1 Piyɛre 5 - Ghena ta Shala

Newe ghweme te mbelia Shala

¹ Ke mbelia jama nyi hwa gheyɛ geze nda ghena 'ya, 'ya nya kawəndə kwele kala hɛ. Nahe 'ya kenakɛ yaka nyi sahwe Kriste, 'ya nya keteŋ'we zləvə nya ketencɛ geva. Wa nya wəsə nya 'yɛwe 'ya va hɛ nya:

² newe mə ghweme te wəshi keseɗa nyi dapave ŋayɛ Shala, kaɗema va nya tərənə ŋayɛ mbeli, ama le wənə ganyɛ kala nya ɗe Shala. Mene mə slene kaɗema kezha kemave mcɛlə, ama laka ve nda ghə ke slene.

³ Menema berete yɛ te mbeli nyi kedapave ŋayɛ geva ma, ama nza mə kambeli nyi yipə ghəa nci mbeli le hɛ.

⁴ Ma vəa ŋkwa nya tenca wəndə nya te ghəa ka ya wəshi ne, katekemave derə meghe ganyɛ nya ɗema ɓela ta ŋkɛ katekiɗi yɛ.

⁵ Tsagha shɛnyɛ gɛ ŋwale, hawe mə va mbelia jama ta ŋayɛ. Gheyɛ pɛtɛ, shifə mə ghə kwelɛ ghəa ŋayɛ, kwa nza ŋkɛ ma ke Ghena ta Shala gezete: «Kaɗema ghena ta ka kele ghə Shala, ama kave nda zlaɓa ta ŋkɛ ŋkɛ ke ka shifə ghə.»

⁶ Tsagha gɛ, shifə mə ghəa ŋayɛ mbe dzeve ta Shala nde berete, yitea ve zləvə ŋkɛ te gheyɛ te və ganyɛ.

⁷ Bete mə wəshi nyi keyirə ŋayɛ mbe dzeve ta Shala, va nya nza ŋkɛ kanewe ghweme te gheyɛ.

⁸ Nza mə le mehele ba'a le ntsə, kwa nza ŋkɛ dzasle yadzasle ŋayɛ nde ghema ta ŋayɛ, gətəli, kala nivɛrə nya keghwəghwə, kezha zele wəndə kaslekwe.

⁹ Zhɛne nda mə ghə laka nza bereteke mbe yɛ. Nahe yɛ keɗepe yaka yasa ka kesaka meyɛ ŋayɛ nyi te hɛɗi lema kala gheyɛ.

¹⁰ Katesa yaka yɛ kavə ɓɛhwɛ. Ama nahe Shala nya keɗe ɓəmə kwele kwele kehekakɛ ŋayɛ kezha dzembe zləvəa ŋkɛ nya kaghala ghala, laka nza jikə le Kriste. Kateve ŋayɛ nza dɛŋe dɛŋe ŋkɛ, katemtsehe ŋayɛ berete ŋkɛ ba'a katezhɛre ŋayɛ ŋkɛ dzəŋə dzəŋə.

¹¹ Ŋa ŋkɛ nza berete kaghala ghala. Amɛn.

Njiŋwe ŋkwa kwa keɗaŋe

¹² 'Ya nde rafete ŋayɛ palepa ɓɛhwɛ laka kemane ta Silas, nya veyi 'ya kawəza ma nya dɛŋe dɛŋe, kezha mtsehe ŋayɛ berete ba'a kezha geze ŋayɛ te kaganda ta zlaɓa ta Shala dɛŋate geva yɛ.

¹³ Kanjiŋwe ŋayɛ Jikə ta ka Kriste nya mbe Babilone, nya ntave Shala kala gheyɛ, tsagha Mark, wəzege ta ɗa.

¹⁴ Njiŋwe mə ghəa ŋayɛ le ɗe kala ka kesaka ma. Pa kwelɛŋe nza le gheyɛ mbeli nyi mbe Kriste pɛtɛ.