ɗa, kezha tere 'wərdə ba'a kezha 'yɛwe ghena va 'ya. Nahe 'ya kendeke nda kwete bela ta wəshi nyi dzeghekɛ melɛ ka Israyɛl le, tsagha ke hwelefe ta ŋkɛ.

²⁹ Ma gɛ ne, yitea wa ɗema yɛ kahawe va melɛ ba'a wəshi nyi fə ɗa mbeli, nyi 'yɛwakɛ 'ya kamene mbeli keveci keveci te ŋkwa nya nza 'ya wa? Za ma hawe na va ŋwalea ŋa ke 'ya, kezha neghate ghəa ŋayɛ yɛ le wəshi ganji hwa wəshi nyi fə ɗa mbelia ɗa, pɛtɛa ka Israyɛl na?

³⁰ Yawa, ma gɛ ne, wa nya ghena ta ɗa nya, 'ya Shala Mahwətə ta ka Israyɛl: nahe 'ya kemeɗeyi, mbe kema ta ɗa tedzeghwa ghɛa ŋa ba'a ghɛa yiteyɛ ŋa kaka dzeghe Shala kaghala ghala. Ama tsetsenya ne, kaganda geze 'ya, kaɗema mba kamenete geva. Kwa nza ŋkɛ ma mbeli nyi kehawe va 'ya ne, kateve zləvə 'ya kadzete hɛ, ama mbeli nyi keɓela ɗa ma ne, kateɗema hɛ 'ya ba'a bətə tenza hɛ mbe hawe perə.

³¹ Wa nya və nya kese yitea hekahwe pɛtɛa mbelia jama 'ya shave hwa mbeli nyi ki ghɛa yiteyɛ ŋa ba'a peləa ŋa, yagha meha mehɛɗi katene tɛape.

³² Katenewe kwete nde ghema na ki ghɛa ɗa te tepe ta wəshi ganji nyi temene nda 'ya ke ka Israyɛl, ama meha za shɛ katetene ki ghɛa ŋa we.

³³ Ya tsagha shɛ ŋkɛ ne, katesərə wəndə 'ya kwetɛŋe mbe hwelefe ta ŋa dekwede le reghwetɛa ɗa kezha zhɛ ŋa zlɛ ba'a kezha nza mehele ta ŋa ketaze taze. Ama pɛtɛa zhili nyi ki ghɛa ŋa katempə kala mbeli nyi gəmə.

³⁴ Ma wəsə nya teɗepe na te ne, wəsə nya ketemene nda geva ke ŋwale tezhilia ŋa nyi bake, yɛ Hofni le Pinhas: katempə hɛ pɛtɛa nci te veci kwetɛŋe.

³⁵ Kwetere wəmbəa ŋkɛ, kateve nde dzeghe Shala nya tiɗiɗi 'ya kaŋa ɗa, nya ketemene wəsə kala nya ɗe wənəa ɗa. Kateve hwelefe ta ŋkɛ 'ya kaka dzeghe Shala kaghala ghala, kwa kema ta meghe nya ntave 'ya tedzeghwa ŋkɛ keveci keveci.

³⁶ Ma tsagha, katelə wəndə nya ketenza le mpi ki ghɛa ŋa kagwəɗəŋə mbe kema ta ŋkɛ kezha kemave dəɓərəa mze kwa tɛawetɛa kwetɛŋe keɗema ɗafa kembeɗa ɓɛhwɛ, ma ke sha tegeze: ‹Ndeke ɗa kwete hwa slene kamene 'ya kwa sebe ta nde dzeghe Shala təhwə təhwə ŋa 'ya, baŋe 'ya kaŋ'wete ɓələa ɗafa kezha zeme gi.›»