1 Saməyɛl 16 - Ghena ta Shala

Shala ntave David kameghe

¹ Ma ke Mahwətə gezete nda ke Saməyɛl: «Pa te nyama və tenehwene Sawəl na wa? 'Ya ne, nahe 'ya keneghamte ŋkɛ. Katezhɛne ŋkɛ kanza kameghea ka Israyɛl we. Viɗikɛ tereme ta ŋa le n'yi nda teslə na! 'Ya kaghwene ŋa sha Zhɛsɛ, nde Bɛtelɛhɛm, kwa nza nde nahe 'ya kenakɛ wəndə nya ntave 'ya kanza kameghe hwa ŋwalea ŋkɛ.»

² Ma ke Saməyɛl: «Tsema nza 'ya kadzawa ɗa wa? Ma kefate Sawəl ne, katepesle ɗa ŋkɛ.» Ma ke Mahwətə shɛ: «Ŋkave mbəkwəa sla, ma pa na sha tegeze: ‹'Ya se kezha dzeghe nda melɛ ke Mahwətə›.

³ Kateheka Zhɛsɛ na yitea melɛa shɛ. 'Ya le ghəa ɗa nde tencɛ ŋa wəsə nya temene na, kateve wəndə nya tegeze ŋa 'ya na tekeleke kameghe.»

⁴ Pa Saməyɛl menete wəsə nya gezete nda Mahwətə, hwa'a ŋkɛ kwa Bɛtelɛhɛm, cape mbelia jama kalə shɛ le bare bare. Ma ke hɛ shɛ: «Wəsə ganyɛ nde keleke ŋa teke na?»

⁵ Ma ke: «E'e, 'ya se kadzeghe nda melɛ ke Mahwətə. Nza mə wɛŋe wɛŋe ba'a se mə kadzeghe melɛ yitea 'ya.» Pa ŋkɛ gezete nda ke yɛ Zhɛsɛ le ŋwalea ŋkɛ kezha nza wɛŋe wɛŋe, pa ŋkɛ hekakɛ hɛ yitea melɛa shɛ.

⁶ Ma kwa ntsehe hɛ ne, ma ke Saməyɛl gezete kwa nakɛ Ɛliyab ŋkɛ: «Ya tsemanyɛ ŋkɛ, teke wəndə nya ntave Mahwətə mbe kema ta ŋkɛ.»

⁷ Ama ma ke Mahwətə gezete nda ke Saməyɛl: «Mba na keve zəzə te nza ta ŋkɛ kwa ntsə ba'a biya ta ŋkɛ, va nya nza ŋkɛ nahe 'ya keneghamte ŋkɛ. Kenza ŋkɛ kawəndə nya newe mbeli kwa ntsə we, wəsə nya ketse kwa ntsə yanewe wəndə ŋelɛ, ama ŋkwa nya kwa wənə yanewe Mahwətə.»

⁸ Pa Zhɛsɛ hekakɛ Abinadab ba'a keleghe ŋkɛ dzeyi te kema ta Saməyɛl. Ma ke Saməyɛl: «Kentave wəndə nya Mahwətə perə we.»

⁹ Pa Zhɛsɛ keleghe Shama, ma ke Saməyɛl: «Kentave wəndə nya Mahwətə perə we.»

¹⁰ Pa Zhɛsɛ keleghe ŋwalea ŋkɛ nyi mberefaŋe mbe kema ta Saməyɛl, ma ke Saməyɛl shɛ: «Wəndəa nci shɛ kentave Mahwətə we.»

¹¹ Ma ke Saməyɛl shɛ: «Kweci shɛ ka megelɛgeshi tse yi?» Ma ke shɛ: «Mba David nya ɓɛhwɛ ma, ama wəshi yaya ŋkɛ» Ma ke Saməyɛl shɛ: «Ghwenakɛ ŋkwa lə mbeli kaheka ŋkɛ, va nya nza nde katezeme wəsə mbeli keɗema ŋkɛ kese we.»

¹² Pa Zhɛsɛ ghwenakɛ ŋkwa kalə kaheka ŋkɛ. Kawəzege rasle ba'a ndeɗe ŋkɛ, ganyɛke kema ta ŋkɛ. Ma ke Mahwətə sha Saməyɛl: «Sate veyi ŋkɛ tekeleke, gheŋkɛ ŋkɛ!»

¹³ Pa Saməyɛl kelete tereme n'yi ba'a shekeyi n'yi nya kwa kənəa ghəa David kezha ve ŋkɛ tekeleke, te tepe ta ka kesaka meghekɛ. Pa Sefəa Mahwətə sawa kadzeghəa David se te vəa shɛ kezha mene slene mbe. Pa Saməyɛl sate te ŋkwa, cape ŋkɛ kadzeme Rama.

¹⁴ Pa Sefəa Mahwətə slənyɛ shave mbe Sawəl, pa sefəa 'yi'yɛghwə nya ghweneghe nda Mahwətə dzembenyɛ mbe ba'a ndeke nda ghazlənə.

¹⁵ Ma ke mbeli nyi kemene nda slene gezete nda ke Sawəl: «Wa nya sefə kwa ndiremi nya keghweneke Shala kadzeghəa gha kasa ŋa yaka.

¹⁶ Təhwə təhwə ŋa ghen'yɛ, geze n'yɛ ghena, nde sleke n'yɛ, ŋa ŋa ghen'yɛ. Kateghweze ŋa wəndə nya keɗepe tsa ŋgwəleŋə ghen'yɛ, katetsa ŋa ŋkɛ ŋkɛ vəa ŋkwa nya dzeghəa gha sefə nya ndiremi se va Shala yitea nza na yipəma le.»

¹⁷ Ma ke Sawəl sha ka mene nda slene: «Zelete ɗa mə wəndə nya keɗepe tsa ŋgwəleŋə tiɗiɗi shɛ yɛ keleke ɗa ŋkɛ teke.»

¹⁸ Pa kwete wəndəa ka mene nda slene kelete ghena kageze, ma ke: «Nahe 'ya keɗepe kwete wəzege ta Zhɛsɛ, nde Bɛtelɛhɛm, nya keɗepe tsa wəshi megela, wəndə nya nza zləvə te ŋkɛ, nde mpa ŋkɛ, keɗɛŋe ɗɛŋe ŋkɛ yitea geze ghena, kendeɗenyɛ ŋkɛ. Ɓiyitsa ne, nahe Mahwətə kenza le gheŋkɛ.»

¹⁹ Pa Sawəl ghweneghe ka ghwene ta ŋkɛ sha Zhɛsɛ, ma ke shɛ: «Ghwenave ɗa wəzege ta ŋa David nya yitea wəshi.»

²⁰ Pa Zhɛsɛ kelete kwara ba'a hwepeyi ɗafa, ghwelepe tɛ ba'a zhɛgwəa kwe te, pa ŋkɛ ghweneghe nda hɛ laka David ke Sawəl.

²¹ Pa David ntsehe sha Sawəl, cape ŋkɛ yitea mene nda slene. Nahe Sawəl keɗehwe ŋkɛ kwele kwele ba'a kezhɛrete ŋkɛ kande kele nda wəshi kempa ta ŋkɛ.

²² Ma ke Sawəl ghwenakɛ ŋkwa kageze nda ke Zhɛsɛ: «Kasəkwə 'ya va gha yitea sərəakɛ ɗa David na kamene ɗa slene, kwa nza nde nahe 'ya keɗehwe ŋkɛ zlahe.»

²³ Ma kese 'yi'yɛghwə nya ghweneke nda Shala kadzembe Sawəl ne, kakele ŋgwəleŋə nyagha David katsa. Ma tsagha ne, megela zhɛne mpi Sawəl, lɛŋe lɛŋe ma nza geva ta ŋkɛ ba'a kaslə 'yi'yɛghwə nyagha shave mbe.